Read Paite Lamentations 3 Bible Online

Lamentations 3 - Paite bible

Lamentations 3

¹A hehna chianga gimthuakna mu mipa ka hi.

²Khovak ah hilouin khovela aman a honpi a, a honvak sak.

³Ni tumtumin ka siatna dingin a khut a hei ahei petmah hi.

⁴Ka sa leh ka vun a upa saka; ka guhte a kitansak.

⁵Ka siatna dingin a lama, khatna leh nauveinain a honum suak hia.

⁶Sawtpia sisate bangin, mun mialte ah a honteng saka.

⁷Ka pawt khiak theihlouhna dingin, ka kimvelin dai a kaia, ka khainiang a gik hi.

⁸A hi, ka kaha, panpihna ka nget laiin, ka thumna a daltan.

⁹Suang sekin ka lampite dai a kaitou peka, ka lam zuihte a kawisak hi.

¹⁰Kei dingin amah vompi mibuk bang, mun guka humpinelkai bang ahi.

¹¹Ka lampite a kaiheia, a honbot nena; a hon bawlgawp hi.

¹²A thalpeu a laia, a thal adia ngimding bangin kei a honbawl.

¹³A thalbawma thalte ka sisan guijamah a lut saka.

¹⁴Ka mite tengteng nuihsat ka honghia; ni tumtuma a la uh.

¹⁵Hehnain a hondim sak ua, gamsaiin a honvak.

¹⁶Suang tangin ka hate leng a kitamsak a, vutin a hontuam hi.

¹⁷Muanna akipan gamla piah ka kha na suana; hauhsakna ka mangngilhta.

¹⁸Ka hatna a manga, TOUPA akipan ka lametna, ka chi a.

¹⁹Ka gimthuakna leh ka haksatna, gamsai leh khatna theigigein.

²⁰Ka khain amaute a theigige lailaia ka sungah a kun ngiungiau hi.

²¹Hiai ka thei thaka, huaijiakin lametna ka nei.

²²TOUPA chitnate jiak ahi hihmanga i om louhna uh, lainatnate a juau ngei louh jiakin.

²³Jingsang tengin a thak jel ua; na ginomna a thupi.

²⁴TOUPA ka tantuan ahi, ka khain a chi; huaijiakin amah lametna ka nei ding.

²⁵Amah ngakte kiangah TOUPA a hoih, amah zong mi tungah.

²⁶Min TOUPA hotdamna a lameta a ngak vengveng a hoih hi.

²⁷Min a tuailaia hakkol a puak amaha dingin a hoih ahi.

²⁸Amah tunga a ngaktak jiakin, tangtut henla, dai sipsip hen.

²⁹Leivui ah a kam koih hen; huchia lametna a om theihna dingin.

³⁰Amah bengpa kiangah a biang doh hen; kounain amah dim vum hen.

³¹TOUPAN lah khantawnin a delh kei dinga.

³²Dahna suak sak mahleh, a chitna tamdan dungjuiin lainatna a nei ding ahi ngala.

³³Kilawptakin mite tate a hihgim hiam a lungkham sak lah ahi ngal kei a.

³⁴Leia suangkulh tangte tengteng khenuai sik kham ding.

³⁵Tungnung Pen mai maa mihing thuneihna kai hei ding.

³⁶A thu mihing bawlsiat, TOUPAN pha a sa kei.

³⁷TOUPAN thu a piak louhin, hichi a honghi, chi kua ahia?

³⁸Tungnung Pen kama kipanin hoih lou leh hoih a hongpai kei maw/

³⁹Bangdinga mihing, a khelhna gawtna a dinga mi, phun ahia?

⁴⁰I lampite zongin enchain ni, TOUPA lamah kik nawn ni.

⁴¹Vantea Pathian kiangah I lungtang uh I khutte uh lik tou ni:

⁴²Ka tatlek ua ka hel uh; na ngaidam kei hi.

⁴³Hehnain na khuha kou non delha; na thata, na hehpih kei.

⁴⁴Meipiin na kituama, huchia ka thumnain a pailet louhna dingin.

⁴⁵Mite lakah deihlouh leh ninneng bangin na honbawla.

⁴⁶Ka siatna dingin ka melmate tengteng un a kam uh lianpiin a ka uh.

⁴⁷Launa leh kokhuk ka tunguah a hongtunga, siatgawpna leh siatna.

⁴⁸Ka mite tanu suksiatna jiakin, ka mit tuiin a tum hi.

⁴⁹Khawllouin, ka mitin a buaka, a khawl kei hi.

⁵⁰Vana kipana TOUPAN a et suka, muh ma tan

⁵¹Ka khopi tanute tengteng jiakin ka mitin ka kha a dah sak.

⁵²Vasa bangin hondelh bah ua, ajiak beia ka melma hiten.

⁵³Leikohawm sungah ka hinna a sat tat ua, ka tungah suang a khia uh.

⁵⁴Ka lutung ah tuite a luanga; sat khiakin ka om, ka chi hi.

⁵⁵Aw TOUPA, leikohawm niampen akipanin, na min ka sam hi.

⁵⁶Ka aw na jaa; ka kahna ah, ka nakna ah na bil sel ken.

⁵⁷Nang ka honsap niin nong pai naia: Lau ken, na chi hi.

⁵⁸Aw TOUPA, ka kha thu na hon gen saka; ka hinna na tanta.

⁵⁹Aw TOUPA, ka diklouhna na mu a, ka thu ngaihtuahin.

⁶⁰Ka tunga a phulakna tengteng uh leh a thusawm tengteng uh na muta hi.

⁶¹A kouna uh na jaa, Aw TOUPA, ka siatna dinga a thusawm tengteng uh;

⁶²Ka siatna dinga ding te mukte leh, ni tumtuma ka siatna dinga a ngaihtuahna uh.

⁶³a tu uh leh a din touh uh nang enin; a la uh ka hi.

⁶⁴Aw TOUPA, a khut nasep uh dungjuiin, amau tungah thukna na pe ding hi.

⁶⁵Lungtang sakna amau na pe ding a, a tung ua na hamsia.Hehin amau na delh dinga TOUPA vante nuaia kipan amaute na hihgawp ding.

⁶⁶Hehin amau na delh dinga TOUPA vante nuaia kipan amaute na hihgawp ding.