Read Paite Proverbs 8 Bible Online

Proverbs 8 - Paite bible

Proverbs 8

¹Pilna a kikouin, theihsiamnain a aw a suah kei maw?

²Lampia mun sangta tungah, lampite kisutna ah, a dinga;

³Kongpite biangah, khopi lutna ah, kongkhaktea pai lutna ah, nakpiin a kikou a:

⁴Noute, aw mite, ka sam: huan ka aw mite tapa kiangah ahi.

⁵Aw nou mimawlte, kivensiamna theisiam un; huan, nou mi haite, lungtang theisiam nei un.

⁶Ja un, thil hoihpenpente gen ding lah ka hi ngala; huan ka mukte honna thil dikte ahi ding hi.

⁷Ka kamin thuthak gen ding ahi ngala; huan gitlouhna ka muk adingin kihhuai ahi.

⁸Ka kama thute tengteng diktatna ah a om; huaiteah bangmah hei hiam kilawmlou hiam a om kei hi.

⁹A theisiam kuapeuh adingin a kichian vek ua, theihna mu amaute adingin a dik hi.

¹⁰Ka hilhna sang unla, dangka hilouin; dangkaeng hoihpen sangin theihna.

¹¹Rubi suang sangin pilna lah a hoihzo ngaka; huan deihhuai thilte tengteng huai toh tehpih theih ahi kei uh.

¹²Kei pilnain kivensiamna ka tenna dingin ka bawla, huan theihna leh theihkakna ka mu hi.

¹³Toupa kihtak gilou huat ding ahi; kisaktheihna leh, kiotsakna leh, gilou lampi leh kam hoihlou, ka hua hi.

¹⁴Thupha keia ahi, theihna hoih: theihsiamna ka neia; hatna ka nei.

¹⁵Kei jiakin kumpipaten vai a hawm ua, lalten dikna thu a pia uh.

¹⁶Kei jiakin lalten vai a hawm ua, milianten, leia vaihawmte tengtengin.

¹⁷Kei honitte amau ka ita; thanuam taka honzongten honmu ding uh.

¹⁸Hauhsakna leh zahtakna ka kiangah a om; ahi, hauhsakna leh diktatna pangsawtte.

¹⁹Ka gah dangkaeng sangin a hoihjaw, ahi, dangkaeng hoih sangin; ka sum muhna dangka hoihpen sangin.

²⁰Diktatna lampi ka juia, vaihawmna lampite lakah:

²¹Kei honitte van ka luahsak theiha, a goubawmte uh ka dimsak theihna dingin.

²²Toupan a lampi kipattungin a honneia, nidanga a thilhihte main.

²³Khantawna kipan, a tunga kipan ahihkeileh lei om maa kipan koih kip ka hi.

²⁴Thuknate a om louh laiin, lak khiakin ka oma; luikhuk tuia dimte a om loh lai un.

²⁵Mualte a omkip main, tangte om main lak khiakin ka om:

²⁶Lei hiam, gamte hiam, ahihkeileh khovel leivui kipatna a bawl nai louh laiin.

²⁷Vante a hihkip laiin, huaiah ka om: tui thuk maikaiha bemvilvel a koih laiin:

²⁸Tunga vante a bawl kip laiin: tui thukte tuikhukte a honghat lai un:

²⁹Tuipi kianga a gi a piak laiin, huchia tuiten a thupiak tunga a tatlek louhna ding un: lei suangphumte achiamteh laiin:

³⁰Huailaiin a kiangah ka om, nasemmi heutu bangin: huan nitengin a kipahna ka hi a, a maa kipak gigein;

³¹A tentheihna leiah; huan ka kipahna mite tapate kiangah a om hi.

³²Huaijiakin tuin, ka tapate, hon ngaikhia unla: ka lampite jui miten nuam a sa ngal ua.

³³Hilhna ja unla, pil un, huai tuh deilou kei un.

³⁴Mi kei honjain nuam a sa hi, ka kongpia niteng vangin, ka kongkhakte khuamtea ngakin.

³⁵Kuapeuh honmuin hinna a mu un, Toupa deihsakna tang ding ahi ngal ua.Himahleh kuapeuh ka tunga thilhihkhialin amah kha a hihdik kei hi: kei honhuaten sihna a it uhi.

³⁶Himahleh kuapeuh ka tunga thilhihkhialin amah kha a hihdik kei hi: kei honhuaten sihna a it uhi.