Read Paite Song of Solomon 1 Bible Online

Song of Solomon 1 - Paite bible

Song of Solomon 1

¹Late la, Solomon-a.

²Na kam tawpnatein hontawp lechin aw! na itna lah uain sangin a hoihzo ngala.

³Na kinuhten gimlim hoihtak a neia; na min kinuh butkhiak bang ahia; huaijiakin nungaksiangthouten nang honit uh.

⁴Honkaiin; nang kon deih ding uh: kumpipan a dantante sungah a hongpitaa: nang ah ka kipak un nuam ka sa ding uh, uain sangin na itna ka genkhe mun zo ding ua: diktakin nang a honit uh.

⁵Ka voma, himahleh ka mel a hoih, Aw nou Jerusalem tanute, Kedar puaninte bang, Solomon puankhaite bang.

⁶Ka vomjiakin hon en ken, niin a honhai jiakin. Ka nu tapate ka tungah a thangpai ua, grephuante kemin a honbawl ua; himahleh kei mah grephuan leng ka kem kei.

⁷Hon hilh ve, Aw nang ka khain a it, na gan honvakna mun, sunlaia na khawlsakna mun: bang dinga na kithuahpihte laka ganhon kianga maituam banga kei om ding ka hia?

⁸Na theih kei leh, Aw nang numeite laka kilawmpen, ganhonte khapte juiin kuan khia inla, belamchingte puanin kiangah na kelnoute vakin.

⁹Aw ka it, Pharo kangtalaite laka sakol toh ka honteha.

¹⁰Na biangte samphekte toh a kilawm a, na ngawng suangmantam khite toh.

¹¹Dangkaeng samphekte dangka siatte toh ka honbawl sak ding uh.

¹²Kumpipa a dohkana a tut laiin, ka spiknardi gimlimin a namtuina a sawl khia.

¹³Ka ngaihnou kei dingin murra gimlim bang ahia, ka nawite kikal a om.

¹⁴Ka ngaihnou kei dingin En-gedi grephuante a henna-pak hom bang ahi.

¹⁵Ngaiin, na kilawm, ka it; ngaiin, na kilawm; na mitte vahui bang ahi uh.

¹⁶Ngaiin, na kilawm ka ngaihnou, ahi, a nuam: i tutnanem leng a hing.I in inkamte sidar ahia, i insunte meilah ahi.

¹⁷I in inkamte sidar ahia, i insunte meilah ahi.