Read Paite Chin GENESIS 25 Bible Online

GENESIS 25 - Paite Chin bible

GENESIS 25

¹Huan, Abraham in zi dang a nei nawn a, a min Keturah ahi.

²Aman Zimran, Jokshan, Medan, Midian, Ishbak leh Shuah a neihsak hi.

³Jokshan in tapa Sheba leh Dedan a nei a, Dedan tapate Ashurim leh Letushim leh Leummim ahi uh.

⁴Midian tapate Ephah, Epher, Hanok, Abidah leh Eldah ahi uh. Huai tengteng Keturah tate ahi uhi.

⁵Abraham in a neih tengteng Isak a pia hi.

⁶A mei tapate kiang ah Abraham in thilpiakte a pia a; amah damlai ngei in a tapa Isak a kipan amaute suahlam gam ah a sawlmang hi.

⁷Abraham damsung kum za leh sawmsagih leh nga ahi.

⁸Abraham in a kha a khahta hi. Lu a kelsam pouvek in tekpi tekkun a dam in a si a, a chipihte kiang a pi in a omta hi.

⁹A tapa Isak leh Ishmael in Hit mi Zohar tapa Ephron lou a, Mamre phak ma a Makpel kawkhuk ah a vuita uh.

¹⁰Huai lou, Abraham in Hit suante apan a leisa ahi a, huai ah Abraham leh a zi Sarah a vui uhi.

¹¹Hichi ahi a, Abraham sih nung in, Pathian in a tapa Isak a vualzawl a; Isak Beer-lahai-roi ah a teng hi.

¹²Hiaite Abraham tapa Ishmael, Sarah sikhanu, Aigupta mi Hagar in Abraham a neihsak suante ahi uh.

¹³Hiaite a min chiat uleh a suante uh bangzel in Ishmael tapate min ahi. Ishmael tapa upapen Nebajoth ahi a, huai ban ah Kedar, Adbeel leh Mibsam,

¹⁴Misma, Dumah leh Massa,

¹⁵Hadar, Tema, Jetur, Naphish leh Kedemah ahi uh.

¹⁶Huaite Ishmael tapate ahi ua, huaite a khua uh bang leh a giahphual uh bangzel a a min uh gelh ahi a, a chi uh bangzel in kumpipa sawmlehnih ahi uhi.

¹⁷Ishmael damsung kum za leh sawmthum leh sagih ahi a; a kha a khah a, a si a, a chipihte kiang ah pi in a omta hi.

¹⁸A tapate Havilah gam a kipan Assuria gam lamsang a Aigupta gam phakma a Shur tan in a teng ua, a unau dangteng a kipan a tuamten uhi.

¹⁹Hiaite Abraham tapa Isak suante ahi uh: Abraham in tapa Isak a nei a.

²⁰Isak in Padan-aram gam a Suria mi Bethuel tanu, Suria mi Laban sanggamnu Rebekah zi a, a neihlai in kum sawmli a upa ahi.

²¹A zi a chiin ziak in Isak in TOUPA kiang ah a zi ading in nget petmah in a ngetsak hi. TOUPA’N a ngetna a ngaihkhiak sak a, a zi Rebekah a hong gaita hi.

²²Asung a a nau paite a kisual uhi; aman, “Hichibang a hih ngal leh, bangziak in ahia, ka hi chih?” a chi a; TOUPA dong ding in a kuanta hi.

²³TOUPA’N a kiang ah, “Na sul ah nam nih a om uh. Na gil sung a kipan nam nih a kikhen ding ua, Nam khat nam khat sang in a hat zaw ding. A upa zaw in a naupang zaw nna a sem ding” a chi hi.

²⁴A nau neih a hun in, ngai in, a sul ah phik a om hi.

²⁵Amasa zaw a san a san seksawk, puanmul bang a mul thiapthuap a hongpawt a, a min Esau a sa uh.

²⁶Huai nung in a nau a pawt nawn a, a khut in Esau khetul a lenkip a; amah min Jakob a sa uh. Rebekah in amaute a neihlai in Isak kum sawmguk a upa ahi.

²⁷Naupangte a hong khanglian ua; Esau sabetsiam, gamvakmi ahi a; Jakob mi mawl, puanin a teng mi ahi.

²⁸Isak in a sakhi sa a nek zel ziak in Esau a it a; Rebekah in bel Jakob a it hi.

²⁹Jakob in be a huan a; Esau gamkuan a hongtung a, a tawl mahmah hi.

³⁰Esau in Jakob kiang ah, “Hehpih in na be huan hon nesakin; ka bah mahmah hi” a chi hi. Huaiziak in ahi, a min Edom a chih uh.

³¹Jakob in, “Na tamasa hihna hon leisak phot lechin” a chi hi.

³²Esau in, “Ngai in, si dek ka hi ngal a; hiai tamasa hihna kei ading in bang a phatuam dia?” a chi hi.

³³Jakob in, “Tuni in ka kiang ah kichiam phot in” a chi hi. A kiang ah a kichiam a, a tamasa hihna Jakob kiang ah a khong maimah hi.

³⁴Jakob in Esau tanghou leh a be huan a pia a; aman ne in a dawn a, a thou a, a paita hi. Huchibang in Esau in a tamasa hihna a ngaineu hi.