Read Paite Chin GENESIS 35 Bible Online

GENESIS 35 - Paite Chin bible

GENESIS 35

¹Huan, Pathian in Jakob kiang ah, “Thou inla, Bethel ah hohtou in, huai ah teng in. Na u Esau a kipan na taimanglai a, na kiang a kilak Pathian ading in huai ah maitam doh in” a chi hi.

²Jakob in a inkuanpihte leh a kiang a om tengteng kiang ah, “Na lak ua om gamdang pathiante koihmang unla, kihihsiangthou unla, na puansilhte uh kheng un.

³I thou ding ua, Bethel ah i paitou ding uh. Ka lungzin lai a hon dawng, ka paina a ka kiang a om zel Pathian ading in maitam ka doh ding” a chi hi.

⁴Huchi in gamdang pathiante a khut ua om tengteng leh a bil ua bilbah a bah tengteng uh Jakob kiang ah a pia uhi. Jakob in Sekem khaw kiang a tosaw nuai ah a phum hi.

⁵A pai ua, a kim ua khuate’n a lau mahmah ua, Jakob tapate a delhkei uhi.

⁶Jakob Kanan gam a Luz khua a tung a, amah leh a kiang a om tengteng toh, Luz Bethel ahi.

⁷Huai ah maitam a doh a, a u a kipan a taimanglai a, a kiang a Pathian a kilak ziak in huai mun min El Bethel a sa hi.

⁸Rebekah donnu Deborah a si a, Bethel khang a tawsaw nuai ah a vui ua; a tawsaw min Allon bakuth a sa uhi.

⁹Jakob Padan-aram gam a kipan a hongtun in Pathian a kiang ah a kilak nawn a, a vualzawl hi.

¹⁰Pathian in a kiang ah, “Na min Jakob ahi a; na min Jakob ahi nawn kei ding a, na min Israel ahi zawta ding” a chi hi. Huchi in, a min Israel a sata hi.

¹¹Pathian mah in a kiang ah, “Kei Pathian bangkim hihthei ka hi. Chi tampi suang in hongpung in. Chichih tham ngial leh chi tuamtuam omkhawm leng nang ah a hongom ding ua, na khal a kipan kumpipate leng a hongpawt ding uhi.

¹²Abraham leh Isak kiang a ka gam piak na kiang ah k’on pe ding. Na omlouh nung chiang in na suante kiang ah leng gam ka pe zel ding” a chi hi.

¹³Pathian in a houpihna mun a kipan Jakob a paitouh santa hi.

¹⁴A houpihna mun ah Jakob in suangkhuam a phut a; a tung ah dawn thillat a buak a, a tung ah sathau leng a buak hi.

¹⁵Jakob in, Pathian in a houpihna mun min Bethel a sa hi.

¹⁶Bethel a kipan a pai ua; Ephrath khaw tunna ding gamlatak ahihlaiin Rakil in nau a veia, a nakvei mahmah hi.

¹⁷Hichi ahi a, a gim laitak in naudommi’n, “Lau ken, hiai tapa leng na nei ding” a chi hi.

¹⁸Hichi ahi a, a kha a pawtlaiin, a sita a, a min Ben Oni a sa a; himahleh a pa’n Benjamin a sa hi.

¹⁹Rakil a sita, Ephrath lampi ah a vui uhi, Ephrath khua Bethlehem khua ahi.

²⁰A han tung ah Jakob in suang a phut a; huai tunitan in Rakil han suangphuh ahilai hi.

²¹Israel a pai zel a, Migdol Eder khenlam ah a puanin a kai hi.

²²Hichi ahi a, Israel huai gam a a omlai in Reuben in a pa mei Bilhah a va luppiha; Israel in huai a za hi.

²³Jakob tapate sawmlehnih ahi uh. Leah tapate Reuben, Jakob ta upapen, Simeon, Levi, Judah, Issakar leh Zebulun ahi uh.

²⁴Rakil tapate Joseph leh Benjamin ahi uh.

²⁵Rakil sikhanu Bilhah tapate Dan leh Naphtali ahi uh.

²⁶Leah sikhanu Zilpah tapate Gad leh Asher ahi ua; huaite Jakob tapa, Padan-aram gam a a neihte ahi uhi.

²⁷Jakob Kiriath Arba khua a Abraham leh Isak omna Mamre ah a pa Isak kiang a tungta hi. Kiriath Arba khua Hebron ahi.

²⁸Isak damsung kum za leh sawmgiat ahi.

²⁹Isak in a kha a khahta a, upapi tekkuna damin a si a, a chipihte kiang ah piin a omta hi. A tapate Esau leh Jakob in amah a vuita uhi.