Read Paite Chin GENESIS 15 Bible Online

GENESIS 15 - Paite Chin bible

GENESIS 15

¹Huai thilte nung in, “Abram, lau ken, kei na phaw leh na kipahman thupitak ka hi” chi’n, TOUPA thu Abram kiang ah mengmuhna in a hongtung hi.

²Abram in, “Aw, TOUPA Pathian, bang n’on pedia, ta neilou a ka om na mu a, ka goukempa lah Damaska khua a Eliezer ahi ngal a” a chi hi.

³Abram mah in, “Ngai in, chi lah n’on suahsak kei a; en in, ka inn a piang ka gouluah ding ahi” a chi hi.

⁴“Ngai in, huai mi na gouluah ding ahi kei. Nangmah gil a hong gah ding ngei, na gouluah ahizaw ding” chi’n, TOUPA thu a kiang ah a hongtung hi.

⁵Amah inn pua ah a pikhia a, “Vanlam en inla, aksite na sim theih leh sim him in” a chi hi. Amahmah in a kiang ah, “Na suante huchibang ahi ding uh” a chi hi.

⁶Aman TOUPA a gingta a, huchi in, aman huai a diktatna in a seh sakta hi.

⁷A kiang ah, “Hiai gam na luah ding a honpe dia Kaldaite khua Ur a kipan hon pikhia TOUPA ka hi” a chi hi.

⁸Aman “TOUPA Pathian aw, ka luah ding, chih bangchi’n ka thei dia?” a chi hi.

⁹Aman, a kiang ah, “Bawngla kum thum a upa, kelpi kum thum a upa, vakhu leh vapal nou honla in” a chi hi.

¹⁰Huai teng a honla a, a laitak ah a phelkhap chiat a, a phel khat, a phel khatlam doh in a koih chiat a; vasate bel a phelkhap kei hi.

¹¹Sasialne vasate saluangte tung a a tuk chiang un Abram in a hawlkhe zel hi.

¹²Nitum dia a kisak sialsial lai in, Abram a ihmu hithit hi. Ngai in, a mial a mial, thil mulkimhuai petmah in amah a honkhuh hi.

¹³Hiai thilte nung in Pathian in Abram kiang ah, “Na suante amau gam hilou ah mikhual in a om ding ua, a na uh a sepsak ding uh, chih teltak in thei in. Kum za li sung hih gentheih in a om ding uhi.

¹⁴A nna uh a sepsak nam uh ka vaihawm khum ding. Huaikhit chiang in thil tampi nei in a hong paikhe ding uhi.

¹⁵Nang na pipute kiang ah lungmuangtakin na pai ding a; na lu a kelsam pouvek in a honvui ding uhi.

¹⁶Himahleh, suan lina ah hiai ah a hongpai nawn ding uh. Amorte khelhnate lah a kim nai ngalkei a” a chi hi.

¹⁷Hichi ahi a, nitum a, khua a hong mial in, ngai in, halzulna meikhu lunglung leh meisel kuang luahluah huai sa kiphelkhapte kal a paipai a hongom hi.

¹⁸Huai ni’n TOUPA’N hiai gam, Aigupta lui a kipan lui lian, Euphrates lui, pha in, na suante kiang ah ka peta.

¹⁹Kente, Kenizte, Kadmonte,

²⁰Hitte, Perizte, Rephaimte,

²¹Amorte, Kanante, Girgahte leh Jebuste toh leng ka pelai hi, chi in Abram toh thu a khungta hi.