Read Paite Psalms 69 Bible Online

Psalms 69 - Paite bible

Psalms 69

¹Pathian aw, honhondam in; tuite lah ka hinna phain a lutta ngala.

²Buannawi thukpi, siksan himhim om louhna ah, ka tum hulhul hi: Tui thukpi tui lian hontupna ahte, ka na lutta hi.

³Ka kikouna lamin ka baha; ka dang a keu khinta; ka Pathian ka ngakna ah ka mit a vai khinta hi.

⁴Bangmahlou a honhote ka samzang sangin a tam ua: dikloupi a hondou a honhihmangthat tumte tuh mi hat tak ahi uhi: huchiin ka lak het louh tuh ka penawn hi.

⁵Pathian aw, nang ka haidan na thei hi; ka siamlouhnate leng na lakah sel ahi kei hi.

⁶Toupa aw, sepaihte Pathian, nangmah ngakte keimah jiakin zahlak kei uhen: Israelte Pathian aw, nangmah zongte keimah jiakin hihzumin om kei uhen.

⁷Nangmah jiaka gensiat ka thuak jiakin, zumnan ka mai a khuh khinta hi.

⁸Ka unaute lakah mikhual ka na hitaa, ka nu naute lakah theih ngeilouh mi ka na hita hi.

⁹Na in a ka phatuamngaihnain honne khina; nangmah gensete gensiatnate ka tungah kibungta hi.

¹⁰Ka kaha, anngawl kawma ka hinna ka sawi leh, huai lah gensiata ka omna phet ahia.

¹¹Ka puansilha saiip ka zat leh, amau dia hoihlou lama gentehna ka na hi jela.

¹²Kulh konga tuten ka tungtangthu a gen ua; zukhamhatte lasak ka nahita hi.

¹³Himahleh, Toupa aw, ken jaw, hun kipahhuaiah ahi, ka thum; Pathian aw, na chitna thupi jiakin na hotdamna thupi takin hondawng in.

¹⁴Buannawi akipan honhumbit inla, hontum sak mahmah ken; honhote lakah leh tui thukpi akipan humbitin hon omsak in.

¹⁵Tui lianin hontum mang kei henla, tui thuk piin leng honvalh kei hen, kokhuk inleng a kam honchih khum kei hen.

¹⁶Toupa aw, hondawng in; na chitna a hoih ngala; na lainatna thupidan bang jelin kei lam hongnga in.

¹⁷Na sikha lakah na mai leng sel ken; ka mangbang ngala; hondawng meng in.

¹⁸Ka hinna honnaihin, tan inla; hondoute jiakin hon humbit in.

¹⁹Nang mi hon gensiatnate, ka zahlaknate, ka zumnate na thei hi: hondoute na maah a om vek uhi.

²⁰Mi hon gensiatna in ka kha a sia a; nakpi takin ka lungkham behlap hi: huchiin hon hehpih ding ka zonga, himahleh kuamah a om ngal kei ua; honkhamuan dingte ka zong nawna, himahleh kuamah ka mu sam kei hi.

²¹Ka an dingin banghiam kha a honpiak behlap ngal ua; ka dangtakin lah uain thuk dawn dingin honpia uhi.

²²A ma ua a dohkan uh thang honghi hen; khamuang taka a om lai un pial honghi hen.

²³A mitte uh, a muh theihlouhna ding un, hihmialin om hen; a kawngte uh kivuang sak gige in.

²⁴Na lungkimlouh mahmahna tuh a tunguah sungbua inla, na heh thangpaihnain amau tuh man hen.

²⁵A omna uh gam henla; a puanin khawng uah kuamah om kei hen.

²⁶Na satpa tuh a sawi ua, na sukliamte lungkhamna leng a gen ngal nak uhi.

²⁷A thulimlouhna uh thulimlouhnain behlap inla; amau na diktatna ah lut kei uhen.

²⁸Amau tuh hinna bu akipan nulmang in om uhenla, mi diktat lakah gelh hi kei uhen.

²⁹Himahleh kei genthei tak leh lungkham tak ka hia: Pathian aw, na hotdamna in mun sangah honkoih in.

³⁰Pathian min lain ka phat dinga, kipahthu genin amah ka pahtawi ding hi.

³¹Huchibangin bawngtal hiam, ki leh chinnei bawngpa hiam, sangin Toupa a kipaksak zo ding hi.

³²Thunuailutten huai a mu ua, a kipak uhi: nou Pathian zongte aw, na lungtang uh hingin om hen.

³³Toupan tagahte ngaikhiain, a hentate tuh a musit ngal kei hi.

³⁴Lei leh vanin amah phat hen, tuipite leh a sung ua thil tang thei peuhmahte toh.

³⁵Pathianin Zion honkhiain, Juda khuate a siam dek ngala: huchiin huaiah a om ding ua, neih toh a thuah ding uh.A sikhate suanten leng a gouluah ding ua; a min itte a sungah a om ding uhi.

³⁶A sikhate suanten leng a gouluah ding ua; a min itte a sungah a om ding uhi.