Read Paite Chin GENESIS 4 Bible Online

GENESIS 4 - Paite Chin bible

GENESIS 4

¹Huan, Adam in a zi Evi a luppih a; huchi in a gai a, Kain a nei hi; “TOUPA panpih in pasal ka neita,” a chi hi.

²A nau Abel a hon neinawn hi. Abel belamchingmi ahi a, Kain bel leiletmi ahi.

³A nung in hichi a honghi a, Kain in TOUPA kiang a lat ding in lou a piang leigahte a hontawi hi.

⁴Abel in leng a belamhon lak a piang masapen leh a thau pen a hontawi a, TOUPA’N Abel leh a thillat a kipahpih hi.

⁵Himahleh Kain leh a thillat bel a kipahpih kei. Kain a heh mahmah a, a mel a liap hi.

⁶TOUPA’N, Kain kiang ah, “Bangdia heh na hia? Bangdia na mel liap ahia?

⁷Hih hoih lechin pahtak na loh kei dia hia? Na hih hoih keileh khelhna kongkhak bul ah a kual nilouh a, a deihlam nangmah ahi ding, a tung ah thu na nei ding ahi,” a chi hi.

⁸Kain in a nau Abel a houpih a, hichi ahi a, lou a a omlai un Kain in a nau Abel a sual a, a thatta hi.

⁹TOUPA’N Kain kiang ah, “Na nau Abel kaw om ahia?” a chi hi. Aman, “Ka theikei, ka nau donpa ka hi ahia?” a chi hi.

¹⁰TOUPA’N, “Bang hih na tamai a? Na nau sisan aw in lei a kipan a honsam hi.

¹¹Huaiziak in, na khut a kipan na nau sisan sang dia kam a na ka lei apan hamsiat na hita hi.

¹²Lei na leh in leng a hoihna a honpe nawn kei ding” a chi hi.

¹³Kain in, TOUPA kiang ah, “N’on gawtna a na mahmah a, ka thuak zou kei ding.

¹⁴Ngai in, tuni in leitung a kipan n’on delhkheta a, Na mit muh phaklouh a sel a om ding ka hita. Lei ah taimang leh vakvai hi ding ka hita hi. Hichi ahi ding a, kuapeuh honmu in a honthat mai ding uh” a chi hi.

¹⁵TOUPA’N a kiang ah, “Huchi ahihleh, kuapeuh Kain that a mun sagih in a tung ah phu a la ding uh” a chi hi. Mi amah mu in a thah louh na ding in TOUPA’N Kain a chiamtehta hi.

¹⁶Kain TOUPA kiang a kipan a pawt a, Eden suahlam a Nod gam ah a tengta hi.

¹⁷Kain in a zi a luppih a; Huchi in a gai a, Enok a nei hi. Khua a sat a, a khaw min a tapa tamsak in Enok a sa hi.

¹⁸Enok in tapa Irad a nei a; Irad in tapa Mahujael a nei hi. Mahujael in tapa Methusael a nei a; Methusael in tapa Lamek a nei hi.

¹⁹Lamek in zi nih a nei a; khat min Adah ahi a, khat pen min Zillah ahi.

²⁰Adah in Jabal a nei a; amah puanin a om ganvulmite suangpa ahi.

²¹A nau min Jubal ahi a, amah kaihging leh tamngai tummi tengteng suangpa ahi.

²²Zillah in leng Tubal Kain, dal leh sik, tuzat heizat chiteng sekmi, a nei hi. Tubal, Kain sanggamnu Naamah ahi.

²³Lamek in a zite kiang ah, Adah leh Zillahte aw, ka aw za unla; Lamek zite aw, ka thugen ngaikhia un. A hon liamsak ziak in mi khat ka that a, A hon sidup sak ziak in valnou khat ka that hi.

²⁴Kain phu bawn a mun sagih a la ding a hih uleh Lamek phu a mun sawmsagih leh sagih in a la ding uh, a chi hi.

²⁵Adam in a zi a luppih nawn a; tapa a nei nawn a; a min Seth a sa hi. Pathian in Abel sik in chisuan ding a hon sehsakta; Kain in lah amah a thatta ngal a, a chi hi.

²⁶Seth in leng tapa a nei a; a min Enosh a sa hi. Huai a kipan mite’n TOUPA min a lou panta uhi.