Read Paite Ephesians 6 Bible Online

Ephesians 6 - Paite bible

Ephesians 6

¹Naupangte aw, Toupa ah na nute uleh na pate uh thu mang un: huai tuh thil dik ahi ngala.

²Na nu leh na pa zahtak in, (hiai tuh thupiak chiam nei masapen a hi),

³Huchiin nang adingin a hoih dia, lei ah leng na dam sawt ding hi.

⁴Huan, nou pate aw, na tate uh hihthangpai kei unla, Toupa thuzohna ah leh hilhna ah kem jaw un.

⁵Sikhate aw, Kris thumang bangin laudansiam leh linga lungtang khatin sa dana na pute uh thu mang un:

⁶Mihing hihkipakte maimah banga mitmei kia veng louin, Kris sikha banga lungtanga Pathian deihlam hih jawin,

⁷Mihing nasem phet hi louin, Toupa nasem bang jawa chitaktak kawma nasemin,

⁸Mi chihin thil hoih a hih chiat peuhmah uh Toupa kianga kipanin a ngei mah a mu nawn ding uh chih theiin, bawi hiam, bawi louin hiam himahleh.

⁹Huan, nou heutute aw, huchimahbangin, amau leh noumau Heutupa tuh van ah a om chih leh, aman mi deihsak tuam a neikei chih theiin vau louin a tunguah hih sam un.

¹⁰A tawppenin, Toupa ah leh a hatna thagui ah thilhihtheihna neiin hongom un.

¹¹Diabol zekhemnate na dou zoh theihna ding un Pathian galvan kimin kivan un.

¹²I doute jaw sa leh sisan ahi ngal kei ua, lalnate leh, thuneihna te leh, tu -a omlel mial tunga khovel vaihawmte leh, van mun khawnga kha gilouhon omte ahi jaw uhi.

¹³Huaijiakin, ni hoih loua na dou zohna ding un leh na hihzoh vek nung ua leng na din theihna ding un, Pathian galvan kim la un.

¹⁴Huan, na kawng uh thutaka gakin, diktatna awmphaw zangin,

¹⁵Lemna tanchin hoih vanzat tuh na khe ua bunin ding un:

¹⁶Huaite ban ah ginna lum la unla, huaiin mi gilou thal kuangthei tengteng na hihmit thei ding uhi.

¹⁷Huan, hotdamna lukhu leh Kha namsau, Pathian thu la unla.

¹⁸Thumna leh ngetna chitengin bangchik laipeuhin leng Khaah thum un. Huailam pangah tuh misiangthou tengteng adingin phatuamngai leh ngen bilbelin limsak un;

¹⁹Tanchin hoih thuguk hangsan taka theisak dinga, ka kam ka kata thugen saka ka om theihna dingin kei dingin leng honnget sak un.

²⁰Ka gen ding bang hangsan taka ka gen theihna dingin. Huai tanchin hoih palai khainiang bun ka hi.

²¹Himahleh, nou leng bangchibanga ka om, ka tanchin na theihtheihna ding un, Taikika, Toupaa unau deihtak leh nasempa muanhuaiin bangkim a honthei sak ding.

²²Huaijiakin amah na kiang uah ka honsawl ahi, ka tanchin uh na theihna ding uh leh, aman na lungtang uh a khamuan sak theihna dingin.

²³Pa Pathian leh Toupa Jesu kris kianga kipan lemna leh ginna tel itna unaute kiangah om hen.I Toupa Jesu Kris tul loua itte tengteng kiangah hehpihna om hen. Amen.

²⁴I Toupa Jesu Kris tul loua itte tengteng kiangah hehpihna om hen. Amen.