Read Paite 1 Thessalonians 5 Bible Online

1 Thessalonians 5 - Paite bible

1 Thessalonians 5

¹Ahihhangin, unaute aw, a hun leh a ni lam thute himhim gelh sak na kiphamoh kei uhi.

²Toupa ni tuh jana guta bangin a hongtung ding chih noumau ngeiin chiantakin na thei ngal ua,

³Muanna leh bitna, chia a gen lai tak un numei nauvei bangin thakhatin manthatna a tunguah a tung dinga, a suakta kei hial ding uhi.

⁴Himahleh, unaute aw, nou jaw, huai niin guta banga a honbingphawn dingin mialah na om kei uh;

⁵Vak tate leh sun tate na hi vek ngal ua; jana mi i hi kei ua, miala mi leng i hi sam kei hi.

⁶Huai jiakin, midang te bangin i ihmu kei ding uh, hak niin, limsak jaw ni.

⁷Ihmute tuh janah ahi a ihmut uh; zukhamte leng janin ahi a kham uh.

⁸Himahleh, ei bel suna mi i hih jiakin, ginna leh itna lum tawiin, hotdam lametna tuh lukhua zangin limsak jaw ni.

⁹Pathianin thangpaihna thuak ding hi louin, Toupa Jesu Kris jiaka hotdamna mu ding jawin a honchi ahi ngala.

¹⁰I hahin leng, i ihmutin leng, amah toh i hin khawm theihna ding in amah tuh i sih sikin a si hi.

¹¹Huaijiakin, kihasuan chiatin, kitungding tuah chiat un, na hih naknak mahbang un.

¹²Himahleh, unaute aw, na lak ua semgim leh, Toupaa na heutu ua omleh, nou honhilhte thei dingin ka honngen ahi;

¹³A na sep jiak ua itna ngaithupi mahmah dingin. Kituakin om un.

¹⁴Huan, unaute aw, kon hasuan uhi, danbangloua omte hilh unla, lungkete hasuan unla, hatloute panpih unla, mi tengteng lakah thuakzou takin om un.

¹⁵Kuamahin kua gitlouh leng gitlouhna thuk lou dingin pilvang un; thil na kihihsak tuahna lam uah leh mi tengteng tunga na hih sakna lam uah leng, a hoih lamlam jui jaw un.

¹⁶Nuam gige un;

¹⁷Tawp louin thum un;

¹⁸Bangkim ah kipahthu gen gige un; haui tuh noumau lam thu ah Kris Jesu ah Pathian deihlam ahi ngala.

¹⁹Kha tuh phelh kei un;

²⁰Thugente simmoh kei un;

²¹Bangkim enchian jaw unla, a hoihlam peuhmah len chinten unla;

²²Gilou lam peuhmah ah kihemkhai un.

²³Huan, lemna Pathian ngeiin nou honhihsiangthou sipsip hen; huan, na kha uh leh, na lungsim uh leh, na pumpi uh i Toupa Jesu Kris hongpai chiangin, gensiatbeiin humbit in om suak sipsip hen.

²⁴Nou honsampa a muanhuaia, hih leng a hih ding hi.

²⁵Unaute aw, honthum sak un.

²⁶Unaute tengteng tawp siangthouin chibai honna buk sak un.

²⁷Hiai lai a hih leh unau tengteng kiangah sim dingin Toupa minin ka honngen hi.I Toupa Jesu Kris hehpihna na kiang uah om hen. Amen.

²⁸I Toupa Jesu Kris hehpihna na kiang uah om hen. Amen.