Read Paite Chin GENESIS 13 Bible Online

GENESIS 13 - Paite Chin bible

GENESIS 13

¹Abram Aigupta gam a kipan a pawt a, simlam ah a pai tou hi; a kiang ah a zi, a neih tengteng leh Lot leng a paitou hi.

²Abram gante, dangkate leh dangkaengte in a hausa mahmah hi.

³Simlam a kipan Bethel tan a pai zel a, Bethel leh Ai khua kikal a tung hi, a tung a a puanin a omna mun ah.

⁴A tung a, maitam a dohna mah ah Abram in TOUPA min a lou hi.

⁵Lot, Abram kiang a pai sam in, belamhonte, bawnghonte leh puaninte a nei hi.

⁶A omkhawmna ding un gam a kichingta kei a; a van neih uh a tam mahmah hi. A omkhawm thei nawn kei uhi.

⁷Abram ganpute leh Lot ganpute kikal ah kiselna a hong pawtta a; huailai in Kanante leh Perizte huai gam ah a teng uhi.

⁸Abram in Lot kiang ah, “Hehpih in, nang leh kei kikal ah, na ganpute leh ka ganpute kikal ah leng kiselna omkei hen; unau i hi uhi,” a chi hi.

⁹“Gam pumpi na ma ah a om ka hia? Hehpih in ka kiang a kipan tuam om mai in. Nang veilam a na pai leh, kei taklam ah ka pai ding. Ahihkeileh, nang taklam a na pai leh, kei veilam ah ka pai ding” a chi hi.

¹⁰Lot a dak a, Zoar kholam zuan in, Jordan phaizang tengteng, TOUPA huan bang ahihkeileh Aigupta gam bang in, gamchih a tui tampi omna ahi, chih a thei a, TOUPA’N Sodom leh Gomorrah khua a hihsiat ma lah ahi ngal a.

¹¹Lot in Jordan phaizang tengteng a telta hi. Lot suahlam ah a kisuan a; a kikhenta uhi.

¹²Abram Kanan gam ah a teng a, Lot phaizang khuate ah a teng a, Sodom khua pha in a puanin a kai hi.

¹³Sodom mite Pathian mitmuh in nakpitak a hoihlou leh khial in a om uhi.

¹⁴A kiang a kipan Lot a om tuam nung in, TOUPA’N Abram kiang ah, “Dak inla, na omna a kipan mallam, simlam, suahlam leh tumlam en in.

¹⁵Na gam muh tengteng na kiang ah leh na suante kiang ah tangtawn a ding in k’on pe ding.

¹⁶Na suante lei a leivui bang in ka bawl ding. Mi’n lei a leivui a sim seng uh leh, na suante leng sim seng ahi ding uh.

¹⁷Thou inla, gam dung leh vai palsuak in; na kiang a honpe ding ka hi” a chi hi.

¹⁸Abram in a puanin a suan a, Hebron a om Mamre tawsaw kiang ah a tengta a, huai ah TOUPA ading in maitam a doh hi.