Read Paite Chin GENESIS 18 Bible Online

GENESIS 18 - Paite Chin bible

GENESIS 18

¹Huan, Abraham sun nisat laitak a puanin kongkhak bul a, a tutlai in, Mamre tawsaw kiang ah TOUPA a hong kilak hi.

²Abraham a dak a, a en a, ngai in, a kiang ah mi thum a na ding uhi. A muh tak in puanin kongkhak a kipan amau mu ding in a vatai a, leilam ah a kunsuk hi.

³“Ka TOUPA, n’on deihsak theih leh hehpih in na sikha hon kheng mahmah ken.

⁴Tui tawmchik bek honla uhenla, na khete uh sil unla, sing nuai ah khawl tadih un.

⁵Tanghou tawmchik bek ka vala dia, na lungtang uh halhsak un. Huaikhit chiang in pai zel nani uteh. Huai ding a na sikha kiang a hongpai na hi peuhmah ding uh” a chi hi. Amau, “Na chih bang in va hih in” a chi uhi.

⁶Abraham Sarah kiang ah puanin sung ah a lutpah a, “Tangbuang nel mahmah tehna thum bawl inla, mek inla, tanghou pei in bawl in” a chi hi.

⁷Abraham bawnghon lam ah a tai a, bawngnou hoihtak a honla a, sikha kiang ah a pia a, aman a bawl mengmeng hi.

⁸Nawituidat, nawitui leh bawngnou sa kibawl a la a, a ma uah a va luita hi. Sing nuai ah a kiang uah ading nilouh a, amau a neta uh.

⁹Amau a kiang ah, “Na zi Sarah koi a om ahia?” a chi ua, “Aman pam a puanin ah” a chi hi.

¹⁰Amau, “Hun a hong chin nawn peuhpeuh chiang in na kiang ah ka hong nawn ngeingei ding uh. Ngai in, na zi Sarah in tapa a nei ding” a chi hi. A nung a puanin kongkhak bul a kipan Sarah in a naza hi.

¹¹Abraham leh Sarah upapi, tektak ahita ua; numei dan ngeina Sarah ah a kamkhin thamta hi.

¹²Sarah in tektak ka hihnung in kipahna ka nei diam maw, ka toupa lah a upata ngal a? chi’n, a lungsim in a nui hi.

¹³TOUPA’N Abraham kiang ah, “Bang a chia Sarah in, kei pitek in ta ka nei tel diam maw, chia nui ahia?

¹⁴TOUPA ading in thil himhim haksa lua a om ahia? Hun seh a hongtun chiang in, na kiang ah ka hong nawn dia, Sarah in tapa a nei ding” a chi hi.

¹⁵Sarah in, “Ka nui kei” chi’n a nial a, a lauh ziak in. Aman, “Zuau ahi; na nuitawk ve” a chi hi.

¹⁶Mite huai a kipan ading ua, Sodom kholam a en ua, Abraham amau kha ding in a kiang uah a pai hi.

¹⁷TOUPA’N, “Ka thilhih ding Abraham ka im diam aw;

¹⁸Abraham lah chi thupi leh thilhihtheitak a hong hingei dia, amah ah khovel a chichih vualzawl a om ding ahi.

¹⁹TOUPA lampi a zuih theihna ding un, a nung a a tate leh a inkuanpihte dik hih ding leh vaihawm ding thu a piak theihna ding in amah ka septa hi; huchi a a tungthu genpa TOUPA’N Abraham tung a a tunsak theihna ding in,” a chi hi.

²⁰TOUPA’N, “Sodom leh Gomorrah kalh a kikou ging a thupi a, a gitlouh mahmah ziak un.

²¹Tuin ka hohsuk dia, a kikou ging uh ka kiang a hongtung bangbang in a hih uhia, hihlou, ka en dia, ahihkei uleh ka thei mai ding,” a chi hi.

²²Mite huai a kipan a kihei ua, Sodom kholam a zuanta uhi. Abraham bel TOUPA ma ah ading lai hi.

²³Abraham in a vanaih a, “Mi diktatte, mikhialte lak a hihmang khawm tel ding na hi maw?

²⁴Khosung ah mi diktat sawmnga bek a om kha ding uh. Asung a mi diktat sawmnga omte ziak in a khua hawilou in na hihmang ding maw?

²⁵Nang tel in huchibang in, mi diktatte migiloute bang a, a om samna ding ua mi diktatte migiloute lak a hihlup zaw na hih tel kei ding hi. Lei tengteng Vaihawmpa in diktattakin ahihkei dia hia?” a chi hi.

²⁶TOUPA’N, “Sodom khua a mi diktat sawmnga ka muh leh amau ziak in khaw pumpi ka hawi ding,” a chi hi.

²⁷Abraham in, “Ngai in, kei leivui leh meivu lel in TOUPA k’on houpih thei hi.

²⁸Mi diktat nga in sawmnga ching zoulou ahi kha ding a; nga a chinlouh ziak in khaw pumpi na hihmang ding maw? chi’n a dawng hi. Aman sawmli leh nga ka muh leh ka hihmang kei ding,” a chi hi.

²⁹Aman Amah a houpih zel a, “Huai ah sawmli kia na mu ahi kha dia,” a chi hi. Aman, “Sawmli ziak in leng ka hihmang dahmai ding,” a chi hi.

³⁰Aman, “TOUPA aw, heh ken, k’on gennawn ding. Huai ah sawmthum lel na mu ahi kha ding,” a chi hi. Aman, “Huai a sawmthum leng ka muh leh ka hihmang kei ding,” a chi hi.

³¹Aman, “Ngai in, TOUPA k’on houpih theita a, huai ah sawmnih kia na mu ahi kha ding, a chi hi. Aman sawmnih ziak in leng ka hihmang kei ding,” a chi hi.

³²Aman, “TOUPA aw, heh ken, khatvei kia k’on gen lai ding. Huai ah sawm kia na mu ahi kha ding,” a chi hi. Aman, “Sawm ziak in leng ka hihmang kei ding,” a chi hi.

³³Abraham toh a kihou khit un TOUPA a paita a; Abraham a mun ah a kiknawnta hi.