Read Paite Chin GENESIS 40 Bible Online

GENESIS 40 - Paite Chin bible

GENESIS 40

¹Huan, huai thilkhit in hichi ahi a, Aigupta kumpipa uain pepa leh a tanghou bawlpa’n a pu uh Aigupta kumpipa a lungkim sakkei uhi.

²Pharo a sikha heutu nihte tung ah, a uain pia heutupen tung ah leh a tanghou bawl heutupen tung ah a hehta hi.

³Huchi in vengmi pawl heutu inn ah, suangkulh, Joseph hen a a omna ah, a tangsakta hi.

⁴Vengmi pawl heutu in amau Joseph a kemsak a, amau a na a sepsak ua, ni bangzah hiam tak a tang uhi.

⁵Suangkulh a hen a om, Aigupta kumpipa uain pepa leh tanghou bawlpa in zan khat mangkhiakna tuam tuak a nei uhi.

⁶A zing in Joseph a kiang uah a valut a, amau a hong mu ua, ngai in, a na lungkham mahmah uhi.

⁷Aman, “Bangchi na hi ua, tuni in lungkham mel paw natel u chia?” chi’n Pharo sikha heutu suangkulh a tangte a dong hi.

⁸Amau a kiang ah, “Mang ka neituak ua, hon hilhchiansak thei kuamah lah a om ngalkei a ahi” a chi uh. Joseph in a kiang uah, “Mang hilhchetnate Pathian a ahi ka hia? Hehpih in na a mang uh honhilh un” a chi hi.

⁹Huchi in, uain pia heutupen in a mang Joseph a hilh a, a kiang ah, “Ngai dih, ka mang in, ka ma ah grepgui a hongom hi.

¹⁰Grepgui ah ka thum a om a, a hong selnou ua, a hongpak ua, a pakbomte’n grep minte a hon omsak uhi.

¹¹Pharo nou ka khut ah a hongom a; grep gahte ka lou a, Pharo nousung ah ka suk a, huai nou Pharo khut ah ka na pia” a chi hi.

¹²Joseph in a kiang ah, a hilhchetna hiai ahi. “Ka thumte ni thum ahi.

¹³Tu a kipan ni thum in Pharo in na lutang a domkang ding a, nna nasep mah a hon semsak nawn ding. A uain pepa na hihlai a, na piak ngeina bang in Pharo nou a khut ah na pe nawn ding.

¹⁴Himahleh na hong hamphat chiang in hon theigige inla, hehpih in hehpihna ka tung ah hon kilang sak inla, Pharo kiang ah ka tungtang hon gen inla, hiai in a kipan hon pikhia in.

¹⁵Hebrute gam a kipan mi’n a guk a, a hon gukmang uh ka hi a; hiai gam ah leng khuksunga a hon khumna ding in bangmah ka hih khial kei” a chi hi.

¹⁶Tanghou bawlpa in hilhchetna a hoih chih a theih in, Joseph kiang ah, “Ken leng mang ka nei a, ngai in, lawhbeu thum ka lu in ka na pua hi.

¹⁷Lawhbeu tungnungpen ah Pharo an, tanghou bawlpa bawl, chichih a na om hi. Huaite vasate’n lawhbeu ka lu a ka puaka kipan a na ne souhsouh uh,” a chi hi.

¹⁸Joseph in a dawng a, “Hiai a hilhchetna ahi. Lawhbeu thum ni thum ahi.

¹⁹Tu a kipan ni thum in Pharo in na pumpi a kipan na lutang a dom kang dia, singdawn ah a khai ding. Huchi in, vasate’n na sa a ne souhsouh ding uh” a chi hi.

²⁰Hichi ahi a, a ni thum ni, Pharo pian champha ni’n, aman a sikha tengteng ading in Ankuang a lui hi. A sikhate lak a uain pia heutupen lutang a domkangta hi.

²¹Uain pia heutu pen uain pemi mah in a pangsak nawn a; Pharo khut ah nou a peta hi.

²²Himahleh Joseph in amau a hilhchet bangtak in, tanghou bawl heutupen a khailumta hi.

²³Himahleh, uain pia heutu pen in Joseph a theigige kei a, a mangngilhta hi.