Read Paite Chin GENESIS 17 Bible Online

GENESIS 17 - Paite Chin bible

GENESIS 17

¹Abram kum sawmkua leh kua a upa a hih in, TOUPA Abram kiang ah a hong kilak a, a kiang ah, “Kei Pathian bangkim hihthei ka hi; ka ma ah om inla, hoihkim in.

²Nang toh kikal ah thu ka khung dia, nakpitak in k’on pungsak ding” a chi hi.

³Abram a khupboh a; Pathian in amah a houpih hi.

⁴“Ngai in, ken zaw, ka thukhun na kiang ah ahi, ka khun, chi tampite Pa na hita ding.

⁵Na min leng Abram ahi nawnta kei dia, na min Abraham ahi zawta ding; chi tampite Pa dia k’on bawltak ziak in.

⁶Nakpitak in k’on chipha sak ding a, nang ah chichihte ka bawl ding a, nang a kipan kumpipate a hong omkhe ding uh.

⁷Kei leh nang leh na suante, suan sawnsawnte tan in leng ka thukhun nang ading leh nanung a na suante ading a, a Pathian uh hi ding in, tangtawn thukhun ding in ka hihkip ding hi.

⁸Na kiang ah leh nanung a na suante kiang ah mikhual na hihna gam, Kanan gam tengteng, tangtawn gou ding un k’on pe ding, Kei, a Pathian uh ka hi ding” a chi hi.

⁹Pathian mah in Abraham kiang ah, “Nang ka thukhun na zui ding ahi. Na nung a na suante suan sawnsawnte tan in leng a zui ding uhi.

¹⁰Hiai kei leh nang leh na suante kal a ka thukhun na zuih ding uh ahi. Na lak ua pasal peuhmah zeksum ding ahi.

¹¹Na zekvun sa uh zeksum in na om ding uhi. Huai nang toh i kal a thukhun chiamtehna ahi ding hi.

¹²Na lak ua kuapeuh ni giat a upa, na suan sawnsawn tan un leng, na suan hi chitchiat lou leng na inn a piang hiam, mikhual kuapeuh a kipan dangka sum a na lei hiam leng, pasal peuhmah zeksum ding ahi.

¹³Na inn a piang leh na dangka sum a na leite leng zeksum ngeingei ding ahi. Ka thukhun tangtawn thukhun ding in na sa ah a omta ding hi.

¹⁴Pasal zeksumlouh leh a zekvun sa a zeksum a omlou, a chipihte lak a kipan satkhiat ahi ding; aman ka thukhun hihsia ahi” a chi nawn hi.

¹⁵Pathian mah in, Abraham kiang ah, “Na zi Sarai, a min Sarai na chi nawnta kei dia, a min Sarah ahi zawta ding.

¹⁶Amah ka vualzawl ding a, huai lou leng amah ah tapa k’on pe ding. Ahi, amah ka vualzawl ding a, Namte Nu ahita ding. Nam tuamtuam kumpipate amah a kipan a hongom ding” a chi hi.

¹⁷Abraham a khupboh a, a nuia, a lungsim in mi kum za a upa in ta a neiding maw? Sarah kum sawmkua a upain ta a neiding maw? a chi hi.

¹⁸Abraham mah in, Pathian kiang ah, Ishmael na ma ah omthei leh aw, a chi hi.

¹⁹Pathian in, “Hilou e, na zi Sarah in tapa a hon neihsak taktak ding; a min Isak na sak ding ahi. Ka thukhun, a nung a, a suante ading in tangtawn thukhun ding in a kiang ah ka hihkip ding.

²⁰Ishmael tungthu leng k’on ngaihkhiak sak hi. Ngai in, amah ka vualzawlta a, chi tampi ka suangsak ding hi. Nakpitak in leng ka pungsak ding a, aman kumpipa sawmlehnih a suang ding a, amah chi thupitak in ka bawl ding hi.

²¹Himahleh ka thukhun, Sarah in nikum hichi hun a a hon neihsak ding Isak kiang ah ahi ka hihkip ding” a chi hi.

²²A kiang a thugen a tawp a, Pathian in Abraham a paitouh santa hi.

²³Abraham in a tapa Ishmael leh a inn a piang tengteng leh dangka sum a, a lei tengteng, Abraham inkuante lak a pasal peuhmah, a pi a, Pathian in a kiang a a gen bang in, huai ni mah in a zekvun uh a sumsakta hi.

²⁴Abraham zekvun a sumlai in kum sawmkua leh kua a upa ahi.

²⁵A tapa Ishmael a zek vun a sum lai un kum sawmlehthum a upa ahi.

²⁶Huai ni mah in Abraham leh a tapa Ishmael zeksum ahita uh.

²⁷A inkuanpihte lak a pasal tengteng, a inn a piangte leh mikhual a kipan dangka sum a a leite leng, amah toh zeksum ahi vekta uhi.