Read Paite Psalms 85 Bible Online

Psalms 85 - Paite bible

Psalms 85

¹TOUPA, na gam tungah na kipaka: Jakobte, sala a om utuh na pi kik nawnta ahi.

²Na mite thulimlouhnate na ngaidama, a gitlouhna tengteng uh na khuh khinta ahi. Selah.

³Na thangpaihna tengteng tuh na la manga: na hehna thupitak na kiheisanta hi.

⁴Honhondampa Pathian aw, honkihei sak nawn inla, ka tung ua na hehna tuh tawpsak in.

⁵Ka tunguah na heh nilouhlouh dia hia? Na hehna tuh suan tengteng tanin na kitheisak jel dia hia?

⁶Nangmaha na mite a kipah theihna ding un non hihhalh nawn kei dia hia?

⁷TOUPA aw, na chitna tuh honmu sak inla, na hotdamna leng honpia in.

⁸TOUPA Pathian thu gen dingka ngaikhe ding: a mite leh a mi siangthoute kiangah khamuanna thu a gen dek ngala: himahleh amau tuh haina lamah kihei nawnta kei uhen.

⁹A hotdamna tuh amah kihtate naihin a om ngeingei nak hi; I gam ua thupina a om theihna dingin.

¹⁰Chitna leh thutak a kituak a; diktatna leh kituahna a kitawpa,

¹¹Thutak tuh lei akipanin a dawn khiaa; diktatnain van akipanin a hontan sukta hi.

¹²Ahi, TOUPAN thil hoih a pe dinga; I gamin leng a thilpou a pe ding hi.Diktatnain ama a kai dinga; a khapte tuh lampi-ah a siam ding hi.

¹³Diktatnain ama a kai dinga; a khapte tuh lampi-ah a siam ding hi.