Read Paite Proverbs 7 Bible Online

Proverbs 7 - Paite bible

Proverbs 7

¹Ka tapa, ka thute kemin, na kiangah ka thupiakte khol khawm in;

²Ka thupiakte kem inla hing in; huan ka dan na mit tang bangin

³Na khutzungte tungah vial inla; na lungtang suangpek tungah gelh in.

⁴Pilna kiangah, ka sanggamnu na hi, chiin la, huan theihsiamna na tanaunu chiin:

⁵Numei lamdang akipan nang a honkep theihna ding un, a thutea maitangphatnu mikhual akipan.

⁶Ka in tohlet ah ka tohletkhakna ah ka en paisuaka;

⁷Huan mi mawlte lakah ka ena, tuailaite lakah ka theikaka, tangval theihsiamna beipa,

⁸A omnaning china kongzinga paisuaka, a in lam juana pai jelpa;

⁹Khomuiin, ni nitaklamin, jan mial bibek leh khomial ah.

¹⁰Huan, ngaiin, numei khat, kijuak puansilh silh, lungtang kivain a nakituahpiha.

¹¹Amah ahi lawlawa, a tum tuntuna; a khe a in ah a om gige kei:

¹²Konhzinga om ton a oma, mun liantea a om ton a oma, ning chiteng a buk jel hi.

¹³Huchiin aman a manta, amah a tawpta, huan zummoh maitang tohin a kiangah:

¹⁴Lemna kithoihnate ka kiangah a om; tuiin ka thuchiamte ka peta hi,

¹⁵Huaijiakin nang tuak dingin ka hongpai khiaa, na mel thanuamtaka zong dingin, ka honmuta hi,

¹⁶Ka tutna nuam pialkhang phah ze hoihtea zep, ka phah khinta, Aigupta khau puan gialte toh.

¹⁷Ka lupna murra, aloe, leh sinamonin ka namtui sakta.

¹⁸Hongpai in, jingsang matan I itna dimset I la ding; itnain I kilungmuan tuah ding.

¹⁹Ka pasal lah in ah a om ngal keia, khual gamla ah a zin hi:

²⁰Sum ip a kitawia; kha a lik chiangin in ah a hongpai ding, a chi a.

²¹A thugen siamnain amah a kipe sakta, a muka maitangphatnatein amah a sawlmang ta hi.

²²Amah a jui paha, goh dinga bawngtal a pai bangin, hiam mihai bawlhoihna dia sikkhau khihmi bangin;

²³Thalin a sin a kap pailet tan; tang lama vasa a kintat bangin, huan huai tuh a hinna gun a hih a theikei hi.

²⁴Tuin, ka tapate, huaijiakin honngaikhia un, ka kama thute limsak un.

²⁵Na lungtang amah lampi lam ah awn kei henla, lampite lamah pai mang kei hen.

²⁶Amah lah tampi liamsain a pailumlettaa: ahi, a thahsate mi hat tampi ahi uh.A in Seol zotna lampi ahi, sihna dantante juana suk pai.

²⁷A in Seol zotna lampi ahi, sihna dantante juana suk pai.