Read Paite Psalms 66 Bible Online

Psalms 66 - Paite bible

Psalms 66

¹Leilung luah tengteng aw, Pathian pahtawiin nuamin kikou unla.

²A min thupidan tuh la in sa khia unla: a phatna hihthupi un.

³Pathian kiangah, Na thilhihte mulkimhuai na e! Na thilhihtheihna thupidan thu-ah nangmah melmate na kiangah a kipelut ding uhi.

⁴Lei tung luah tengtengin chibai honbuk ding ua. Nangmah phatin la a sa ding uh, chi un. Selah.

⁵Kisa un, Pathian thilhihte en un; mihing tate tunga a thilhih ah a kihtakhuai ahi.

⁶Aman tuipi leigaw a suaksaka; luipi khein a pai kai ua: huaiah amah ah i kipak uhi.

⁷A thilhihtheihna in khantawnin vai a hawma; a mitin nam chih a en hi: helhatte kipahtawi kei uhen. Selah.

⁸Mi chihte aw, I Pathian uh phat unla, amah phatna husa tuh theisak un.

⁹Aman tuh i hinna uh a hihhing gige a, i khete hihsuan a phal kei hi.

¹⁰Pathian aw, nang non enchian a; dangka sik etchet bangin non enchian ahi.

¹¹Nang len ah non piluta; ka kawng uah puakgik tak non koiha.

¹²Mihingte, kangtalai tunga tuangin, ka lu tunguah na pai saka; mei leh tui ah ka pai suak ua; himahleh mun hausa takah lut dingin non pi khia ahi.

¹³Halmanga thillatte toh na in ah ka lut dinga, ka thuchiamte na lakah ka tangtungsak ding hi.

¹⁴Ka mukin a gena, mangbang a ka om laia kamin a gente mah.

¹⁵Sa thau tak halmanga thillatte na kiangah ka lan dinga, belampate hal namtui toh; bawngpate, kelte toh ka lan ding hi. Selah.

¹⁶Kisa un, Pathian laudansiam tengteng aw, ngaikhia un. Huchiin, ka hinna adinga a thilhih tuh ka hontheisak ding hi.

¹⁷Amah tuh ka kamin ka sama, ka leia pahtawiin a om hi.

¹⁸Ka lungtanga thulimlou ka limsak leh Toupan honngaikhe kei dinga

¹⁹Himahleh, Pathianin honngaikhe taktaka; ka thumna husa a limsak ahi.Pathian, ka thumna vuaksuak sak lou-a, ka laka a chitna tawp sam lou tuh phatin om hen.

²⁰Pathian, ka thumna vuaksuak sak lou-a, ka laka a chitna tawp sam lou tuh phatin om hen.