Read Paite Proverbs 20 Bible Online

Proverbs 20 - Paite bible

Proverbs 20

¹Uain muhsithat ahia, zu khauh kilaihat ahi; huan kuapeuh huaia paikhial a pil kei hi.

²Kumpipa kihtakhuaina humpinelkai humham bang ahi: kuapeuh amah hihhehin amah hinna siatna dingin thil a hihkhial hi.

³Mihing a dingin kinakna akipan kidangkoih zahtakhuaina ahi: hiamhleh mi hai peuhmahin kinakna a bawl ding hi.

⁴Mi thadahin phavangin lei a let kei ding; huaijiakin pawltak chiangin a zong dia, bangmah a neikei ding.

⁵Mihing lungtang ah thuphagel tui thuk bang ahi; himahleh theihsiamna nei min huai tuh a suah khe ding hi.

⁶Mi tampiin amah tunga mi siam mi a tuak ding: himahleh mi ginom kuan a mu ding?

⁷Mi dik amah muanhuainaa om amah nungin a tate a hampha uhi.

⁸Kumpipa vaihawmna mangtutphah tunga tuin a mitin gilou tengteng a theh jak hi.

⁹Kuan, ka lungtang ka hihsianga, ka khelhna akipan ka siangthou, a chi thei dia?

¹⁰Bukna chi tuamtuam leh, tehna chi tuamtuam, a nih tuaktuak un TOUPA ading kihhuai ahi.

¹¹Naupang nangawnin a thilhihin amah leh amah a kitheisaka, a nasep a siangthou hia, a dik hia chih.

¹²Zathei bil leh, muthei mit, TOUPA a nih tuaktuakun a bawl hi.

¹³Ihmut it ken, na genthei kha ding hi; na mit hak in, huchiin tanghouin na tai ding hi.

¹⁴A leimiin, Bangmah ahi kei, bangmah ahi kei, a chi: himahleh a pai khit nungin, huaichiangin a kiuangsak hi.

¹⁵Dangkaeng a om, rubi suang tampi: himahleh theihsiamna mukte juel suangmantam ahi uh.

¹⁶A puan mikhual adia mohkhuhna la in; huan amah mikhualte dia mohkhuh na kichiamna dingin len in.

¹⁷Juautheihna tanghou mihing adingin a khuma; himahleh a nungin a kam suanghumin a dim ding hi.

¹⁸Thiltup chiteng thuhoihgela hihkip ahi; huan pina pilin nang kidouna na bawl.

¹⁹Kuapeuh tangthugen banga pai vialvialin thugukte a kitheisak hi: huaijiakin kuapeuh a mukte zapia hong kithuahpih dah in.

²⁰Kuapeuh a pa hiam a nu hiam hamsiat, jan khomial penpen ah a khawnvak heklup ahi ding hi.

²¹Kinohtaka gouluah muh tawpna vualjawl ahi kei ding hi.

²²Gilou ka thuk ding, chi ken: TOUPA ngak in, aman a honhondam ding hi.

²³Bukna chi tuamtuam TOUPA adingin kihhuai ahi: huan khaina diklou a hoih kei.

²⁴Mihing painate TOUPA akipan ahi; huchi a hihchiangin bang chiin mihingin a lampi a theisiam dia?

²⁵Mihing adingin, A siangthou, chih mawkmawk thang ahi, huan a nunga thukan dinga thuchiam.

²⁶Kumpipa pilin migiloute a haiha, a tunguah chilna kangtalaikhe a pai sak hi.

²⁷Mihing lungsim TOUPA khawnvak ahi, gilpi sunglam sungnungpenpen a veka zongin.

²⁸Chitna leh thutakin kumpipa a hawia; huan a mangtutphah chitna-a let kip ahi.

²⁹Tangvalte thupina a hatna uh ahi: huan putekte kilawmna a lutang kang uh ahi.Keh zoua satnain thil hoihlou a singsianga: satnain gilpi sunggil lamte a jel hi.

³⁰Keh zoua satnain thil hoihlou a singsianga: satnain gilpi sunggil lamte a jel hi.