Read Paite Proverbs 17 Bible Online

Proverbs 17 - Paite bible

Proverbs 17

¹Tanghou gaw huaia muanna toh a hoihjaw, in kinaknaa dim sangin.

²Sikha pil taka hihin tapa zumhuaina omsak tungah vai a hawm ding, huan unaute laka goutanna ah tan a nei ding hi.

³Huansiangna bel dangka ading ahi, huan meipi dangkaeng ading: himahleh TOUPAN lungtangte a endik.

⁴Hoihlou hihmin gilou mukte a limsaka; huan juauhatin siatna lei a bil a doh hi.

⁵Kuapeuh genthei musitin amah Bawlpa a simmoh ahi; huan kuapeuh tuahsiatni a kipak gawt louhin a om kei ding hi.

⁶Naupangte naupangte mi upate manglukhu ahi uh; huan naupang thupina a pate uh ahi.

⁷Thugen hoih mi hai toh a kilawm kei: muk juauthei lal toh a kilawm kei sem.

⁸A nei mit ah thilpiak suangmantam bang ahi: koilam peuha a kiheina ah, a lohching hi.

⁹Kuapeuh tatlekna khuhin itna a zong hi: himahleh kuapeuh thubuaia nuam nasain lawm pite a khendalh hi.

¹⁰Theihsiamna nei mi sungah taina a lut thuk jaw mihai sunga vuakna za khat sangin.

¹¹Mi hoihlouin helna kia a zonga; huaijiakin sawltak khel amah dou dinga sawlin a om ding.

¹²Vompi a noute laksaka omin mi tuak hen, a hainaa mi hai sangin.

¹³Kuapeuh hoih sika gilou kipahman pia, a in akipan gilou a pai mang kei ding.

¹⁴Kinakna kipatna min tui a khahkhiak bang ahi: buaijiakin kinakna a om main, kiselna pai sanin.

¹⁵Kuapeuh gilou siamtangsak, kuapeuh mi diktat mohpaih, amau gel TOUPA adingin kihhuai ahi tuaktuak uhi.

¹⁶Huaijiakin pilna lei dingin mi hai khut ah a man a om ahia, theihsiamna a neikei chih theiin?

¹⁷Lawmin chiklaipeuhin a it gigea, huan vangtahna dingin unau khat a piang hi.

¹⁸Mi theihsiamna beiin khut a benga, a inveng maah mohkhu dingin a hongom.

¹⁹Kinakna deihin tatlekna a deih hi: kuapeuh a kongpi dom sangin siatna a zong hi.

²⁰Kuapeuh lungtang sia neiin hoih a mu kei: huan lei hoihlou nei siatna ah a puk hi.

²¹Kuapeuh mi hai suangin a lungkhamna dingin a suanga; huan mi hai pan nuamsakna a neikei.

²²Lungtang nuamsa damdawi hoih ahi: himahleh lungsim puakkham in guhte a keusak.

²³Mi gilouin a sunga kipanin thilpiak a la khiaa, vaihawmna lampi kilawmlou sak dingin.

²⁴Theihsiamna nei mi maah pilna a om: himahleh mi hai mitte lei tawpah a om hi.

²⁵Tapa hai a pa adingin lungkhamna ahi, amah piangsaknu adingin khatna.

²⁶Mi diktat gawt leng a hoih keia, mi lian a tanna uh jiaka jep leng.

²⁷Kuapeuh a thute sitin theihna a neia: huan kuapeuh lungsim vot akipan theisiam mi ahi.Mi hai nangawn, a daih dide laiin, pila sim ahi: a mukte a chih laiin, pilvang banga ngaih ahi.

²⁸Mi hai nangawn, a daih dide laiin, pila sim ahi: a mukte a chih laiin, pilvang banga ngaih ahi.