Read Paite Chin GENESIS 32 Bible Online

GENESIS 32 - Paite Chin bible

GENESIS 32

¹Jakob a pai zel a, Pathian angelte’n a na tuak uhi.

²Jakob in amau a muh in, “Hiai Pathian giahphual ahi” a chi a; huai mun Mahanaim a sa hi.

³Jakob in, Edom gam, tua Seir gam ah a ma ah thangkoute Esau kiang ah a sawl hi.

⁴A kiang uah, ka toupa Esau kiang ah hichi’n na gen ding uh. “Na sikha Jakob in hichi’n a chi. Laban kiang ah mikhual ka hi a, tutan ka om nilouh hi.

⁵Bawngtalte, sabiltungte leh belamte, sikhapa leh sikhanute ka nei hi. Na hehpihna ka muh theihna dia ka toupa hilh ding in mite k’on sawl hi.”

⁶Thangkoute Jakob kiang ah a hong kiknawn ua, “Na u Esau kiang ka va tung ua, mi za li toh nang dawn ding in a hongpai hi” chi’n, a gen uhi.

⁷Jakob in a lau mahmah a, a lungkhamta hi. A kiang a mi omte, belamhonte, bawnghonte leh sangawngsaute pawl nih in a khen hi.

⁸Esau hongpai a, pawl khat a thah leh leng pawl khat omlai taimang thei ding, a chi hi.

⁹Jakob mah in, “Aw ka pa Abraham Pathian, ka pa Isak Pathian, TOUPA, Na gam ah leh na tanaute kiang ah pai nawnta in. k’on hih hoih ding, hon chipa,

¹⁰Na sikha tung a hehpihna na muhsak leh thutak tengteng na muhsak lak a, a neupen leng mutak ka hi kei. Hiai Jordan lui ka chiang kia toh ka kan a; tuin zaw pawl nih hial ka hong hita uhi.

¹¹Hehpih in ka u khut a kipan, Esau khut a kipan, hon humbit in. Huchilou in zaw kei leh numei naupang tan in a honthat kha ding, chih ka lau hi.

¹²Nang k’on hihhoih ngeingei dia, na suante tuipi a piaunel simzohlouh tanhiala a tam bang in ka bawl ding n’on chi ngal a” a chi hi.

¹³Huai zan in huai ah a giakta a; a neihlak a kipan a u Esau ading thilpiak a lakhia hi.

¹⁴Kelpi za nih, keltal sawmnih, belampi za nih leh belampa sawmnih,

¹⁵Sangawngsau zatlai sawmthum a noute toh, bawngpi sawmli leh bawngtal sawm, sabengtungpi sawmnih leh sabiltung nou sawm.

¹⁶Hiaite pawl chih a tuam chiat in a sikhate khut ah a kem sak a, a sikhate kiang ah, “Ka ma ah pai galkah unla, pawl chih kalnei sak zel un,” a chi hi.

¹⁷A makaipa kiang ah, “Ka u Esau in a hontuah a, na kiang a, kua na hia? Kaw hoh dek na hia? Na ma a om kuate ahi ua? chi a a hondot leh,

¹⁸Na sikha Jakob a ahi ua; Ka pu Esau, nang ka toupa adia a hon khak thilpiak ahi. Ngai in, amah ka nung uah a om, na chi ding” chi in thu a pia hi.

¹⁹A nihna leh a thumna leh ganhon hawlte tengteng kiang ah leng, “Esau na muh chiang un huchibang mah in na gen ding uh.

²⁰Ngai in, na sikha ka nung uah a om, chi chiat un” chi in thu a pe chiat hi. “Thilpiak ka ma ah pai leh a lung ka damsak dia, huai nung in a mel ka mu ding. Huchi in, a hon na kipahpih ding,” a chi hi.

²¹Huchi in, thilpiak a ma ah a pai galkah sak a; amah huai zan in a pawlte lak ah a giak hi.

²²Zan in a thou a, a zi nihte leh a sikhanu nihte leh a tapa sawmlehkhatte a pi a, Jabbok lui ngahna ah a kanta hi.

²³Amau a pi a, lui a kan ua, a neih tengteng leng a kansak vek hi.

²⁴Jakob amah kia in a omta a, mi khat toh phalvak tan a kibuan uhi.

²⁵A zoukei, chih a kitheih in a pheipi guhtuah a khoihsak a, a kibuan lai un Jakob pheipi guhtuah a kilawita hi.

²⁶Aman, “Honkhah in, phalvak ding ahita,” a chi hi; aman, “N’on vualzawl keileh k’on khah kei ding” a chi hi.

²⁷Aman a kiang ah, “Na min bang ahia?” a chi a; aman, “Jakob” a chi hi.

²⁸Aman, “Na min Jakob ahi nawn kei ding, Israel a honchi zawta ding uh. Pathian leh mihingte na buan a, na zouta ngal a” a chi hi.

²⁹Jakob in amah a dong a, “Hehpih in na min honhilh in” a chi hi. Aman, “Bangziak in ahia ka min n’on dot?” a chi hi. Huai ah a vualzawlta hi.

³⁰Jakob in huai mun min “Peniel” a sa hi. “Pathian a mai chin mahmah ah ka mu a, ka hinna a hawi ziak in” a chi hi.

³¹Peniel a khenlai in, ni a hongsuak a, amah a honsun a, a pheipi ziak in a baita hi.

³²Huaiziak in, Jakob pheipi guhtuah a sadual tak a khoih sak ziak in tutan in Israel suante’n pheipi guhtuah a sadual om a ne ngeikei uhi.