Read Paite Mark 15 Bible Online

Mark 15 - Paite bible

Mark 15

¹Huan, jingsang a honghihtakin, siampu liante tuh upate leh laigelhmite leh vaihawmte tengteng toh a kihou ua, Jesu a hen ua, a pi ua, Pilat kiangah a pe pah ngal uhi.

²Huan, Pilatin a kiangah, Judate Kumpipa na hi hia, chiin a donga. Huan, aman a kiangah, Hi e, chiin, a dawng a.

³Huan, siampu lianten thu tampiin a hek ua.

⁴Huchiin, Pilatin a dong nawna, a kiangah, Bangmaha dawng lou maw? Ngai tanla, a honhek na uh tamdan! a chi a.

⁵Jesun bel bangmahin a dawngta keia; huchiin Pilatin lamdang a sa mahmah.

⁶Huan, Pilatin ankuanglui nin mi henta khat a nget peuhmah uh a pawtsak jel a.

⁷Huan, mi khat, Barabba a chih uh, a helte lakah hensain a oma, huaiten tuh helna ah tual a that uh.

⁸Huan, mipite a vahohtou ua, amau adinga a hihsak jel banga hihsak dingin a ngen ua.

⁹Huan, Pilatin a dawnga, a kiang uah, Judate Kumpipa honkhahsak leng na ut u hia? a chi a.

¹⁰Siampu lianten hajat mana a honpaipih uh ahi chih a thei ngala.

¹¹Himahleh, siampu lianten mipite tuh Barabba pawt sak jawk ngen dingin a hasuan ua.

¹²Huan, Pilatin a kiang uah, Judate Kumpipa a chih uh bang ka loh tadia le? chiin, a dong nawn a.

¹³Huan, amau, Kros ah kilhden in, chiin, a kikou nawn ua.

¹⁴Huan, Pilatin a kiang uah, Bang din maw? Bang a hihkhiala ahia? a chi a. Himahleh amau tuh, Kros ah kilhden in, chiin, a kikou semsem ua.

¹⁵Huchiin, Pilatin mipite hihlungkim a uta, Barabba tuh a pawt sakta; huan, Jesu tuh a vuak zohin krosa kilhden dingin a peta hi.

¹⁶Huan, sepaihten inhuangsung kong lai, Praitoriam a chih uah, amah a pilut ua, a pawl ua mi tengteng a sam khawm uh.

¹⁷Huchiin puansan dup a silhsak ua, ling lukhu a gan ua, a khusak uh.

¹⁸Huan, Chibai, Judate Kumpipa! chiin, chibai a bukta uh.

¹⁹Huan, a lu ah sialluangin a khen ua, chil a siat ua, khukdin in chibai a buk uh.

²⁰Huan, nuihza baawlnaa a zat zoh un, puan san dup tuh a hawk ua, amah puan a silh sak nawn ua, krosa kilhden dingin a a pi kheta uh.

²¹Huan, mi vialvak khat, a gamlama kipana hongpai, a kros po dingin a man ua Simon Kurini khua a, Aleksandar leh Rufasi pa tuh.

²²Huan, Jesu tuh Golgotha munah a pi ua, huai tuh Lu Guh mun, chihna ahi.

²³Huan, uain murra toh hel a pia ua, himahleh a sang nuam kei hi.

²⁴Huan, kros ah a kilhden ua, a tan ding chiat uh theihna dingin aisanin a puansilhte tuh a kihawm uh.

²⁵Huan a kilhden uh tuh dak thumna khawng ahi a.

²⁶Huan, a hekna lai a tunglamah a gelh ua, JUDATE KUMPIPA, chiin.

²⁷Huan, suamhat nih amah toh a kilhden sam ua, a taklamah khat, a veilamah khat.

²⁸Huan, Laisiangthou, Huchiin amah tuh talekte toh simkhawm a hita, chih genna hihtangtunin a omta hi.

²⁹Huan, mi kivialleh peuhin a lu uh singin, Ehe! Nang Pathian biakin susiaa ni thuma lam nawnpa,

³⁰Kihihhing inla, kros a kipan hongkum in, chiin a enghou ua.

³¹Huchi bangmahin siampu lianten, laigelhmite toh, amau laka enghouin, midang bawn hihhinga, amah kihihhing theilou bang.

³²I muh a, i gintak theihna dingin, Kris, Israel Kumpipa, tuin krosa kipan hongkum leh ake, a chi ua. Huan, amah toh a kilhden samte un leng amah a enghou ua.

³³Huan, dak gukna a honghihin, dak kuana dongin gam pumpi ah mialna a hongomta a.

³⁴Huan, dak kuana khawng dingin Jesu tuh aw ngaihtakin, Eloi, Eloi, lama sabakthani? chiin a kikou khiaa, huai tuh, Ka Pathian, ka Pathian, bangdia honpaisan? chihna ahi.

³⁵Huan, a kianga ding khenkhatten huai a jak un, Ngai un, Elija a sam, a chi ua.

³⁶Huan, mi khat a taia, spanji uain thuka diah dimin, chiangah a taka, a dawn tou saka. Khawl dih ua, amah la khe dingin Elija a hong hiam i en ding uh, a chi a.

³⁷Huan, Jesu tuh aw ngaihtakin a kikou a, a kha a khahta hi.

³⁸Huan, Pathian biakin puanjak tuh a tunglam akipanin a nuailam phain a hongkikek paisuakta.

³⁹Huan, a ma jawna sepaih zaheutupa dingin a kha huchibanga a khah a muhin, Hiai mi Pathian Tapa ahi ngeingei, a chi a.

⁴⁰Huan, numeite leng gamla taka enin a om ua; huaite lakah Mari Magdalini, Mari Jakob naupangjaw leh Jose nu, Salomi leng a pang ua;

⁴¹Huaite tuh Galili gama a om laia, amah juia, a nasepsak jelte ahi uh; huan, numei dang tampi Jerusalem khuaa amah toh hohtou samte leng a om uh.

⁴²Huan, nitaklam a honghihin Kiginni a hih jiakin, huai tuh Khawlni maa ni ahi,

⁴³Joseph, Arimathai khua a mi, vaihawmpa zahtakhuai, Pathian gam lamen sam mi, a honga, hangtakin Pilat kiangah a luta, Jesu luang a ngenta a.

⁴⁴Huchiin, Pilatin huchibanga a si pah tuh lamdang a sa mahmah a, huchiin sepaih zaheutupa samin, a sihna a sawtta hiam chih a dong a

⁴⁵Huan, sepaih zaheutupa kama a sita chih a theihin, a luang Joseph kiangah a pia a.

⁴⁶Huan, aman tuh puan malngat a leia, amah a la khia a, puan malngatin a tuama, han khuakkuak ah a siala, han kong suangin a delhta a.Huan, Mari Magdalini leh Jose nu Mariin a sialna tuh a mu uh.

⁴⁷Huan, Mari Magdalini leh Jose nu Mariin a sialna tuh a mu uh.