Read Paite Luke 1 Bible Online

Luke 1 - Paite bible

Luke 1

¹Huai thilte i lak ua takpetpeta gina om, mi tampiin a thu gelh ana tup uh,

²A tunga pata a mute leh thu nasemten honhilh bang un,

³Theophil aw, a bul apat bangkim chiantakin ka suia, kizom jelin nanga dingin kigelh leh a hoih ding, ka chi ahi;

⁴tumaa thu nang honhilh uh a dik ngelngel hi chih na theihna dingin.

⁵Judia gam kumpipa Herod a dam laiin, Abija pawla mi a min Zakaria khat a om a; huaiin Aron tanute laka khat jiin a neia, a min tuh Elizabet ahi.

⁶A nih un Pathian mitmuhin diktatin a om ua, gensiat beiin Toupa thupiak leh a dan tengteng juiin a omjel ua.

⁷Himahleh Elizabet a chin jiakin ta a neikei ua, a nih un upa pitak ahi tuak ngal ua.

⁸Huan, hichibang ahi a, a pawlte hihdan bang jela Pathian maa siampua a gamtat laiin,

⁹siampu dan bangin Toupa biakina lut leh gimlim hal tuh a tan ahi a.

¹⁰Huan, gimlim hal hun laiin mipite a vek un inpua ah a na thum ua.

¹¹Huan, Toupa angel khat gimlim halna maitam taklama dingin a kiangah a kilak a.

¹²Huan, Zakariain a muh takin a lungjinga, lau leng a lau a.

¹³Himahleh angelin a kiangah, Zakaria, lau ken, na nget jaka a om jiakin, na ji Elizabet in tapa a honneihsak dia, a min Johan na sak ding ahi.

¹⁴Huan, nang na nuamin na kipak dinga; amah a suahin mi tampi a kipak ding uh.

¹⁵Toupa ngaihin mi lian ahi dia, uain leh ju himhim a dawn kei ding; a nu sung apat himin Kha Siangthouin a hongdim ding.

¹⁶Israel suante tampi Toupa a Pathian lam uh a ngasak nawn ding a.

¹⁷Huan, pate lungtang tate lam ngasak ding, mi chihmohte mi diktat pilna lam ngasak ding, Toupa dinga mi pite mansaa om sak dinga na bawl khol dingin Elija lungsim leh thilhihtheihna puin Toupa ma ah a pai ding. a chi hi.

¹⁸Huan, Zakariain angel kiangah, Huai bangchin ka thei dia? kei putek hi inga, ka ji leng pitek ahi ngala, a chi a.

¹⁹Huan, angelin a dawnga, a kiangah, Gabriel, Pathian maa ding jel ka hia; nang houpih ding leh, huai thu hoih honhilh dinga sawl ka hi.

²⁰Ngaiin, ka thugente a huntaka hongtung ding, na gintak louh jiakin huai thilte a hongtun masiah na dai dide dia, pau leng na pau theikei ding, a chi a.

²¹Huan, vantang in Zakaria a nangak ua, Pathian biakin sunga a om sawt jiakin lamdang a sa mahmah ua.

²²Huan, a hongpawtin a kiang uah thu a gen theita kei a; huchiin, biakin ah kha kilak a mu ahi chih a theita ua; huan, a kiang uah chiamtehna te a bawl a, pau theilouin a om lailai hi.

²³Huan, hichi ahi a, a nasepna ni a kim takin a in ah a paita a.

²⁴Huan, tua nite nungin, a ji Elizabet tuh a honggaita a, kha nga a buta a,

²⁵Mi laka ka min se khuhna dingin, Toupan a honmuhin, hichibangin ka tungah a hihta, chiin.

²⁶Huan, a kha gukna ah Pathianin angel Gabriel, Galili gama khua khat Nazaret a chih uah,

²⁷nungak siangthou khat kiangah a sawla, huai nungak tuh David suan mikhat a min Joseph toh ki kham ahi ua; nungak min tuh Mari ahi.

²⁸Huan, angel tuh a kiangah a luta, Chibai, nang nakpitaka deihtuam: Toupa na kiangah a om, a chi a.

²⁹Huan, huai thu jiakin a lunghimoh mahmaha, Bangchidana chibai honbuk a diam aw? chiin, a kingaihtuaha.

³⁰Huan, angelin a kiangah, Mari, lau ken; Pathian lakah deihsakna na tang hi.

³¹Ngai in, na gai dia, tapa na nei dia, a min din Jesu na sa ding ahi.

³²Amah mi lian a honghi dinga, Tungnungpen Tapa a chi ding uh; Toupa Pathianin a kiangah a pu David tutphah a pe dia.

³³Jakob suante tungah khantawnin a lal dia, a gam in bei ni a neikei ding hi, a chi a.

³⁴Huan, Mariin angel kiangah, Hiai bangchin ahi dia? pasal lah neilou inga, a chi a.

³⁵Huan, angelin a dawnga, a kiang ah, Kha Siangthou na tungah a hongtung dinga, Tungnungpen thilhihtheihnain a honliah khum ding, huai jiakin misiangthou hongpiang ding leng, siangthou Pathian Tapa, chihin a om ding, a chi a.

³⁶Huan, ngaiin, na sanggamnu Elizabetin leng a tek nungin tapa a paita; a ching a chihchih uh, tu kha a kha gukna a hita.

³⁷Pathian thu pawt himhim thil hih theilouin a om kei ding, a chi a.

³⁸Huan, Mariin, Ngai in, Toupa sikhanu ka hi, na thu bang jelin ka tungah tung hen, a chi a. Huan, angelin a paisanta.

³⁹Huai laiin Mari a thou a, singtangah, Judia gama khua khat ah a hoh paha;

⁴⁰Huan, Zakaria in ah a luta, Elizabet chibai a buk a.

⁴¹Huan, hichi ahia, Elizabetin Mari chibai buk a jak takin, a sung a naungek a tanga; huan, Elizabet tuh Kha Siangthouin a hongdimta; huan, aw ngaihtakin a kikou a,

⁴²Nang numei sapsap din na hampha hi, na gil gah leng a hampha hi.

⁴³Ka Toupa nu ka kianga na hong bangchidan ahia oi?

⁴⁴Ngai in, non chibai buk husa ka bila a lut takin, a kipah jiakin naungek ka sungah a tang ahi.

⁴⁵A gingnu a hampha hi, a kianga Toupan thu a gen tuh tung ding a hih jiakin, a chi a.

⁴⁶Huan, Mariin, Ka nuntaknain Toupa a pahtawi e,

⁴⁷Ka kha leng ka Hondampa Pathian tungah a kipak mahmaha.

⁴⁸A sikhanu nam tom dan a mu a, a hehpiha; ngai in, tu nung siah khangthak tengtengin hampha honchi ding uh.

⁴⁹Amah Mi hatin ka tungah thil thupi tak honhih saka, a min leng a siangthou hi.

⁵⁰A laudansiamte tuh khangthak tanin a hehpih jeljel.

⁵¹A banin a tha hatdan a ensaka, mi kisatheite tuh a lungtang gelna a hihdalhta.

⁵²A laltutphah ua lal tute a kai khia a, nam tomte tuh a pahtawita a.

⁵³Gilkial te thil hoihin a hihvah a, mihaute khut vuakin a pai mang sakta hi.

⁵⁴A sikha Israel taksap awng tuh a huta, a zahngaihna theihgigena dingin.

⁵⁵I pipute kianga a gen bangin khantawin Abraham leh a suante lamah.

⁵⁶Huan, Mari kha thum khawng a kiang ah a oma, huan, a in lamah a pai nawnta.

⁵⁷Huan, Elizabet nau suah a honghunta a; huchiin tapa a honneita a.

⁵⁸Huan, a vengte leh a sanggamten Toupan a hehpih mahmah chih a na ja ua, a kipahpih uh.

⁵⁹Huan, hichi ahia, a ni giat nin naungek zeksum dingin a hong ua; a min din a pa min mah Zakaria sak a tum ua.

⁶⁰Huan, a nun, Hi lou e, amah jaw Johan sak jawk ding ahi, a chi a, a dawng a.

⁶¹Huan, a nu kiangah, Na sanggamte lakah hiai min pu kuamah a om sam ua, a chi ua.

⁶²Huan, a pa kiangah chiamtehnate bawlin, A min din bang sa lehang na deih a? a chi ua.

⁶³Huan, lai gelhnapek a ngena, A min Johan ahi, chiin a gelh a.

⁶⁴Huan, a vek un lamdang a sa mahmah uh. Huan, thakhatin a kam hongkihongin a lei a hongkiphel a, Pathian phatin a hongpau kheta a.

⁶⁵Huan, a kim ua omte tengtengin a lau ta ua; Huchiin, huai thute tuh Judia gam singtang tengtengah a thang ta a.

⁶⁶Huan, a za peuhmahin, a lungtang un a vei chiat ua, Huai naungek bangchi phet a honghi de aw? chiin. Huan, Toupa khutin amah a panpih ngala.

⁶⁷Huan, a pa Zakaria tuh, Kha Siangthouin a hongdima, a genkhol a,

⁶⁸Toupa, Israel Pathian, phatin om hen, a mite a honveha, tatna a siamsak a.

⁶⁹A sikha David inkuanpihte lakah hotdamna ki a honbawlsaktak jiakin;

⁷⁰Tang laia kipan a jawlnei siangthoute kama, a gen bangin.

⁷¹I doute lakah leh honhote tengteng laka hotdam-a i om ding thu,

⁷²I pipute kianga achiam zahngaihna tangtungsak dingin leh a thukhun siangthou theigige dingin.

⁷³I pu Abraham kianga a kichiam a.

⁷⁴I doute laka a honbit saka, lau loua a na i sepna ding.

⁷⁵I dam sung teng a mit muha siangthou leh diktat taka omna dingin.

⁷⁶A hi, Bawi, nang jaw Tungnungpen jawlnei a honchi ding ua; a lampi khawng bawl dingin Toupa maah na pai ding ahi ngala.

⁷⁷A khelhnate uh ngaihdamna dia a mite kianga hotdamna theihna pe ding in.

⁷⁸I Pathian lungtanga hehpihna jiakin, huchia tunglam akipan i tunga ni a tan chianga.

⁷⁹Mial laka leh sihna lima tute tanvak ding leh khamuanna lampia i khete kalsuan sak dingin, a chi a.Huan, naungek tuh a hongkhang lian deuhdeuha, a kha lam a honghat hiaihiai a, Israelte kianga a hongkilak masiah gamdai ah a om gige.

⁸⁰Huan, naungek tuh a hongkhang lian deuhdeuha, a kha lam a honghat hiaihiai a, Israelte kianga a hongkilak masiah gamdai ah a om gige.