Read Paite Chin GENESIS 27 Bible Online

GENESIS 27 - Paite Chin bible

GENESIS 27

¹Huan, hichi ahi a, Isak a hongtek a, khua mutheilou khop in a mit a hong mialta hi. A tapa upazaw Esau a sam a, a kiang ah, “Ka tapa” a chi hi. Aman a kiang ah, “Hiai ah ka om” a chi hi.

²Aman, “Ngai in, ka tek mahmahta a, ka sih ni ding lah ka theikei hi.

³Tuin hehpih in na vanzat, na thaltang leh na thalpeu tawi inla, va gamvak inla, sakhi hon va matsak in.

⁴Ka sih ma a k’on vualzawl theihna ding in, ka deihlam tak in meh ding in limtakin hon bawlsak inla, ka nek ding in ka kiang ah hontawi in” a chi hi.

⁵Isak in a tapa Esau a houpih lai Rebekah in a naza hi. Esau sakhi benga honpaw ding in a gamvakta hi.

⁶Rebekah in a tapa Jakob kiang ah, “Ngai in, na pa’n na u Esau kiang a a thugen ka za hi.

⁷Sakhi honpuak in, ka nek a, ka sih ma a TOUPA ma a k’on vualzawlna ding in, meh limtakin hon bawlsak in” a chi hi.

⁸“Ka tapa, tuin k’on thupiak bang in ka thu zui in.

⁹Ganhon lak ah va hoh inla, kelnou nih hoih tak, huai a kipan honla in. Huai a deihlam tak in na pa ading in meh limtakin ka na bawl ding.

¹⁰A sih ma a hon vualzawlsak ding in, a nek ding in na pa kiang ah na va paipih ding ahi” a chi hi.

¹¹Jakob in a nu Rebekah kiang ah, “Ngai in, ka u Esau mi mulhau ahi a, kei mi nel ka hi

¹²Ka pa’n a hon na zawt vialvial kha ding a, amah ading in khempa ka honghi ding a, vualzawl gentak louh hamsiat kizon lel ka hi kei ding maw” a chi hi.

¹³A nu’n, a kiang ah, “Ka tapa, na hamsiat muh ding ka tung ah om hen. Ka thu zui inla, hon valak in” a chi hi.

¹⁴A kuan a, a va la a, a nu kiang ah a hon paipih hi. A nu’n a pa deihlam tak in meh limtakin a bawl hi.

¹⁵Rebekah in a tapa upapen Esau puansilh hoihtak, a kiang a inn a om a la a, a tapa naupang zaw Jakob a silhsak hi.

¹⁶Huaiban ah kelnou vun leng a khut leh a ngawng nelna mun ah a phah hi.

¹⁷Mehlim tak leh tanghou a bawlte a tapa Jakob khut ah a pia hi.

¹⁸Amah a pa kiang ah a hoh a, “Pa aw” a chi a; aman, “Hiai ah ka om, ka tapa, kua zaw pen na hia?” a chi hi.

¹⁹Jakob in, a pa kiang ah, “Na tapa upa zaw Esau ka hi; n’on sawl bang in ka hihkhinta. Hehpih in thou inla, hon vualzawl ding in tu inla, ka sakhi sa ne in” a chi hi.

²⁰Isak in, a tapa kiang ah, “Ka tapa, bangchidan ahia, hong man gang na tel chia?” a chi hi.

²¹Isak in Jakob kiang ah, “Ka tapa, hehpih in hongnai dih, k’on zawt vialvial ding, ka tapa Esau na hina hiam” a chi hi.

²²Jakob in a pa Isak a va naih a; aman a na zawt vialvial a, “A aw Jakob aw hiven, a khutte lah Esau khutte hiven” a chi hi.

²³A u Esau khut bang a, a khut a mul ziak in amah a theikei hi. Huchi in amah a vualzawlta hi.

²⁴“Ka tapa Esau ngei na hi maw?” a chi a; aman, “Hi e” a chi hi.

²⁵Aman, “Hontawi nai in, k’on vualzawlna ding in ka tapa sakhi sa ka ne ding” a chi hi. A hontawi nai a, a neta a, uain leng a honla a, huai leng a dawn hi.

²⁶A pa Isak in a kiang ah, “Ka tapa, hongnai in, hontawp in” a chi hi.

²⁷A vanaih a, a tawp a, aman a puansilh gim a za a, a vualzawl hi. “En in, ka tapa gim TOUPA vualzawl gam gim bang ahi.

²⁸Pathian in van daitui, lei hoihna, buh tampi leh uain tampi honpia hen.

²⁹Nam tuamtuamte’n na nna sem uhenla, chi tuamtuamte na ma ah kun uhen. Na unaute tung ah toupa in om inla; na nu tate na ma ah kun uhen. Hon hamsiatte hamsiat in om uhenla, hon vualzawl peuhmah vualzawl in om hen” a chi hi.

³⁰Hichi ahi a, Isak in Jakob a vualzawl zohtakin, Jakob a pa Isak kiang a kipan a pawtkhe manlel in a unaupa, Esau sabeng a hongtung hi.

³¹Aman leng mehlimtakin a bawl a, a pa kiang ah, “Pa, thou inla, n’on vualzawlna ding in na tapa sakhisa ne in” a chi hi.

³²A pa Isak in, a kiang ah, “Kua na hia?” a chi a; aman, “Na tapa, na tapa upa zaw, Esau ka hi” a chi hi.

³³Isak nakpi’n a ling zungzung a, “Sakhi man a, ka kiang a, a sa hontawi, na hong tunma a, ka na nekkhit a, ka vualzawlpa kua ahia? Ahi, amah vualzawl in a om ding” a chi hi.

³⁴Esau in a pa thugen a zak in nakpitak leh khase mahmah in a kapta a, a pa kiang ah, “Pa aw, hon vualzawl in, keileng hon vualzawl mahmah ve aw” a chi hi.

³⁵Aman, “Na nau in a hong zekhem a, na vualzawlnate a hong laksakta hi” a chi hi.

³⁶Aman, “A min Jakob a chih uh dik mahmah hilou hia? Nihvei a hon suanta; ka tamasa hihna a hon laksak a; ngai in, tuin ka vualzawlna a hon laksak nawnta” a chi hi. Amahmah in, “Vualzawlna kei adia honsit saklou maw?” a chi hi.

³⁷Isak in a dawng a, Esau kiang ah, “Ngai in, amah na kumpipa in ka bawl a, a unau tengteng leng a sikha ding in ka pevek a, buh leh uain in leng ka vakta hi, nang ading in, ka tapa, bang hon hihsak ding ka hia?” a chi hi.

³⁸Esau in, a pa kiang ah, “Pa, Vualzawlna khat kia lel leng neilou na maw? Pa aw, keileng hon vualzawl mahmah ve” a chi hi.

³⁹Esau ngaihtak in a kapta a, A pa Isak in a dawng a, a kiang ah, “Ngai in, na tenna ding lei hoihna tak, tunglam a kipan van daitui kiakna mun ahi ding.

⁴⁰Na namsau in ahi, na hin ding, na nau nna leng nasem ding. Hichi ahi ding a, na kitutkhiak hun chiang in a hakkol na ngawng a kipan na singkheta ding” a chi hi.

⁴¹A pa’n Jakob a vualzawl ziak in Esau in a mudah hi. Esau in a lungsim in, “Ka pa sun ni ding a naita a, huaikhit chiang in ka nau Jakob ka that mai ding” a chi hi.

⁴²A tapa upa zaw Esau thugen Rebekah a hilh ua; mi a sawl a, a tapa naupang zaw Jakob a sam a, a kiang ah, “Ngai in, na u Esau in na tungthu ah, nangmah honthah tum in a ki khamuan hi.

⁴³huaiziak in, ka tapa, tuin ka thu mang in. Thou inla, Haran khua a ka sanggampa Laban kiang ah taimang in.

⁴⁴Na u hehna a daih mateng a kiang ah ni bangzah hiam va om phot in.

⁴⁵Na u hehna na tung a a daih a, a tung a na thilhih a mangngilh ma teng. A daih a, a mangngilh chiang in mi k’on sawl dia, huai a kipan ka hong pikhe sak ding. Bangdia ni khat a na nih ua hon tan ding ka hia?” a chi hi.

⁴⁶Rebekah in Isak kiang ah, “Hit tanute ziak in hin ka chimtak mahmah hi. Jakob in hiai gam nungak, hiai Heth tanute lak a mi zi dia a neihnawn ngial in zaw, kei ading in hin bang a phatuam dia?” a chi hi.