Read Paite Chin GENESIS 33 Bible Online

GENESIS 33 - Paite Chin bible

GENESIS 33

¹Huan, Jakob a dak a, ngai in, Esau a kiang a mi za li toh a hongpai hi. Huchi in Leah, Rakil leh sikhanu nihte kiang ah a tate a omsak khipkhep hi.

²Sikhanute leh a tate a makai in a koih a, Leah leh a tate a zom in a koih a, Rakil leh Joseph bel a nanungpen in a koih hi.

³Amah a ma uah a pai a, a u kiang chin a tun masiah sagihvei leisi in a kun hi.

⁴Himahleh Esau amah mu ding in a tai a, a pom a, a ngawng a kun in a tawp a, a kap uhi.

⁵Esau a dak a, numeite leh naupangte a mu a; “N’on pite kuate ahi ua?” a chi hi. Aman, “Pathian in hehpihtak a na sikha kiang a a piak naupangte ahi uh” a chi hi.

⁶Sikhanute leh a tate uh a hongpai ua, a kun uhi.

⁷Leah leng a tate toh a hongpai nai ua, a kun ua, huaikhit in Joseph leh Rakil leng a hongpai nai ua, a kun uhi.

⁸Esau in, “Ka ganhon kituahpih tengpi bang na chihna ahia?” a chi hi. Aman, “Ka toupa, na hehpihna ka muh theihna ding in ka chi a ahi” a chi hi.

⁹Esau in, “Ken leng hau veng e, bawi aw, na neih tengteng nang a hi hen” a chi hi.

¹⁰Jakob in, “Hilou e, n’on hehpih theih leh hehpih in k’on thilpiakte hon sansak in. Pathian mel mu bang in na mel ka mu a, ka tung ah lah na kipak ngal a.

¹¹Pathian in hon hehpih ziak leh a kiching ka neih ziak in k’on thilpiakte sang in” a chi hi. Huchi in a kun a, aman a sangta hi.

¹²Esau in, “Kisa in, pai ni, na ma ah ka pai ding” a chi hi.

¹³Aman a kiang ah, “Naupangte a neulai dan uleh belamhon ka kiang a omte a nou a hih dan uh, ka toupa, na thei hi. Ni khat lel leng hatlua a, a hawl uleh ganhon tengteng a sivek ding uhi.

¹⁴Ka toupa, hehpih in na sikha ma ah pai inla; Ken Seir tang ah, ka toupa, na kiang ka tun mateng, ka ma a gante a paitheih hun bangbang uleh naupangte a paitheih hun bangbang un, awlawl in k’on masuan zel ding” a chi hi.

¹⁵Esau in, “Ka kiang a om mi khenkhat hon nutsiat leng a ke” a chi hi. Aman, “A poimawh khol ahia? Ka toupa mitmuh in hehpihna hon musak in” a chi hi.

¹⁶Huai ni mah in Seir tanglam zuan in Esau a kiknawnta hi.

¹⁷Jakob Sukkoth mun ah a pai a, amah ading inn a lam a, a gante adin leng buktate a lam hi. Huaiziak in, huai mun min Sukkoth a sa hi.

¹⁸Jakob Padan-aram gam a kipan a hong a, lungmuangtakin Sekem khua, Kanan gam a om, a tung a, khopi ma ah a puanin a zakta hi.

¹⁹A puanin zakna mun, Sekem pa Hamor tate a kipan, dangka za khat in a lei hi.

²⁰Huai ah maitam a doh a, a min El-Elohe-Israel a sa hi.