Read Paite Chin GENESIS 3 Bible Online

GENESIS 3 - Paite Chin bible

GENESIS 3

¹Huan, TOUPA Pathian in gamsa a bawl tengteng lak ah gul a gitlouhpil pen hi. Aman numei kiang ah, “Pathian in, ‘huan a singgah himhim na ne ding uh ahi kei chi ahi maw?’ ” a chi hi.

²Numei in gul kiang ah, “Chilou e, huan a singgahte ne thei mah ung.

³Huan laizang a sing gah Pathian in, ‘Na ne ding uh ahi kei, khoih leng na khoih ding uh ahi kei, huchilou in zaw na si ding uh chi a ka’ ” a chi hi.

⁴Gul in numei kiang ah, “Si zenzen lou e.

⁵Na nek ni ua pat na mit uh a hongvak dia, a hoih leh a sia thei in pathiante na hong bang ding uh, chih Pathian in thei kilkel eive,” a chi hi.

⁶Numei in singgah nektheih ahi chih leh mit hiptak ahi chih leh mi pilsak dia singgah etlah huai ahi, chih a theih in a gah a lou a, a neta hi. A kiang a om a pasal leng a pia a, aman leng a neta hi.

⁷A nih un a mit uh a hong vakta a, vuaktang a hih uh hong kithei ua; theipi nah a khui khawm ua, puan a kibawl tawm uhi.

⁸TOUPA Pathian, nitaklam ninem a huan a vak aw a za ua; Adam leh a zi in huan a singlak ah TOUPA Pathian a na kibuksanta uhi.

⁹TOUPA Pathian in Adam a sam a, a kiang ah, “Kaw om na hia?” a chi hi.

¹⁰Aman, “Huan ah na aw ka za a, vuaktang ka hih ziak in ka lau a; ka na kibuta,” a chi hi.

¹¹Aman, “Vuaktang na hih kua’n honhilh ahia? Singgah neklouh ding ka chih ne na hita maw?” a chi hi.

¹²Adam in, “Hon ompih dia n’on piak numei in singgah a honpia a, ne kei ve” a chi hi.

¹³TOUPA Pathian in, numei kiang ah, “Na thilhih bangchidan ahia?” a chi hi. Numei in, “Gul in a hon zekhem a, ne kei ve” a chi hi.

¹⁴Pathian in, gul kiang ah, “Hichibang a na hih ziak in ganhing tengteng leh gamsa chiteng lak ah hamsiat na hi tuanse dia, khupboh in na pai gige dia, na damsung in leivui na ne ding ahi.

¹⁵Nang leh numei k’on kidou sak dia, na suante leh a suante leng ka kidou sak lai ding. Huai in na lutang a sidup sak dia, nang a khetul na sidup sak ding” a chi hi.

¹⁶Numei kiang ah, “Na haksatna leh na naupaina nakpi’n ka pungsak dia; haksatak in tate na nei ding. Himahleh na deihlam na pasal lam ahi dia, aman na tung ah thu a nei ding” a chi hi.

¹⁷Adam kiang ah, “Na zi thu na man a, singgah na ne ding ahi kei, chi a, k’on thupiak na nek ziak in leitung nang ziak in hamsiat in a omta hi. Na damsung teng in gimtak a sem in a gah na neta ding hi.

¹⁸Ling leh louling neite leng a hon omsak dia, lei a anteh na neta ding hi.

¹⁹Lei a na kiknawn masiah na mai a kho-ul luang puappuap in an na neta ding. Lei apan lakkhiak na hi. Leivui na hi a, leivui ah na kiknawn ding” a chi hi.

²⁰Adam in a zi, mihing tengteng nu a hih ziak in, a min Evi a sa hi.

²¹TOUPA Pathian in Adam ading leh a zi ading in savun puanaktual a bawlsak a, a silhsak hi.

²²TOUPA Pathian in, “Ngai un, mihing in a hoih leh a sia thei in eite bang a hong hita. Tuin a khut a sawk in hinna singgah lou a ne in, tangtawn in a hing kha ding uh” a chi hi.

²³Huaiziak in, TOUPA Pathian in amah a lakkhiakna leilet ding in Eden huan a kipan a sawlkheta hi.

²⁴Mihingte a delhkheta a; hinna sing lampi veng ding leh Eden huan suahlam pang ah Cherubte leh mei namsau kilek zualzual a omsakta hi.