Read Paite Proverbs 27 Bible Online

Proverbs 27 - Paite bible

Proverbs 27

¹Jingchiang thu ah kiuangsak ken; niin bang ahia a honsuahsak ding lah na theikei ngala.

²Midangin nang hon phat uhen, nangmah mah kam hilouin; mikhualin nangmah mah mukte hilouin.

³Suang agika, piaunel a gik hi; himahleh mihai lungjinna huaite gel sangin a gikjaw hi.

⁴Thangpaihna a gilou, hehna a khel; himahleh thiikna maah kua a ding thei dia?

⁵A langtanga salhna itna selguk sangin a hoihjaw.

⁶Lawm liamna te a ginom: himahleh melma tawpna a loliap hi.

⁷Kha gilvahin khuaikhak a chimtaka: himahleh kha gilkial adingin thil kha chiteng a khum hi.

⁸Vasa a buk akipan a vakvai bangin, huaibang in a mun akipan mi vakvai ahi.

⁹Nuhtheih leh gimnamtuiin lungtang a kipaksaka: huai bangmah mihing lawm khumna lungsimtaka thupha a hongpai ahi.

¹⁰Na lawm mah mah, na pa lawm manghilh ken; na tuahsiatna niin na unau in ah hoh ken: inveng a naia om unau gamla pia om sangin ahoih jaw hi.

¹¹Ka tapa, pil in, ka lungtang kipak sak in, kei hontai ka dawn theihna dingin.

¹²Mi pil in hoih lou a mua, a bu hi: himahleh mi mawlin a awlmoh keia, a thuak loh hi.

¹³Mikhual a ding mohkhu dia om a puansilh la in; huan numei lamdang adia mohkhu dia om chiamkamna dingin len in.

¹⁴Kuapeuh aw ngaihtaka, jingsanga bel taka thoua, vualzawl, amah adingin hamsiaa sim ahi ding hi.

¹⁵Vuahchin nia vuah ju leh numei kinak hat a kibang:

¹⁶Kuapeuh amah khou tuh huih khou bang ahia, khut taklama sathau ham bang ahi.

¹⁷Sikin sik ahiamsaka; huaimahbangin mihingin a lawm mel a himsak hi.

¹⁸Kuapeuh theipi kung kem in huaia a gah a ne ding; huan kuapeuh a pu ngak zahtakin a om ding hi.

¹⁹Tuia maitangin maitang a muh bangin, huaimah bangin mihing lungsim ah mihinna a kimu.

²⁰Seol leh abaddon a lungkim ngei kei ua, huan mihing mitte a lungkim ngeikei uh.

²¹Huansiangna bel dangka ading ahi, huan meipi dangkaeng a ding, huchiin mihing phatnaa zeetin a om.

²²Mihai sum sungah buh taisate lakah sukin su mahlecin, huchipiin leng amah akipanin a haina a paimang kei lai ding hi.

²³Na belamhonte omdan thei dingin thanuam in, huan na ganhonte hoih takin en in:

²⁴Hauhsaknate lah khantawn ading ahi ngal keia; huan manglukhuin suan tengteng a daihzou hia?

²⁵Buhpawl puakin a oma, huan loupa nou a kilang, mualte loupate a kilakhawm ahi.

²⁶Belamnouten na puansilh ding honpe ding, huan kelten na lou man ding:Huan na an dingin, na inkote an dingin kel nawitul kiching a om ding hi; huan na nungakte vakna dingin.

²⁷Huan na an dingin, na inkote an dingin kel nawitul kiching a om ding hi; huan na nungakte vakna dingin.