Read Paite Chin GENESIS 39 Bible Online

GENESIS 39 - Paite Chin bible

GENESIS 39

¹Huan, Joseph Aigupta gam ah a pisuk ua; Pharo nuai a heutu khat, vengtu pawl heutu, Aigupta mi, Potiphar in a hon pisuk Ishmaelte khut a kipan a leita hi.

²TOUPA Joseph kiang ah a om a, amah mi lohching tak ahi a; a pu Aigupta mi inn ah a om hi.

³A pu in, TOUPA a kiang ah a om a, a thilhih peuhmah TOUPA’N a khut ah a lohchingsak, chih a thei hi.

⁴Huchi in Joseph in a pu deihsakna a mu a, a inn ah nna a semzel hi. Aman a inkuante tung ah heutu in a bawl a, a neih tengteng a khut ah a koihvek hi.

⁵Hichi ahi a, a inn leh a neih tengteng tung a heutu dia a bawl nungsiah Joseph ziak in TOUPA’N Aigupta mi inn sung a vualzawlta hi. Inn lam leh gam lam a a neih tengteng ah TOUPA’N a vualzawl hi.

⁶Huchi in a neih tengteng Joseph khut ah a koih a, a neih teng, a annek kia lou ngal a theipih kei hi. Joseph pianhoih leh melhoih tak ahi.

⁷Huai nung in hichi ahi a, a pu zi in Joseph a ngaih et a; “Hon luppih in” a chi hi.

⁸Himahleh a utkei a, a pu zi kiang ah, “Ka pu in hiai inn ah ka kiang ah bangbang a om a chih lah a thei ngalkei a, a neih tengteng ka khut ah a koihvek hi.

⁹Hiai inn sung ah kei sang a lian zaw kuamah a omkei. A zi na hih ziak in nang kia loungal, kei a kipan bangmah it a neikei hi. Bangchi’n hiai khelhna liantak hih in Pathian tung ah thil ka hihkhial thei dia?” a chi hi.

¹⁰Hichi ahi a, niteng in Joseph houpih zel mah leh amah luppih lamthu hiam, amah kiang a om lamthu hiam a limsak nuam kei hi.

¹¹Huchih lai in hichi ahi a, a nna sem ding in inn sung ah a va lut a; inn sung ah mi himhim kuamah a omkei hi.

¹²Huchi in aman, “Hon luppih in” chi in a puansilh in a na man a, aman a puansilh a khut a nusia in a taikhia hi.

¹³Hichi ahi a, a puansilh a khut a nusia in a taikhia, chih a theihtakin,

¹⁴A inn a mite a sam a, a kiang uah, “En un, hon zahlaksak ding in Hebru mi khat i kiang ua honpi eita ve. Hon luppih tum in ka kiang ah a honglut a, Huchi in ngaihtak in ka kikouta hi.

¹⁵Hichi ahi a, aw suah a ngaihtak a ka kikou a zaktak in hiai ka kiang ah a puansilh a nusia a, a taikheta” a chi hi.

¹⁶Joseph pu a hongtun masiah a puansilh a kiang ah a na koih gige hi.

¹⁷A kiang ah hiai thu a na gen a, “Hebru sikha i kiang a na honpi in hon zahlaksak tum in ka kiang ah a honglut hi.

¹⁸Hichi ahi a, aw suah a ka kikou tak in hiai a puansilh ka kiang a nusia in a taikheta” a chi hi.

¹⁹Hichi ahi a, Joseph pu in a zi in a kiang a, “Na sikha in hichi’n a honbawl” chi a, a thugen a zak in, a hehna a kuang hi.

²⁰Huchi in, Joseph pu in amah a pi a, suangkulh, kumpi suangkulhtangte khumna mun ah a khum a; huchi in suangkulh ah a omta hi.

²¹Himahleh TOUPA Joseph kiang ah a om a, a tung ah a zahngai a, suangkulh vengmi a hehpih sak hi.

²²Huchi in, suangkulh vengmi in suangkulh a tang tengteng Joseph khut ah a kemsakta hi. Huchi in, huai a, a hih peuhmah uh Joseph hih ahi.

²³TOUPA Joseph kiang ah a om a, a thilhih peuhmah TOUPA’N a lohchin sak ziak in suangkulh vengmi in a khut a thil om himhim a enta kei hi.