Read Paite Proverbs 14 Bible Online

Proverbs 14 - Paite bible

Proverbs 14

¹Numei pil tengin a in a lama: himahleh mi haiin amah khutin a phel sia.

²Amah tanaa omin Toupa a kihtaa: himahleh a lampitea hoihlouin amah a musit hi.

³Mi hai kam sungah kisaktheihna chiang a om: himahleh mi pil mukten huaite a hawi ding hi.

⁴Bawngtalte omlouhna ah, anpiakkuang a sianga: himahleh bawngtal hatna jiakin nakpia punna a om.

⁵Theihpih ginomin juau a gen kei ding: himahleh theihpih juautheiin juau a gen hi.

⁶Musittuin pilna a zonga, a mu kei hi: himahleh theihsiamna neia ding in theihna a baih hi.

⁷Mihai a omna ah lutin, amah ah theihna mukte na mu kei ding.

⁸Mi pilvang pilna a lampi theihsiam ahia: himahleh mi haite haina khemna ahi.

⁹Mi haiin mohna a nuihsana: himahleh mi tangte lakah hoih deihna a om hi.

¹⁰Lungtangin amah khatna a theia; huan mikhualin a nuamsakna a tokbuai kei hi.

¹¹Mi giloute in suksiatin a om ding: himahleh mi tang a pha ding hi.

¹²Mihing adia lampi dika kilawm a oma, himahleh huai tawpna sihna lampite ahi.

¹³Lungtang nuihna nangawn lungkhamna ahia; huan vualnopna tawpna gikna ahi.

¹⁴Lungtanga nungtolhmi amah lampitea damsakin a om ding: huan mi hoih amah maha kipana hihlungkimin a om ding hi.

¹⁵Mi mawlin thu chih a uma: himahleh mi pilvangin a paina hoihtakin a en hi.

¹⁶Mi pilin a kihtaa, gilou akipan a pai mang: himahleh mi haiin musittakin a kipuaa, a kimuang.

¹⁷Kuapeuh heh baih haitakin a ta ding: huan ngaihtuah gilou mi huatin a om hi.

¹⁸Mi mawlin haina a luah ding: himahleh mipilvang theihna khuksakin a om ding.

¹⁹Hoih maah hoihlou a kuna; huan diktat kongpite ah gilou.

²⁰Genthei amah inveng mahmah muhdahin a om: himahleh hausain lawm tampi a nei hi.

²¹A inveng musitin thil a hihkhiala: himahleh mi genthei hehpih, aman nuam a sa hi.

²²Hoihlou ngaihtuahte a paikhial kei umaw? himahleh chitna leh thutak hoih ngaihtuah kiangah a om ding.

²³Sepgimna tengtengah phatuamna a om: himahleh mukte houlimna taksapna lam kia ah a pai.

²⁴Mi pil manglukhu a hausakna uh ahia: himahleh mi haite haina a haina kia uh ahi.

²⁵Theihpih dikin khate a suakta saka: himahleh juaute genin khemna a omsak.

²⁶Toupa kiktakna ah muanna hat a oma: huan a nauten bukna mun a nei ding uh.

²⁷Toupa kihtak hinna tuikhuk ahi, sihna thangte akipan paimangna dingin.

²⁸Mipi tamna ah kupipa thupina a om: himahleh mipite omlouhna lal siatna ahi.

²⁹Kuapeuh a heh hak theihsiamna thupi akipan ahi: himahleh kuapeuh lungtomin haina a tawisang hi.

³⁰Lungtang hoih sa hinna ahi: himahleh hajatna guhte muatna ahi.

³¹Kuapeuh genthei nuaisiahin a Bawlpa a simmoh hi: himahleh kuapeuh tasam tunga chitna neiin amah a zah.

³²Mi gilou a gilou hihnaa paih lutin a oma: himahleh mi diktatin a sihna ah lametna a nei hi.

³³Theihsiamna nei lungtang ah pilna a khawla: himahleh mihaite sunglam panga om kitheihsakin a om.

³⁴Diktatnain nam a tawisanga: himahleh khelhna mi kuapeuh adingin zahlakna ahi.Sikha pil taka gamta lamah kumpipa deihsakna a oma: himahleh zumna omsak tungah a thangpaihna a om hi.

³⁵Sikha pil taka gamta lamah kumpipa deihsakna a oma: himahleh zumna omsak tungah a thangpaihna a om hi.