Read Paite Psalms 88 Bible Online

Psalms 88 - Paite bible

Psalms 88

¹TOUPA aw, honhumbitpa Pathian, sun leh janin na maah ka kikou gigea;

²Ka thumna na maah lut henla; ka kikou husa ah na bil hondohin;

³Ka hinna mangbatnatein a dima, ka hinnain Sheol a honnaihta ngala.

⁴Kokhuka paisukte laka sim khawm ka hi a; hatna himhim neilou mi bang ka hi a;

⁵Gal thahte han-a lumte banga misi laka paih khiak ka hi; huaite tuh na theih tak louh, na khut akipan hihman ahi uhi.

⁶Kokhuk nuainungpenah non lum sakta a, mun mial tak, thupi-ah.

⁷Na hehnain hondelh khuma, nang na tui kihawt tengtengin gim non thuaksakta a. Selah.

⁸Ka meltheihte hon gamlatin na om saka; amau adia kihhuai piin non bawlta a: khakkhumin ka oma, ka pawt khe theikei ahi.

⁹Gimthuakna jiakin ka mit a se hiaihiaia: TOUPA aw, ni tengin kon sam ahi, nang lamah ka khutte khawng ka jaka.

¹⁰Misite adingin thillamdang na hih dek ahia? Sisaten thouin a honphat ding ua hia? Selah.

¹¹Na chitdan tuh hana theihsakin, na ginomdan tuh Manthatna Muna theihsakin a om dia hia?

¹²Na thillamdang hihte tuh mialah theihin a om dia hia? Na diktatna gamah theihin a om dek nawn ahia?

¹³TOUPA aw, ken jaw kon sama, ka thumnain jingsangin a hondon hi.

¹⁴TOUPA, bangachia ka hinna khah khia na hia? Bangachia ka laka na mai sel?

¹⁵Ka naupan chil akipan gimthuak leh si dekdekin ka oma; na thil mulkimhuaite ka thuakin hihlungbuaiin ka om hi:

¹⁶Na heh mahmahnain hon vuk manga; na thil mulkimhuaiten honhihmangta a.

¹⁷Huaiten nitumin tui bangin honumsuak ua; ka kim ka velin honum chiat uhi.Honitpa leh ka lawm tuh hon gamlatin a omsakta a, ka mel theihnate mial ah na omsakta ahi.

¹⁸Honitpa leh ka lawm tuh hon gamlatin a omsakta a, ka mel theihnate mial ah na omsakta ahi.