Read Paite Chin GENESIS 12 Bible Online

GENESIS 12 - Paite Chin bible

GENESIS 12

¹Huan, TOUPA’N Abram kiang ah, “Na khua a kipan leh na tanaute a kipan leh na pa inn a kipan pawt inla, k’on etsak ding gam ah pai in.

²Chi thupi mahmah in k’on bawl dia, vual ka honzawl dia, na min ka hih thupi ding. Nang vualzawlna na hi ding.

³Nang hon vualzawlte ka vualzawl dia, hon hamsiat peuhmah ka hamsiat ding. Nang ah lei a namchih vualzawl in a om ding uh” a chi hi.

⁴TOUPA’N a kiang a, a gen bang in Abram a kuankheta a; Lot in a zui hi. Abram, Haran khua a kipan a pawtlai in kum sawmsagih leh nga a upa ahi.

⁵Abram in a zi Sarai leh a naupa tapa Lot leh, a thil kaihkhawm tengteng uh leh Haran khua a, a mi neih tengteng uh a pi a; Kanan gam a teng ding in a pawtta ua; Kanan gam a tungta uhi.

⁶Abram huai gam a Sekem mun pha in, Moreh tosaw tan in, a pai zel hi. Huailai in, Kanante huai gam ah a teng uhi.

⁷TOUPA Abram kiang ah a kilak a, “Hiai gam na suante kiang ah ka pe ding” a chi hi. Huai ah a kiang a kilak TOUPA ading in maitam a dohta hi.

⁸Huai a kipan Bethel suahlam a tang ah a kisuan a, huai ah a puanin a kaita hi. A tumlam ah Bethel a om a, a suahlam ah Ai khua a om hi. Huai ah TOUPA ading in maitam a doh nawn a, TOUPA min a lou hi.

⁹Abram sim gam lam zuan in a kisuan lai hi.

¹⁰Huai gam ah kial a keta a; huai gam a nak kial mahmah ziak in, Abram Aigupta gam a omtadih ding in a paisukta hi.

¹¹Hichi ahi a, Aigupta gam lut dia a kisaklai un, a zi Sarai kiang ah, “Ngai in, numei melhoih tak na hi, chih ka thei hi.

¹²Huchi in hichi ahi ding a, Aiguptate’n nang a honmuh chiang un, hiai a zi ahi, a chiding ua; kei a honthat ding ua, nang a honhawi ding uhi.

¹³Nang ziak a hoihtak a ka om theihna ding in leh nang vanga ka hin theihna ding in, a sanggamnu ka hi, hehpih in chi zel in” a chi hi.

¹⁴Hichi ahi a, Aigupta a Abram a lut leh, Aiguptate’n numei a mu ua, a melhoih a sa mahmah uh.

¹⁵Pharo miliante’n leng a mu ua, Pharo kiang ah a hoih dan a gen uh. Huchi in, numei Pharo inn ah a pi lutta uh.

¹⁶Aman Sarai ziak in Abram hoihtak in a hih a; belamte, bawngte, sabengtungpate, sikhapate, sikhanute, sabengtungnute leh sangawngsaute a neih lohta hi.

¹⁷TOUPA’N Abram zi Sarai ziak in Pharo leh a inkuante tung ah hipi khawktak a tung sak hi.

¹⁸Pharo in Abram a sam a, “Ka tung a na thilhih bangchidan a mai a? Na zi ahi chih bangdia honhilh lou na hia? Ka sanggamnu ahi, bangdia chi na hia?

¹⁹Huaiziak a kei maw, ka zi dia ka na neih hial, huaiziak in, tu’n en in, na zi, pi inla, paimang in,” a chi hi.

²⁰Pharo in a tungthu ah mi kiang ah thu a pia a, amah a va khat a ua, a zi toh, a neih tengteng toh.