Read Paite Chin GENESIS 38 Bible Online

GENESIS 38 - Paite Chin bible

GENESIS 38

¹Huailai in, hichi ahi a, Judah a unaute kiang a kipan a paisuka, Adullam mi khat a min Hirah a vabel hi.

²Judah in huai ah Kanan mi khat tanu a min Shuah a mu a; a kitenpiha, a luppihta hi.

³Huchi in a gaia, tapa a nei a; Judah in a min Er a sa hi.

⁴A gai nawn a, tapa a neinawn a; a nu’n a min Onan a sa hi.

⁵Tapa a neinawna, a min Shelah a sa a; amah a neihlai in Judah Kezib khua ah a om hi.

⁶Judah in a ta masa Er ading in zi a pisak a, a min Tamar ahi.

⁷Judah ta masa Er TOUPA mitmuh in a gilou a; TOUPA’N amah a that hi.

⁸Judah in Onan kiang ah, “Na u zi luppih in kitenpih inla, na u ading in chi suahsak in” a chi hi.

⁹Onan in chisuah ding pen amah suan ahi kei ding, chih a thei hi. Hichi ahi a, a u zi a luppih teng in a u adia chi a suahsak louhna ding in a chi lei ah a kesak hi.

¹⁰A thilhih in TOUPA a lungkim sakkei a, huaiziak in amah leng TOUPA’N a that hi.

¹¹Judah in a mounu Tamar kiang ah, “Ka tapa Shelah a pichin mateng na pa inn ah meithai in va omtadih in” a chi hi. Huchilou in zaw amah leng a ute bang in a si kha ding, a chi hi. Huchi in, Tamar a pai a, a pa inn ah a va omta hi.

¹²A nung in Shuah tanu Judah zi a si a; Judah a hong khamuan in Timnah khua ah a belam mulmette kiang ah a lawm Adullam mi Hirah toh a hohtou uhi.

¹³Mi’n Tamar, “Na pasal pa a belam mulmet ding in Timnah khua ah a hohtou” chi in, a hilh uhi.

¹⁴A pasal sunna puansilhte a suah a, kikhuhnapuan in a kikhuh a, a kituam bikbek a, Timnah khaw lampi ah Enaim kulhkongpi ah a na tu hi. Shelah a pichingta ngal a, a pa’n a zi ding in amah a pisak kei, chih a thei hi.

¹⁵Judah in amah a muh in kizuak hi’n teh a chi a; a mai lah a kikhuh bikbek ngal a.

¹⁶Lampi gei a huai numei a va zuan a, “Kisa in, hehpih in i lumkhawm ding” a chi hi. A mou mah ahi, chih a thei ngalkei a. Aman, “Hon luppih leng bang n’on pedia?” a chi hi.

¹⁷Aman, “Ganhon lak a kipan kelnou k’on khak ding” a chi hi. Aman, “Huai n’on khak ma in kichiamna bang n’on pedia?” a chi hi.

¹⁸Aman, “Kichiamna bang k’on pedia?” a chi hi. Aman, “Na min sawnna leh na taute leh na chiang” a chi hi. Huchi in hiaite a pia a, a luppih a, amah a kipan nau a paita hi.

¹⁹A thou a, a kikhuhnapuan a suah a, a meithai puansilhte a silh nawnta hi.

²⁰Judah in a kichiamna numei khut a kipan la ding in a lawmpa Adullam mi khut ah kelnou a khak a, himahleh aman huai numei a va muzouta kei hi.

²¹Huchi in, numei omna mun a mite kiang ah, “Lampi gei a Enaim a kizuaknu koi a om ahita a?” chi’n a dong hi. Amau, “Kizuak hiai ah a omkei” a chi uhi.

²²Huchi in, Judah kiang ah a kiknawn a, “Amah ka muzou kei. A mun a mite’n leng kizuak mawngmawng hiai ah a omkei a na chi uh” a chi hi.

²³Judah in, “Aman neiden mai hen, huchilou in zaw i zahlak kha ding. Ngai in, hiai kelnou khak ing a, amah lah mu zoulou chi in a” a chi hi.

²⁴Kha thum vel nung in mi’n, “Judah, na mounu, Tamar kizuak ve aw; huai lou leng, ngai in, sawn a pai hi” chi’n, a hilh uh. Judah in, “Pikhia unla, hallup in om hen” a chi hi.

²⁵A pikhiak uleh, Tamar in, “Hiai thilte neipa a kipan ahi nau ka pai” chi’n, a pasal pa kiang ah mi a sawl hi. Amahmah in, “Hehpih in hiai min sawnna, taute leh chiang, kua a ahia, enchian ding in ka hong thum” a chi hi.

²⁶Judah in huai thilte amah a ahi, chih a na thei hi. “Kei sang a amah diktat zaw ahi. Ka tapa Shelah lah amah toh ka na kiteng sakta kei a” a chi hi. Huchi in Judah in amah a luppih nawn hetkei hi.

²⁷Nau a veilai in hichi ahi a, ngai in, a sul ah phik a na om uhi.

²⁸Hichi ahi a, nau a veilai in khat in a khut a hon golhkhia a; naudommi in, “Hiai a pawt masa zaw ahi” chi’n a na len a, a khut ah khau san a bunsak hi.

²⁹Hichi ahi a, a khut a laklut nawn lai in, ngai in, a lamet louhpi in a unau a hong pawtkhia hi. Naudommi in, “Bangchidan a nang hon phusuak mawk na hia? Nang a mawh khu in” a chi hi. Huaiziak in a min Perez a sa uhi.

³⁰Huai nung in a unau, a khut a khau san bun pen a hongpawt nawn a, a min Zerah a sa uhi.