Read Paite Chin GENESIS 30 Bible Online

GENESIS 30 - Paite Chin bible

GENESIS 30

¹Rakil in Jakob ta himhim a neihsak kei chih a kitheih in a sanggamnu a hazata hi. Jakob kiang ah, “Tate honpia in, huchilou in zaw ka si ding” a chi hi.

²Rakil tung ah Jakob a heh a, “Gilgah hon pelou Pathian bang ka hi ahia?” a chi hi.

³Aman, “En in, ka sikhanu Bilhah luppih in. Huchi in ken leng amah a kipan tate ka neihsam theihna ding in ka phei tung ah ta k’on nei ding hi” a chi hi.

⁴A sikhanu Bilhah a zi ding in a pia a, Jakob in amah a na luppih hi.

⁵Bilhah a gai a Jakob ta a neihsakta hi.

⁶Rakil in, “Pathian in a hon ngaihtuah a, ka aw leng a za a, tapa a honpia” a chi hi. Huaiziak in, a min Dan a sa hi.

⁷Rakil sikhanu Bilhah a gai nawn a, Jakob tapa dang a neihsak nawn hi.

⁸Rakil in, “Nakpitak in ka sanggamnu ka buan a, ka zouta” a chi a; a min Naphtali a sa hi.

⁹Leah in ta dang a nei nawn kei chih a kitheih in, a sikhanu Zilpah a pi a, a zi ding in Jakob kiang ah a pia hi.

¹⁰Leah sikhanu Zilpah in Jakob tapa a neihsak hi.

¹¹Leah in, “Vangphathuai mah ei” a chi a; a min Gad a sa hi.

¹²Leah sikhanu Zilpah in Jakob tapa dang a neihsak nawn hi.

¹³Leah in, “Hampha natel ing e! Numeite’n hampha honchi ding uh eive” a chi a; a min Asher a sa hi.

¹⁴Buhlak lai in Reuben in gamlak ah zawl-ai a va mu a; a nu Leah kiang ah a hontawi hi. Rakil in Leah kiang ah, “Hehpih in na tapa zawl-ai a khen hon pedih,” a chi hi.

¹⁵Aman a kiang ah, “Ka pasal n’on suhsak thilduai ahi hia? Ka tapa zawl-ai leng hon suh sak na tum nawn lai maw?” a chi hi. Rakil in “Na tapa zawl-ai sik in tuzan in a hon luppih ding,” a chi hi.

¹⁶Nitaklam in Jakob gamlak a kipan a hongtung a, a dawn ding in Leah a kuan a, “N’on luppih ding ahi. Ka tapa zawl-ai in k’on guaita ngal a” a chi hi. Huai zan in amah a luppihta hi.

¹⁷Pathian in Leah thumna a ngaikhia a, a gai a, Jakob tapa ngana a neihsak nawn hi.

¹⁸Leah in, “Ka sikhanu ka pasal kiang a ka piak ziak in Pathian in ka loh honpia eive” a chi a; a min Issakar a sa hi.

¹⁹Leah a gai nawn a, Jakob tapa gukna a neihsak nawn hi.

²⁰Leah in, “Pathian in thil hoihtak a hon neisak a; tuin zaw ka pasal tapa guk ka neihsak tak ziak in, ka kiang ah a tengta ding” a chi a; a min Zebulun a sa hi.

²¹Huai nung in tanu a nei nawn a, a min Dinah a sa hi.

²²Pathian in Rakil a theigige a, Pathian in a thumna a ngaikhia a, a sul a hon sak hi.

²³Amah a gai a, tapa a nei a; “Pathian in ka minsia a la mangta” a chi hi.

²⁴“TOUPA’N tapa dang honpiak beh ding” chi’n, a min Joseph a sa hi.

²⁵Hichi ahi a, Rakil in Joseph a neih nung in, Jakob in Laban kiang ah, “Kei ka omna ngei ah, ka gam ah hon paisakta in aw.

²⁶Na nna ka sepsan ka zite leh ka tate honpia inla, hon paisak in. Na nna k’on sepsak dan lah na thei ngal a” a chi hi.

²⁷Laban in a kiang ah, “N’on hehpihtheih leh omtadih lai ve. TOUPA’N nang vang in a hon vualzawl, chih aisan in ka thei hi” a chi hi.

²⁸Amahmah in, “Na loh ding sep inla, honhilh dih, k’on pe ding” a chi hi.

²⁹Aman, a kiang ah, “Bangchi’n na nna ka sem a, bangchi’n na gan ka kiang ah a om ua, na thei a kei hiam?

³⁰Ka hong ma in tawmchik kia na nei a, tu’n zaw tampi a hong phata uhi. Ka kalsuanna peuh ah TOUPA’N nang a hon vualzawl hi. Himahleh chikchiang in ahia ka inkuante adia ka sepkhiak sam ding?” a chi hi.

³¹Aman, “Bang k’on pedia?” a chi a; Jakob in, “Bangmah na honpiak ding ahi kei. Hiai thil hihsak leh na ganhon ka khah dia ka chingnawn ding hi.

³²Tuni in na ganhon ka va enkhe vek dia, belam lak a, a vom gial petmah a gial leh a vom a gial zekzek leh a vom peuhmah, kel lak a, a kang a gial petmah a gial leh a kang a gial zekzekte huai a kipan ka pituam zel ding hi. Tuban huchibang a hong piang peuhmah ka loh ahita ding hi.

³³Tuban na mitmuh a khial a ka omna thu ah na hongpai hun chiang in, ka diktatna in a hon dawnsak mai ding. Kel lak a a kang a gial petmah a gial lou leh a kang a gial zekzek lou leh belam lak a a vomlou ka kiang a na muh peuhmah ka guk in na sepmai ding” a chi hi.

³⁴Laban in, “Ngai in, na gen bang tak hile a ke” a chi hi.

³⁵Huai nitakin keltal a kang a gial leh a kang a gial zekzek teng leh kelnu a kang gial petmah a gial leh a kang a gial zekzek teng a kanna om peuhmah, belam lak a a vom tengteng toh a pituam a, a tapate khut ah a pia hi.

³⁶Amah leh Jakob kikal ah ni thum lam a omsak a; Jakob in Laban ganhon dangte a ching nawn hi.

³⁷Jakob in hiangzau sing leh makha sing leh sesing chiang hing a la a, a hawng a khokngou chiat a, chiangte ah angoute a kilangsak hi.

³⁸A chiang hawng khohte ganhonte’n tui a hong dawnzelna tuikuangte ah, tui luannate ah leh ganhonte mazawn zel ah a koihta hi; tuidawn dia a hongpai chiang ua a gaina ding un.

³⁹Ganhonte chiangte ma ah a gai panta ua, a gialte, gial petmah a gialte, a gial zekzekte a hon neizel uhi.

⁴⁰Jakob in belamnoute a koihtuam a, ganhonte Laban ganhon lak a, a gial leh a vom tengteng lam a ngasak zel a; amah ganhonte a koihtuam zel a, Laban gan lak ah a koih kei hi.

⁴¹Hichi ahi a, gannu hatzawte a huk chiang un, a gai theihna ding un Jakob in tuiluanna ah, gan mitmuh in chiangte a koih zel hi.

⁴²Himahleh gannu a hatloute mai ah a koih kei hi. A nou hatloute Laban a ahi ua, a hatte Jakob a ahi zel uhi.

⁴³Jakob nakpi’n a hongpung a, ganhon thupitak, sikhanute, sikhapate, sangawngsaute leh sabiltungte a neita hi.