Read Paite Chin GENESIS 21 Bible Online

GENESIS 21 - Paite Chin bible

GENESIS 21

¹Huan, TOUPA’N a gensa bang in Sarah a veh a, TOUPA’N a gensa bang in Sarah ading in a semta hi.

²Sarah a gai a, Pathian in a kiang a, a gen hunseh in a tek nung in Abraham tapa a neihsakta hi.

³Abraham in Sarah in a neihsak a tapa min Isak a sa hi.

⁴Abraham in Pathian in a kiang a thu a piak bang in a tapa Isak ni giat a chin in a zek a sumsak hi.

⁵A tapa Isak a pian lai in Abraham kum za khat a upa ahi.

⁶Sarah in, “Pathian in hon nuisakta; a za michih in a hon nuihpih ding uh,” a chi hi.

⁷Amahmah in, “Sarah in naungekte a pom ding, chih kuan ahia Abraham kiang a gen thei ding? A tek nung in tapa ka neihsakta” a chi hi.

⁸Naungek a hong khangliana, nawinek a tawpsakta uh. Isak nawinek a tawpsak ni un, Abraham in Ankuang thupitak a luita hi.

⁹Aigupta mi Hagar tapa, Abraham adia a neihsak pen in Isak a nuihsan lai Sarah in a mu hi.

¹⁰Huaiziak in, Abraham kiang ah, “Hiai sikhanu leh a tapa delhkhia in. Hiai sikhanu tapa in ka tapa Isak gou a luahpih ahi theikei ding” a chi hi.

¹¹Hiai thu a tapa mah toh kisai a hih ziak in Abraham ngaih in thil hoihlou tak ahi.

¹²Himahleh Pathian in Abraham kiang ah, “Naupang tungtang thu leh na sikhanu tungtang thu na ngaih in thil hoihlou hi kei hen. Sarah in na kiang a thu a gen tengteng zui in, Isak ah na suante a chi ding uh, chih ahi ngal a,

¹³Sikhanu tapa ah leng, na suan a hih ziak in, chichih tham ngial ka bawl ding” a chi hi.

¹⁴Abraham beltak in a thou a, tanghou leh tuithawl, tui a dim a la a, Hagar kiang a pia in, a liangkou ah a suan hi, huan naupang mah leng, a paisakta hi. A pai a, Beer — sheba gamdai ah a vak vakta hi.

¹⁵Tuithawl a tui a hong omta kei a, naupang singlim nuai khat ah a koihta mai hi.

¹⁶“Naupang si ding ka en ngamkei” a chih ziak in gamla kuam ah, thal kap phakna ding ah, a vapai a, a mazawn a tu in ngaihtak in a kapta hi.

¹⁷Pathian in naupang aw a za a; Pathian angel in van a kipan Hagar a sam a, a kiang ah, “Bangchi na hia Hagar? Lau ken, a omna a naupang aw Pathian in a za hi.

¹⁸Thou inla, naupang phong inla, na khut in len in, amah chi thupitak a bawl ding ka hi” a chi hi.

¹⁹Pathian in a mit a hih vaksak a, tuileh a muta hi. Huai ah a vapai a, tuithawl dim in tui a dim a, naupang a dawnsakta hi.

²⁰Naupang kiang ah Pathian a om a, a hong khangliana; gamdai ah a teng zel a, thalkapmi a hong hita hi.

²¹Paran gamdai ah a teng a; a nu’n Aigupta gam a kipan zi a guan hi.

²²Hichi ahi a, huailai in Abimelek leh a sepaih pawl heutu Phikol in Abraham kiang ah, “Na thilhih peuh ah Pathian na kiang ah a om.

²³Tuin hiai ah Pathian min lou inla, kei leh ka tapa leh ka tapa’ tapa leng khemlou in, k’on hehpih khittaksa bang in kei leh na tenna gam hehpih thuksam ding in ka kiang ah kichiam in” a chi hi.

²⁴Abraham in, “Ka kichiam ding” a chi hi.

²⁵Abimelek sikhate’n tuileh a suhsak ziak in Abraham in Abimelek a sal hi.

²⁶Abimelek in, “Hiai thilhih pen kua ahia, ka thei himhim kei. Nang lah n’on hilh ngalkei a, tuni ngallou in ka za nai himhim kei” a chi hi.

²⁷Abraham in belamte leh bawngtalte a pi a, Abimelek kiang ah a pia a; a nih un thu a khungta uhi.

²⁸Abraham in a belamhon lak a belamnou a nu sagih a koih tuam hi.

²⁹Abimelek in Abraham kiang ah, “Belamnou a nu sagih a tuam a na koih bang a chia ahia?” a chi hi.

³⁰Aman, “Hiai tuileh kei leh ahi, chih n’on theihpihna ding in hiai belamnou a nu sagih ka khut a kipan na lak ding ahi” a chi hi.

³¹Huaiziak in huai mun Beer — sheba a sa a; huai a a nih ua a kichiam ziak un.

³²Beer — sheba ah thu a khungta uhi. Abimelek a thou a, a sepaih pawl heutu Philok toh, Philistiate gam ah a pai nawnta uhi.

³³Abraham in, Beer — sheba ah meilah sing a suan a, huai ah TOUPA tangtawn Pathian min a lou hi.

³⁴Abraham Philistiate gam ah sawtpi a tam hi.