Read Paite 1 Corinthians 16 Bible Online

1 Corinthians 16 - Paite bible

1 Corinthians 16

¹Huan, mi siangthoute adia thohlawm thu jaw, Galatia gama saptuam pawlte kianga thu ka piak bangin nou leng na hih sam un.

²Ni sagih ni masapenin mi chihin, vualjawlna na muh bang jel un koih khol chiat unla; ka hong chianga thohlawm lakkhawm himhim a om louhna dingin.

³Huan, na hehpih thilpiak uh Jerusalem khuaa hohpih dingin ka hongtun chiangin kuapeuh hoih na chih ua lai na piak uh ka sawl ding hi.

⁴Huan, ka hohna dinga kilawm a hihleh houh, kei toh a hoh ding uhi.

⁵Huan, Masidonia gam ka tot suah khit chiangin na kiang uah ka hong dinga; Masidonia gam lah ka tuan suak himhim dia.

⁶Nou kiangah ka tam nilouh kha thei hi, phalbi suang teng houh ahi khamaide, koi peuha ka hohna ding ah nouten non khak theihna ding un.

⁷Tua pai kawm lela honmuh malam ka ut keia, Toupan lem a sak leh na kiang ua sawltsim tam ka lamen ngala.

⁸Himahleh Pentikost tanin Ephesa khua ah na tam nilouh ding hi,

⁹Kong lianpi, phatuampi sepna ding keia din a kihong ngala; huan, doumite leng tampi a om uhi.

¹⁰Huan, Timothi a hongtun leh lauthawng loua na kiang ua a omna dingin pilvang un; ken ka sep bangmahin Toupa na a sem ngala.

¹¹Huaijiakin, kuamahin musit kei uhen; ka kianga a hong theihna dingin khamuang takin khajaw unla; unaute toh amah na muh ka lamen ngala.

¹²I unau Apollo thu jaw, unaute toh na kiang ua hong dingin ka chial ngial hi, himahleh, tun jaw hong a ut het keia; a lemtan hun chiangin a hong ding hi.

¹³Kiveng unla, ginna ah ding kip unla, kihihhang unla, hat takin om un.

¹⁴Na hih peuhmah uh itnaa hih hi vek hen.

¹⁵Unaute aw, Stephena inkuanpihte jaw Akhaia gama gingta makaite ahi ua, mi siangthoute na sem dingin a kipia uh chih na thei uhi;

¹⁶Huchibang mite kiangah leh, na sepa panpih leh, semgim peuhte kianga lut dingin kon hasuan ahi.

¹⁷Huan, Stephena te, Fortunate te, Akaika te, a hong ujaw, ka kipak ahi, na om louh uleng kithei loua honbawl jiak un.

¹⁸Amau ka lungsim leh na lungsim uh honhihhalh ngal ua, hichibang mite jaw kipahpih un.

¹⁹Asia gama saptuam pawlten chibai a honbuk uhi. Akuila leh Priskilla, a in ua saptuam kikhawmte toh in Toupa ah chibai tampiin honbuk uhi.

²⁰Unau tengtengin chibai a honbuk uhi. Tawp siangthouin chibai kibuk chiat un.

²¹Kei Paula in hiai chibai bukna keimah khut mahmaha ka gelh ahi.

²²Kuapeuhin Toupa a it keileh hamse thuakin om hen. I Toupa a hongpai hi.

²³Toupa Jesu Kris hehpihna na kiang uah om hen.Kris Jesua ka itna na vek ua lak ah om hen. Amen.

²⁴Kris Jesua ka itna na vek ua lak ah om hen. Amen.