Read Paite Chin GENESIS 34 Bible Online

GENESIS 34 - Paite Chin bible

GENESIS 34

¹Huan, Leah tanu Dinah, Jakob a neihsak, huai gam nungakte mu ding in a pawtkhia hi.

²Hiv mi Hamor, huai gam kumpipa tapa Sekem in amah a na mu a; a man a, a luppih a, a hihnin hi.

³A lungsim Jakob tanu Dinah tung ah a om bikbek a, huai nungak lah a it a, amah kamsiam tak in a houpih hi.

⁴Sekem in a pa Hamor a houpih a, “Huai nungak zi ding in hon neisak in” a chi hi.

⁵Jakob in a tanu Dinah a ninsak khin, chih a za a; a tate gamlak ah a gan lak uah a om uhi. Huchi in, a hongtun mateng uh Jakob a daidide hi.

⁶Sekem pa Hamor Jakob houpih ding in a kiang ah a hoh hi.

⁷Jakob tapate’n a zaktak un gamlak a kipan a hong paita ua; Jakob tanu luppih in Israelte lak a thil gilou haihuai tak, thilhih hetlouh ding, a hih ziak in a lungkham ua, a heh mahmah uhi.

⁸Hamor in amau a houpih a, “Ka tapa Sekem lungsim na tanu uh tung ah a om bikbek a, hehpih in zi ding in neisak ve ua,

⁹Kila tuah ve ni e; na tanute uh hon lasak unla, ka tanute u leng la sam un.

¹⁰Ka kiang uah na teng ding ua; gam leng a kiching gige ding. Hiai ah teng unla, sumsin unla, hiai ah kihih inbul un” a chi hi.

¹¹Sekem in nungak pa leh a sanggampate kiang ah, “Hon hehpih un, ka kiang a na gen peuh uh k’on pe ding.

¹²Man leh thilpiak zaw bangzah gen le uchin, na chih bangbang uh k’on pe ding. A bang hileh, nungak pen zi ding in hon neisak phot un” a chi hi.

¹³Jakob tapate’n a sanggamnu uh Dinah a nitsak ziak in Sekem leh a pa Hamor zekhem in a dawng ua, a kiang uah,

¹⁴“Hiai thil zeksumlouh mi kiang a ka tanu uh piak pen ka hih theikei ding uh. Huai lah kou ading in minsiatna ahi ngal a.

¹⁵Hichibang a kichiam kia in na thu uh pha ka sa ding uh. Na lak ua pasal peuhpeuh kou bang a zeksum in om uhen.

¹⁶Huchi in ka tanute uh na nei ding ua, kou leng na tanute uh ka neisam ding uh. Na kiang uah ka teng ding ua, chi khat i hi ding.

¹⁷Himahleh, zeksum thu a ka thu uh na zuihkei ding uleh, ka tanu uh ka pi ding ua, ka paimai ding uh” a chi uhi.

¹⁸A thugen un Hamor leh Hamor tapa Sekem a kipaksak hi.

¹⁹Tangval in Jakob tanu a deih mahmah ziak in huai thil sawt hallou in a hihta hi. Amah a pa inkuan tengteng lak a mite zahtak pen ahi.

²⁰Hamor leh a tapa Sekem in a khaw kulh kongkhak uh a pha ua, a khote uh a houpih uhi.

²¹“Hiai mite kituahpih tak in a om uh. Huaiziak in hiai gam a teng in, hiai ah sumsin uhen. Ngai un, amau ading in gam lah a za ngal a. A tanute uh zi in nei lehang, i tanute uh leng neisak sam ni.

²²Himahleh nam khat i hong hihna ding a i kiang a ten theihna ding un hichibang a i chiam kia in huai mite’n pha a hon sak pih ding uhi. Zeksum a hih bang ua i lak ua pasal peuhpeuh zeksum hong hita lehang.

²³A gante uh, a sumte uh, a sa tengteng uh ei a ahi vekkei dia hia? A thu uh phasak pih maive ni, Huchi in i kiang uah a teng ding uhi” a chi uhi.

²⁴Hamor leh a tapa Sekem thu a khaw kulh kongkhak a pawt khe tengteng in a zui ua; a khaw kulh kongkhak a pawtkhe tengteng, pasal peuhpeuh zek a sumsak uhi.

²⁵Hichi ahi a, a ni thum ni a, na a thuaklai un, Jakob tapate lak a nih, Dinah sanggampa Simeon leh Levi in a namsau uh tawi tuak in a guk in khua a va sualta ua, pasal tengteng a thatgam uhi.

²⁶Hamor leh a tapa Sekem namsau hiam in a that ua, Sekem inn a kipan Dinah a pi ua, a pawtta uhi.

²⁷Jakob tapate’n a mi thahte uh a va phanawn ua, a tanu uh a nitsak ziak un huai khua a lokta uhi.

²⁸A belamhonte uh, a bawnghonte uh, a sabiltungte uh, a khua ua thil omte leh a lou ua thil omte a laksak uhi.

²⁹A sum tengteng uleh a ta a nau neu chikchik leh a zite uh tengteng sal in a man ua, inn tengteng a lok uhi.

³⁰Jakob in Simeon leh Levi kiang ah, “Nou hiai gam a tengte lak a, Kanante leh Perizte lak ah, huat n’on pawsak ua, n’on lungzingsak mahmah uh. Kei tawmchik ka hih ziak in hon sual ding in a kikhawm khawm ding ua, a honthat mai ding uhi. Huchi in, hihmang in ka om ding a, kei leh ka inkuanpihte toh” a chi hi.

³¹Amau, “Ka sanggamnu uh kizuak bang a a bawl ding ahi ahia?” a chi uhi.