Read Paite Chin GENESIS 11 Bible Online

GENESIS 11 - Paite Chin bible

GENESIS 11

¹Huan lei a mi tengteng in pau khat leh paudan khat a nei uh.

²Hichi ahi a, suahlam a kipan a kisuanzel laiun, Sinar gam ah phaizang a mu ua; huai ah a tengta uhi.

³“Kisa un; teklei i bawldia, hoihtak in i halding” a kichita uhi. Suang sik in teklei a nei ua, suanghukna sik in longnai a nei uhi.

⁴“Kisa un, khopi i bawl dia, insang a vum vansun ding in i bawl dia, i min i thang sak ding uh. Huchilou in zaw lei pumpi ah thehdalh in i omkha ding” a chi uhi.

⁵Mite tate’n khopi leh insang a lam uh en ding in TOUPA a hohsuk hi.

⁶TOUPA’N “Ngai dih ua, mite pumkhat ahi ua, avek un lah pau khat a nei ngal ua; hiai thil a hih pan uhi. Tu’n zaw a thil hihtupte uh leng kham vual ahita kei ding hi.

⁷Kisa un, i va hohsuk ding ua, pau a kitheituah louhna ding un, a pau uh i va suklamdang sak ding” a kichi uhi.

⁸Huchi in TOUPA’N amaute huai apan leitung tengteng ah a dalhsak hi. Huchi in a khopi bawl uh a tawpsanta uhi.

⁹Huaiziak in, a min Babel a chi uh; TOUPA’N amaute leitung tengteng ah a dalhsakta hi.

¹⁰Hiai Shem suante ahi uh. Shem kum za a upa ahi a; tuichim tun nung kum nih nung in tapa Arpaksad a nei hi.

¹¹Arpaksad a neih nung in Shem kum za nga a damlai a, tanu leh tapate a neilai hi.

¹²Arpaksad in kum sawmthum leh nga a hih in, tapa Shelah a nei hi.

¹³Shelah a neih nung in Arpaksad kum za li leh thum a damlai a, tanu leh tapate a neilai hi.

¹⁴Shelah in kum sawmthum a hih in tapa Eber a nei hi.

¹⁵Eber a neih nung in Shelah kum za li leh thum a damlai a, tanu leh tapate a neilai hi.

¹⁶Eber in kum sawmthum leh li a hih in, tapa Peleg a nei hi.

¹⁷Peleg a neih nung in Eber kum za li leh sawmthum a damlai a, tanu leh tapate a neilai hi.

¹⁸Peleg in kum sawmthum a hih in tapa Reu a nei hi.

¹⁹Reu a neih nung in Peleg kum za nih leh kua a damlai a, tanu leh tapate a neilai hi.

²⁰Reu in kum sawmthum leh nih a hih in, tapa Serug a nei hi.

²¹Serug a neih nung in Reu kum za nih leh sagih a damlai a, tanu leh tapate a neilai hi.

²²Serug in kum sawmthum a hih in, tapa Nahor a nei hi.

²³Nahor a neih nung in Serug kum za nih a damlai a, tanu leh tapate a neilai hi.

²⁴Nahor, kum sawmnih leh kua a hih in, tapa Terah a nei hi.

²⁵Terah a neih nung in Nahor kum za leh sawmkua a damlai a, tanu leh tapate a neilai hi.

²⁶Terah in kum sawmsagih a hih in tapate Abram, Nahor leh Haran a nei hi.

²⁷Hiaite Terah suante ahi uh: Terah in tapa Abram, Nahor leh Haran a nei a; Haran in tapa Lot a nei hi.

²⁸Haran a pianna gam a, kaldaite khua Ur ah, a pa Terah ma in a si hi.

²⁹Abram leh Nahor in zi a nei ua; Abram zi min Sarai ahi. Nahor zi min Haran tanu Milkah ahi. Haran, Milkah pa leh Iskah pa leng ahi.

³⁰Sarai a ching a; ta himhim a neikei.

³¹Terah in a tapa Abram, a tapa, Haran tapa, Lot, a mou, a tapa Abram zi Sarai a pi a; Kanan a hoh ding in Kaldaite khua Ur a kipan a pawtkhe khawmta uhi. Haran khua a hongtung ua, huai ah a tengta uhi.

³²Terah damsung kum za nih leh nga ahi a, Haran khua ah Terah a sita hi.