Read Paite Ephesians 3 Bible Online

Ephesians 3 - Paite bible

Ephesians 3

¹Huchi a hih jiakin, kei Paula, nou Jentelte jiaka Kris Jesu hentain,

²Nou adinga Pathian hehpihna kepna na a honpiak lam na theita ngei ding ua;

³Huchia thuguk ka kianga theihsaka a omdan, tumaa tom chika ka gelh bangin.

⁴Huaia na sim un Kris thuguk ka theihdan na theithei ding uhi.

⁵Huaituh tulaia a sawltak siangthoute leh a jawlnei siangthoute kiangah Kha theihsakin a omta bangin, tumalamin leng mihing tate kiangah theihsakin a om ngei kei hi;

⁶Huaituh hiai ahi, Tanchin Hoih jiakin Kris Jesu ah, Jentelte gouluahpihte, pumpi hiangte, thuchiam tanpihte ahi uhi.

⁷A thilhihtheihna sepdan banga, a thawna piak Pathian hehpihna tuh a honpiak bang jelin huai tanchin hoih nasemtu dinga bawl ka hi.

⁸Kei, misiangthou tengtenga neupen sanga neujaw kiangah hiai hehpihna piak ahi: Kris hauhsakna suikhiak vuallouh Jentelte kiangah gen dingin;

⁹Huan, Pathian thil bangkim siampaa tangtawna sela naom, thuguk thilseh tuh bang ahia chih mi tengteng musak dingin;

¹⁰Huchia, Pathian pilna chiteng tuh vanmun khawnga lalnate leh thuneihnate kianga, saptuamte zanga, tu huna theihsak ahihna dingin;

¹¹Hiai tuh tangtawn thiltup, Toupa Jesu Kris Jesua a tup leh sep dan ahi.

¹²Huai Kris Jesu i gin jiakin amahmahah maingalna leh hangtaka lut theihna i nei hi.

¹³Huchiin, noute jiaka ka gimthuak jiakin lungkelou dingin ka honngen hi, huaite tuh na thupina uh ahi.

¹⁴Huai jiakin Pa maah ka khukdin jela;

¹⁵Lei leh vana inkuan chiteng min phuah khiakna pa,

¹⁶A thupina hauhdan bang jela, a Kha jiaka mihing sung lama thilhihtheihnaa hihhata a honom sak theihna dingin,

¹⁷Huan, Kris ginna jiaka na lungtang ua a ten theihna dingin, nou itnaa zungkai leh kingakna neia omin,

¹⁸Misiangthou tengteng toh a zatdan, a saudan, a sandan, leh a thukdan khawng theih chian theihna leh,

¹⁹Kris itna theih phaklouh, Pathian tangchinna chitengteng banga hihdima na om theihna ding un.

²⁰Huan, eimaha sem jel thilhihtheihna bangin, i nget leh i ngaihtuah tengteng sanga thupi zo tham hih theipa kiang ngeiah,Khantawnin suan tengteng tanin, saptuam te leh Kris Jesu ah thupina om hen. Amen.

²¹Khantawnin suan tengteng tanin, saptuam te leh Kris Jesu ah thupina om hen. Amen.