Read Paite Chin GENESIS 26 Bible Online

GENESIS 26 - Paite Chin bible

GENESIS 26

¹Huan, huai gam ah, Abraham damlai a kial ke masapen chih louh, kial a hong kenawn a, Isak Philistiate kumpipa Abimelek kiang ah Gerar khua ah a va hohsuk hi.

²TOUPA a kiang ah a hong kilak a, “Aigupta gam ah hohsuk ken. K’on hilh ding gam ah teng in.

³Hiai gam ah omtadih inla, na kiang ah ka om dia, k’on vualzawl ding hi. Hiai gam tengteng nang kiang leh na suante kiang a pia in, na pa Abraham kiang a ka kichiamna ka hihkip ding hi.

⁴Van a aksi zah in na suante ka pungsak dia, hiai gam tengteng na suante kiang ah ka pelai ding hi. Na suan ah khovel a nam tengteng vualzawl in a om ding uh.

⁵Abraham in ka thu a mang a, ka thuhilhte, Ka thupiakte, ka thusehte leh ka dante a zuih ziak in” a chi hi.

⁶Huchi in Isak Gerar khua ah a teng hi.

⁷Huai khua a mite’n a zi tungtang a dong ua; aman, “Ka sanggamnu ahi, a chi hi. A mel a hoih ziak in hiai khua a mite’n Rebekah ziak in a honthat kha ding uh” chi’n, ‘ka zi ahi’ a chi ngamkei hi.

⁸Hichi a, huai a sawtpi a om nung in, Philistiate kumpipa Abimelek in tohlet a kipan a en a, ngai in, Isak in a zi Rebekah a thohlai a muta hi.

⁹Abimelek in Isak a sam a, “Ngai in, na zi a hina hi. Bangdia, ka sanggamnu ahi, chi maimah na hia?” a chi hi. Isak in a kiang ah, “Amah ziak in ka si kha ding, ka chih ziak ahi” a chi hi.

¹⁰Abimelek in, “Ka tung ua na thilhih bangchidan ahia? Mite lak a mi kuapeuh in na zi luppih kha thei uh a kei maw, ka tung uah siamlouhna n’on tungsak ding” a chi hi.

¹¹Abimelek mah in, “Kuapeuh hiai mi hiam, a zi hiam, khoih, hihlup ngeingei ding ahi” chi’n mi tengteng thu a pia hi.

¹²Isak in huai gam ah buh a ching a, huai kum in a leh za a nei hi. TOUPA’N a vualzawl hi.

¹³A hong thupi mahmah a, nakpitak a mi thupi hongsuak hial in a honglian huaihuai hi.

¹⁴Belamhon leh bawnghon a nei a, inkuan leng tampi a nei hi. Philistiate’n amah a haza uhi.

¹⁵A pa Abraham damlai a, a pa sikhate’n tuileh a toh tengteng uh Philistiate’n a hudim ua, lei in a hihdim vekta uhi.

¹⁶Abimelek in Isak kiang ah, “Ka kiang ua kipan paimang in, kou sang in lah na hatzaw ngal a” a chi hi.

¹⁷Isak huai a kipan a pawt a, Gerar guam ah a puanin a kai a, huai ah a tengta hi.

¹⁸Isak in a pa Abraham damlai a tuileh a tohte uh a tou nawn a; Abraham sih nung in Philistiate’n lah a na hudim vek ngal ua. A pa’n a min a na sak bangbang in a min a sa chiat hi.

¹⁹Isak sikhate’n guam ah a tou ua, huai ah tuileh naknei a mu uhi.

²⁰Gerar khua a ganpute’n, “Kou tui ahi,” chi’n Isak ganpute toh a kisel uh. Amah toh a kisel ziak un tuileh min Esek a sata hi.

²¹Tuileh dang a tou nawn ua; huai leng tuh tum in a kisel pih nawn ua; a min Sitnah a sa hi.

²²Huai a kipan a kisuan a, tuileh dang a tou nawn hi. Huai tuh tum in a subuai nawn kei uhi. Tuin, “TOUPA’N mun lianpi a hon bawlsakta a, hiai gam ah chi tampi i suang ding uhi” chi’n, a min Rehoboth a sa hi.

²³Huai a kipan Beer — sheba ah a hohtou hi.

²⁴Huai zan mah in TOUPA a kiang ah a hong kilak a, “Kei, na pa Abraham Pathian ka hi. Lau ken, na kiang ah ka om hi. K’on vualzawl dia, ka sikha Abraham ziak in na suante pungsak ding ka hi” a chi hi.

²⁵Huai mun ah maitam a doh a, TOUPA min a lou a, huai ah a puanin leng a kai hi. Isak sikhate’n huai ah tuileh a tou nawn uhi.

²⁶Gerar khua a kipan Abimelek, a lawm Ahuzaath toh, sepaih pawl heutu Phikol toh, a kiang ah a hoh uhi.

²⁷Isak in a kiang ah, “N’on ngaikei ua, na kiang ua pan n’on paimangsak ngal ua, bangchidan in ahia ka kiang a na hong uh?” a chi hi.

²⁸Amau, “TOUPA na kiang ah a om chih chiantak in ka thei ua, i kikal uah, kou leh nangmah kikal ah kichiam in thu i khung ding uh:

²⁹Na zakdah ka hih ngeilouh bang ua, thil hoih kia loungal na tung himhim a ka hihlouh ua, hoihtak a k’on paimangsak bang un, nang leng ka siatna ding himhim uh na hihlouhna ding in. Tuin nang TOUPA vualzawl na hita,” a chi uhi.

³⁰Huan amau ading in Ankuang a luisak a, ne in a dawn uhi.

³¹Zingsang in beltak in a thou ua, a kichiam tuah uhi. Isak in amau a paisak a, a kiang a kipan hoihtak in a pawtta uhi.

³²Hichi ahi a, huai ni mah in Isak sikhate a hong ua, tuileh toh thu a honghilh ua, a kiang ah, “Tui ka muta uh” a chi uh.

³³Aman huai tuileh Sheba a sa hi. Huaiziak in huai khaw min tutan in Beer — sheba ahi lai hi.

³⁴Esau kum sawmli a upa a hih in, Hit mi Beeri tanu Judith leh Hit mi Elon tanu Basemath zi in a nei hi.

³⁵Huaite Isak leh Rebekah lungtang hih gentheite ahi uhi.