Read Paite Chin GENESIS 2 Bible Online

GENESIS 2 - Paite Chin bible

GENESIS 2

¹Huan, lei leh van leh asung a om tengteng siamzoh ahita hi.

²Pathian in a ni sagih ni’n a nasep a zou a; a ni sagih ni’n a nasep tengteng a khawlsanta hi.

³Pathian in a ni sagih ni a vualzawl a, a tangta hi. Huai ni a Pathian in a siam leh a bawl, a nasep tengteng a khawlsan tak ziak in.

⁴Lei leh vante siam a a omlai ua a suante uh hiaite ahi; TOUPA Pathian in lei leh van a siam ni’n,

⁵lei a loupa himhim a om naikei a, lei a anteh leng a pou naikei hi. TOUPA Pathian in leitung ah vuah a zusak naikei a, leilet ding in mihing leng a om naikei hi.

⁶Himahleh lei apan mei a hong suaktou a, leitung tengteng a nomsak hi.

⁷TOUPA Pathian in lei a leivui in mi a bawl a, a nakvangte ah hinna hu a khalut a; huai mi, mihing a hong hita hi.

⁸TOUPA Pathian in suahlam a Eden ah huan a bawl a; a bawl pasal huai ah a omsakta hi.

⁹Lei a kipan TOUPA Pathian in sing mit hiptak leh nektuak chiteng a pousak hi. Hinna sing leh sialehpha theihna sing leng huan laizang ah a pousak hi.

¹⁰Eden apan huan nomsak ding in lui a luang paisuak a; huai a kipan a ka zak a, ka li a hong hita hi.

¹¹A khatna min Pison ahi, hiai Havilah gam tengteng kualkhum lui ahi. Huai ah dangkaeng a om hi.

¹²Huai gam a dangkaeng hoihtak ahi a, huai ah bedeli leh onik suang leng a om hi.

¹³Lui nihna Gihon ahi a; huai lui in Kush gam tengteng a kualkhum ahi.

¹⁴Lui thumna min Hiddekel ahi a; hiai Assuria gam suahlam a luang ahi. Lui lina bel Euphrates ahi.

¹⁵TOUPA Pathian in pasal a pi a, Eden huan ah a kem ding leh a veng ding in a koihta hi.

¹⁶TOUPA Pathian in pasal kiang ah, “Huan a sing gah chiteng na utut na ne thei hi.

¹⁷A hoih leh a sia theihna sing gah bel na ne ding ahi kei. Na nek leh na nek ni mah in na si ngeingei ding hi” chi in, thu a pia hi.

¹⁸TOUPA Pathian in, “Pasal amah kia a om a hoih kei. Amah panpihtu ding a kilawm ka bawlsak ding,” a chi hi.

¹⁹TOUPA Pathian in leitung a kipan gamsa chiteng leh tung a leng vasa chiteng a bawlta hi. A min ding ua bang sak ding ahia chih theihna ding in Adam kiang ah a hon pikhawm hi. Ganhing chiteng a min uh Adam in a na phuah, a min uh ahi den hi.

²⁰Adam in gan tengteng, tung a leng vasa tengteng leh gamsa chiteng min a phuak chiat hi. Himahleh Adam panpihtu ding a omkei hi.

²¹TOUPA Pathian in nuamtak in Adam a ihmu sak a, huchi in a ihmuta a; a nakguh khat a la a, a tang ding in sa a pang dimsak hi.

²²TOUPA Pathian in Adam apan a lak nakguh apan in numei a bawl a, Adam kiang ah a honpita hi.

²³Adam in, “Hiai hial zaw ka guh a kipan guh, Ka sa a kipan sa ahi. Pasal a kipan lakkhiak a hih ziak in, Numei, chih ding ahi” a chi hi.

²⁴Huaiziak in, pasal in a nu leh a pa a paisan dia, a zi ah a belh ding. Huchi in sa khat a hong hita ding uhi.

²⁵Adam leh a zi vuaktang ahi tuak ua, a zum tuankei uhi.