Read Paite Chin GENESIS 22 Bible Online

GENESIS 22 - Paite Chin bible

GENESIS 22

¹Huai thilte nung in Pathian in Abraham a ze-et hi. A kiang ah, “Abraham” a chi a; aman, “Hiai ah ka om” a chi hi.

²Aman, “Na tapa, na tapa neihsun, na ittak, Isak pi inla, Moriah gam ah pai inla, k’on hilh ding tang khat ah haltum thillat in lan in” a chi hi.

³Abraham beltak in a thou a, sabiltung a bawl a, a kiang ah a tapa Isak toh sikha tangval nih a pi hi. Haltum thillat ading in sing a eka, a thou a, Pathian in a hilhna mun lam ah a paita hi.

⁴A ni thum ni’n Abraham a dak a, amun gamlapi hilai in a mu hi.

⁵Abraham in a sikha tangvalte kiang ah, “Hiai ah sabiltung toh a na om un. Kei leh naupang huai pam ah ka va hoh ding ua; Pathian ka va be ding ua; na kiang uah ka hong kiknawn ding uh” a chi hi.

⁶Abraham in haltum thillatna ding sing a la a, a tapa Isak a pawsak hi. Aman mei leh temta a tawi a; a nih un a paikhawmta uhi.

⁷Isak in a pa Abraham a houpih a, “Pa” a chi a, aman, “Bawi, hiai ah ka om” a chi hi. Aman “En dih, mei leh sing a om a; hileleng haltum thillat ding belamnou lah koi ah?” a chi hi.

⁸Abraham in, “Bawi, Pathian in amah ading haltum thillat ding belamnou a ngaihtuah tawm ding hi” a chi a; a nih un a paikhawm zel uhi.

⁹Pathian in a hilhna mun a va tungta ua, Abraham in huai ah maitam a doh a, sing a chiangkhawm a, a tapa Isak a hen a, maitam a sing tung ah a lumsak hi.

¹⁰Abraham in a khut a lik a, a tapa thahna ding temta a la hi.

¹¹TOUPA angel in van a kipan amah a sam a, “Abraham, Abraham” a chi a, aman, “Hiai ah ka om” a chi hi.

¹²Aman, “Naupang tung ah na khut kha ken. Amah bangmah loh ken. Na tapa, na neihsun mahmah leng kei adia na it louh ziak in Pathian na lau, chih tuin ka theita” a chi hi.

¹³Abraham a dak a, a en a, ngai in, a nunglam ah belampa a ki a singbawka awk a na om hi. Abraham in huai belampa a va man a, a tapa sik in haltum thillat in a lan zawta hi.

¹⁴Abraham in huai mun min, “Jehovah Jire” a sa hi; tuni tan a “TOUPA tang ah ngaihtuah hina ve” a chih zel bang un.

¹⁵TOUPA angel in a nihveina ding in van a kipan Abraham a sam nawn hi.

¹⁶“Hiai thil na hih ziak leh na ta neihsun na it louh ziak in keimah in ka kichiam hi.

¹⁷K’on vualzawl ngeingei dia, van a aksite zah leh tuipi piau a piaunel zah in na suante ka pungsak ngeingei ding. Na suante’n a doute uh kulh kongkhak a nei ding uhi.

¹⁸Ka thu na man ziak in na suan ah khovel a chichih vualzawl in a om ding uh” a chi hi.

¹⁹Abraham a sikha tangvalte kiang ah a kiknawn a, a thou ua, Beer — sheba lam manoh in a pai uh. Abraham Beer — sheba ah a teng hi.

²⁰Hichi in, huai thilte nung in, Abraham kiang ah, “Ngai in, Milkah in leng na nau Nahor tate a neih sakta ve,” chi in Abraham a hilh uhi.

²¹A ta masa Huz ahi a; a nau Buz ahi a, Aram pa Kemuel;

²²Chesed, Hazo, Pildash, Jidlaph leh Bethuel leng ahi uh”

²³Bethuel in tanu Rebekah a nei a; huai giatte Milkah in Abraham nau Nahor a neihsak ahi uh.

²⁴A mei, a min Reumah in leng Tebah, Gaham, Thahash leh Makah a nei hi.