Read Paite Chin GENESIS 20 Bible Online

GENESIS 20 - Paite Chin bible

GENESIS 20

¹Abraham huai a kipan simlam zuan in a kisuan a, Kadesh leh Shur khaw kikal ah a teng a, Gerar ah hun bang tan hiam a tam hi.

²Abraham in a zi Sarah, “Ka sanggamnu ahi” a chi hi. Gerar kumpipa Abimelek in mi a sawl a, Sarah a va pisakta hi.

³Himahleh, Pathian in zan a, a mang in Abimelek kiang ah a hongpai a, a kiang ah, “Ngai in, na numei pi ziak in misi leltak na hita, mi zi ahi ngal a” a chi hi.

⁴Abimelek in a luppih nai tadih kei hi. TOUPA, nam diktat leng na that dia hia?

⁵Amahmah in, ka kiang ah, “Ka sanggamnu ahi,” a chi hi? Amah ngei in leng, ka sanggampa ahi, a chi behlap ngal a. Lungtang hoih tak pu leh khut siangthou tak neikawm in hiai ka hih ahi, a chi hi.

⁶Pathian in a mang in, “Ahi, hiai lungtang hoih tak pukawm a na hih ahi, chih ka thei a, ken leng ka tung a na khelh ding k’on kham hi. Huaiziak in, amah na khoih ka phallouh ahi.

⁷Tuin huai mi zi pekik in; amah lah zawlnei ahi ngal a. A hon thumsak dia, na dam ding. Na piak kik keileh, na si ngeingei ding, chih thei in, nang leh na neih tengteng toh” a chi hi.

⁸Abimelek beltak in a thou a, a sikha tengteng a sam a, a bil uah huai thu tengteng a hilh a, mite’n a lau mahmah uhi.

⁹Abimelek in Abraham a sam a, a kiang ah, “Ka tung ua na thilhih bangchidan ahia oi? Bang lam ah ahia na tung a ka khelh a, kei leh ka khua leh tuite tung a thil gilou thupitak n’on tut? Thilhih tuak louh tak ka tung ah na hihta” a chi hi.

¹⁰Abimelek mah in Abraham kiang ah, “Bang na mu a, hichibang a thilhih na maizen a?” a chi nawn hi.

¹¹Abraham in, “Hiai khua ah Pathian lauhna a om hetkei ngei ding a, ka zi ziak in a honthat mai ding uh, chih ka ngaihtuah ziak ahi.

¹²Huailou in ka sanggamnu leng ahi him a, ka pa tanu ahi a, ka nu tanu bel ahi kei. Himahleh ka zi a hong hita hi.

¹³Hichi ahi a, Pathian in ka pa inn a kipan a hon vakvaih sak lai in, a kiang ah, ‘Hiai na hehpihna ka tung a na latsak ding ahi. Ka tunna peuh uah, ka sanggampa ahi honchi zel in’ ka chi him ahi” a chi hi.

¹⁴Abimelek in belamte, bawngtalte, sikhapate leh sikhanute a pi a, Abraham kiang ah a pia a, a zi Sarah leng a pekikta hi.

¹⁵Abimelek in, En in, ka gam a za akei hiam, na utna peuh ah tengin, a chi hi.

¹⁶Sarah kiang ah, “En in, na sanggampa dangka sang khat ka peta hi. Ngai in, na kiang a om tengteng leh nangmah ading in amah na mit khuhna ahi ding. Hiai bang in amah taihilh in a om hi.”

¹⁷Abraham Pathian kiang ah a thum a, Pathian in Abimelek leh a zi leh a sikhanute a damsak nawn a, huchi in ta a neita hi.

¹⁸Abraham zi Sarah ziak in TOUPA’N Abimelek inkuante tengteng a chingsak vek hi.