Read Paite Chin GENESIS 23 Bible Online

GENESIS 23 - Paite Chin bible

GENESIS 23

¹Sarah damsung kum za leh sawmnih leh sagih ahi. Hiaite Sarah damsung kumte ahi uh.

²Sarah Kanan gam a Kiriath Arba, Hebron kichi khua ah a si a Sarah tung a awm kitum ding leh kap ding in Abraham a hong hi.

³Abraham a misi luang ma a kipan a dingtou a, Heth suante kiang ah,

⁴“Na lak uah mikhual leh khualtam lel ka hi a; ka misi luang mulou dia ka vui theihna ding in vuina mun honpia un” chi in a ngen hi.

⁵Heth suante’n Abraham a dawng ua, a kiang ah,

⁶“Ka toupa, hon ngaikhia in, nang ka lak ua kumpi thupitak na hi a; ka hante uh lak a na deihna penpen ah na misi vui in. Na misi na vuina ding in ka lak uah kuamah in ka han uh honpiak ka itkei ding uh” a chi uhi.

⁷Abraham huai gammite leh Heth suante ma ah a dingtou in a kun hi.

⁸“Ka misi ka muhlouh dia ka vui pha nasak uleh, hon ngaikhia unla, Zohar tapa Ephron kiang ah hon ngetsak un.

⁹A lou taw a om, a neih, Makpelah kawkhuk honpe ding in, na lak ua vuina mun ding aman hun a sak zahzah la henla, honpia hen” a chi hi.

¹⁰Heth suante lak ah Ephron a teng a; Heth mi Ephron in Heth suante theih in, a khaw kulh kong a lut peuhmah nangawn theih in.

¹¹“Hilou e, ka toupa, hon ngaikhia in. Lou leh asung a om kawkhuk leng k’on pia hi. Ka chipihte tate mitmuh in ka honpia hi. Na misi vui in” chi’n, Abraham a dawng hi.

¹²Abraham huai gammite ma ah a kun hi.

¹³Huai gammite theih in Ephron kiang ah, “Pha nasak leh hehpih in hon ngaikhia in; lou man k’on pe ding, kei a kipan la in, huai mun kia ah ka misi ka vui ding” a chi hi.

¹⁴Ephron in Abraham a dawng a, a kiang ah,

¹⁵“Ka toupa, hon ngaikhia in. Leimun dangka sekel za li ahi a, huai zaw, nang leh kei ading in gentham ahi ahia? Na misi vui mai in” a chi hi.

¹⁶Abraham in Ephron thu a zuita a; Heth suante theih in Ephron in a genzah, dangka sekel za li, sumsinte zat zel a buk a, Ephron kiang ah a peta hi.

¹⁷Ephron lou, Mamre toh kizawn Makpel gam a om, a lou toh, asung a kawkhuk om toh, lou a sing om tengteng toh, a loukim a sing om tengteng toh,

¹⁸Heth suante mitmuh in, a khaw kulhkong a om peuhmahte muh in, gou ding in Abraham kiang ah piak kip in a omta hi.

¹⁹Huai nung in Abraham in a zi Sarah Kanan gam a Mamre toh kizawn, Hebron kichihna, Makpelah lou a kawkhuk ah a vuita hi.

²⁰Lou leh asung a kawkhuk om vuina mun ding in Abraham kiang ah Heth suante’n a pekipta uhi.