Read Paite Chin GENESIS 28 Bible Online

GENESIS 28 - Paite Chin bible

GENESIS 28

¹Huan, Isak in Jakob a sam a, a vualzawl a, thu leng a pia a, a kiang ah, “Kanan gam nungakte lak a mi zi in na nei ding ahi kei.

²Thou inla, Padan-aram gam a na nu pa Bethuel inn ah hoh inla, huai a kipan na nu sanggam pa Laban tanute lak a mi zi in va nei in.

³Pathian bangkim hihthei in hon vualzawl in, mipi tampite na hong hih theihna ding in chi tampi hon suangsak in, hon pungsak hen.

⁴Mikhual na hihna gam, Pathian in Abraham kiang a a piak na luah na ding in Abraham vualzawlna leng hon tangsak hen, nang leh na suante leng” a chi hi.

⁵Isak in Jakob a paimangsak a; Padan-aram gam a, Jakob leh Esau nu Rebekah sanggampa Suria mi Bethuel tapa, Laban kiang ah a paita hi.

⁶Esau in, Isak in Jakob a vualzawl a, zi nei ding in Padan-aram gam ah a paimang sak, chih leh a vualzawl lai a, Kanan gam nungakte lak a mi zi in na nei ding ahi kei,

⁷chi’n thu a pia chih leh Jakob in a nu leh a pa thumang in Padan-aram gam ah a paita chih a thei hi.

⁸Esau in Kanan gam nungakte’n a pa Isak lung a hihkim kei uh chih a thei hi.

⁹Esau Ishmael kiang ah a va hoh a, Abraham tapa Ishmael tanu Mahalath, Nebajoth sanggamnu, zi in a nei a, zi a neihsate ban ah a neih behlap ahi.

¹⁰Jakob Beer — sheba a kipan a pawt a, Haran kholam a zuanta hi.

¹¹Koilai mun hiam a tung a, ni a tumkhit ziak in huai ah a giakta hi. Huai a suang khat a la a; lukham in a nei a, huai ah ihmu ding in a lumta hi.

¹²Mang a nei a, ngai in, leitung ah lei a hong kidoh a, a dawn in van a sun hi. Ngai in, a tung ah Pathian angelte kahtou in a kumsuk uhi.

¹³Ngai in, a dawn ah TOUPA ading a, “Kei TOUPA, na pu Abraham Pathian leh Isak Pathian ka hi. Na lupna gam nang leh na suante kiang ah k’on pe ding.

¹⁴Na suante lei a leivui zah ahi ding ua, tumlam, suahlam, mallam leh simlam ah na dalhzak ding uh. Nang ah leh na suan ah khovel a namchih vualzawl in a om ding uh.

¹⁵Ngai in, na kiang ah ka om a, na paina peuh ah k’on veng dia, hiai gam ah k’on pi kiknawn ding. Na kiang a ka gen ka hih masak keileh k’on nuse kei ding” a chi hi.

¹⁶Jakob ihmu a hong khanglou a, “Hiai mun ah TOUPA a om ngeingei hi. Ken lah ka na theikei a” a chi hi.

¹⁷A lau a, “Hiai mun lauhuai na mah e! Hiai mun dang hilou in, Pathian inn na hi eive, hiai van kongpi na hi eive” a chi hi.

¹⁸Jakob zingkhang in a thou a, a suang lukham a la a, suangphuh in a phut a, a dawn ah sathau a buak hi.

¹⁹Huai mun min Bethel a sa a; a khaw min bel a tung in Luz ahi.

²⁰Jakob in, “Pathian ka kiang a om a, ka paina lampi a a hon ven a, nekding tanghou leh silh ding puansilh TOUPA’N a honpiak a,

²¹Ka pa inn a lungmuangtak a ka hongpai nawn leh TOUPA, ka Pathian ahi ding.

²²Hiai suang ka phuh leng Pathian inn ahi dia; ka kiang a na honpiak ding tengteng a sawm a khat k’on pe ngeingei ding,” chi in a kichiamta hi.