Read Paite Chin GENESIS 41 Bible Online

GENESIS 41 - Paite Chin bible

GENESIS 41

¹Huan kum nih vingveng nung in hichi ahi a, Pharo in mang a nei a; ngai in, luigei ah a na ding hi.

²Ngai in, bawngpi sagih hoihtak tak, thautak tak tui a kipan a hong pawtkhe tou ua, loupa nou lak ah a hongta uhi.

³Ngai in, bawngpi dang sagih kil theuthou, gawng gemgom a hong pawtkhe nawn ua, bawngpi dangte kiang ah luigei ah ading uhi.

⁴Bawngpi kil theuthoute’n bawngpi hoihtak tak, thau taktakte a negai maimah uhi.

⁵Huchi in, Pharo a khanglou a, a ihmu nawn a, mang a nei nawn hi. Ngai in, buhkung khat ah a vui sagih lian pipi, hoih liahliah a hongom khia hi.

⁶Ngai in, huai nung in vui sagih ngat giuhgeuh suahlam huih in a nuai ek a hong omkhe nawn hi.

⁷A vui ngat giuhgeuhte’n a vui sagih lian pipi, hoih liahliahte a valhkhin maimah uh. Huchi in Pharo a khanglou a; ngai in, mang a na hi.

⁸A zing in hichi ahi a, a lungsim a buai mahmah a; mi a sawl a, Aigupta gam a mitkhialdawi siam tengteng leh mi pil tengteng a samkhawm hi. Pharo in a mang amau a na hilh a; himahleh Pharo mangte hilhchian thei kuamah a omkei uhi.

⁹Huchih lai in uain pia heutupen in Pharo kiang ah, “Tuni in ka khelhna ka thei khia hi.

¹⁰Khatvei Pharo a sikhate tung ah a heh a, huchi in vengmipawl heutu inn ah kei leh tanghou bawl heutupen a hon tangsak hi.

¹¹Kei leh aman zan khat mang ka nei ua, mang khiakna tuam tuak ahi ka mat uh.

¹²Huai ah ka kiang uah vengmi pawl heutu sikha, Hebru mi, tangval khat a om a; amah ka hilh ua, aman ka mangte uh a hilhchianta hi. Ka mang bang tuaktuak un a hon hilhchet sak hi.

¹³Hichi ahi a, kei ka nasep mah a hon semsak nawn a, amah a khailumta hi” a chi hi.

¹⁴Pharo in Joseph a samsak paha, kintak in suangkul a kipan a pikheta uh. Amah a kimet ngil a, a puansilh a khek a, Pharo kiang ah a va lutta hi.

¹⁵Pharo in Joseph kiang ah, “Mang ka nei a, a hilhchian thei kuamah a omkei uh. Nang mang thu na theih leh na hilhchian thei chih na tungtang mi gen ka naza” a chi hi.

¹⁶Joseph in Pharo a dawng a, “Huai ahihleh kei a om ahi kei hi. Pathian in Pharo lungkimhuaitakin a dawng zaw ding” a chi hi.

¹⁷Pharo in Joseph kiang ah, “Ka mang in, ngai in, lui gei ah ka na ding hi.

¹⁸Ngai in, bawngpi sagih thau taktak, hoih pipi tui a kipan a hong pawtkhe tou ua, loupa nou lak ah a hongta uhi.

¹⁹Bawngpi dang sagih ginalou leh deihhuai lou leh gawng siatsuat, huchibang tel a hoihlou Aigupta gam tengteng a leng ka muh ngeilouh, a nung uah a hong pawtkhe tou nawn uhi.

²⁰Bawngpi gawng siatsuat deih huailou pipite’n bawngpi sagih thautak tak hongpawt masate a negai maimah uh.

²¹A nekgaih khitnung un leng, a ne uh chih a kithei tuankei hi. A tunglai mah bang in deihhuailou tak in a om lailai uhi. Huchi in ka khanglouta hi.

²²Ka mang in, ngai in, buh kung khat ah vui sagih lian pipi, hoih pipi a hong vuikhia hi.

²³Ngai in, huai nung in vui sagih vuai ningniang, neuchik chik, suahlam huih in a nuai a hong vuikhe nawn hi.

²⁴A vui ngat ngiungeute’n a vui sagih hoihtaktakte a valhkhit maimah uh ka mu hi. Mitkhialdawi siamte ka hilh a, himahleh a hon hilhchian thei kuamah a omkei uh” chi’n, a gen hi.

²⁵Joseph in Pharo kiang ah, “Pharo mang khat ahi. Pathian in hihdia a kisak Pharo theisak ahi.

²⁶Bawng sagih hoihtaktakte kum sagih ahi ua; vui sagih hoihtaktakte leng kum sagih mah ahi uh. Mang khat ahi.

²⁷A nung ua bawng sagih tektaktak, deihhuailou taktak hongpawt khetoute kum sagih ahi ua, vui sagih a hawm ngen suahlam huih nuaite toh; huaite kial kum, kum sagih ding ahi.

²⁸Hiai ahi Pharo kiang a ka gen. Pathian in hihdia a kisak Pharo kiang a theisak ahi.

²⁹Ngai in, Aigupta gamsung tengteng ah niang leh tai a om kum, kum sagih a hongtung ding hi.

³⁰Huai nung in kial kum, kum sagih a hongom nawn ding. Huchi in niang leh tai a omna Aigupta gam ah mangngilh vek ahita ding. Kial in gam a negawp vek ding hi.

³¹Niang leh tai kum honzui kial a thupi mahmah ding ziak in mite’n hiai gam hauhsaklai hun a thei nawnta kei ding uh;.

³²Pharo mang nihvei a neihtuan sakna ahihleh hiai ziak ahi. Thilhih ding Pathian in a hihkip a, Pathian in a tungsak pah ding.

³³Tuin Pharo in mi khat, teitak leh piltak zongkhia henla, Aigupta gam tung ah heutu in omsak hen.

³⁴Pharo in hiai hih hen. Gam tung ah heutute sep henla, niang leh tai a om kum, kum sagih sung Aigupta gam buh mun nga a khen, mun khat zel kaikhawm hen.

³⁵Amau huai kum hoih kum hongtung ding a buh tengteng kai khawm in Pharo nuai a om ding in khuate ah tunung a nek ding in buh sungkhawm henla, kholkhawm hen.

³⁶Kial ziak a gam a manlouhna ding in, buh kial kum, kum sagih Aigupta gam a hongtun hun a ding in hiai gam adia kiginkholhna ahi ding” a chi hi.

³⁷Huai thu Pharo leh a sikha tengteng in hoih a saklam tak uh ahi.

³⁸Pharo in a sikhate kiang ah, “Hichibang Pathian kha omna mi i muzou ding ua hia?” a chi hi.

³⁹Pharo mah in Joseph kiang ah, “Pathian in hiai tengteng hon theihsak ziak in, nang bang a tei leh pil himhim a omkei uhi.

⁴⁰Nang ka inn kawte tung ah heutu in na om ding a, ka khua leh tui tengteng na thu bangzel in a om ding uh. mangtutphah a tut thu ah kia nang sang in ka lianzaw ding” a chi hi.

⁴¹Pharo mah in Joseph kiang ah, “En in, Aigupta gam tengteng tung ah heutu in k’on bawl hi” a chi hi.

⁴²Pharo in a khut a kipan a min sawnna zungbuh a tolkhia a, Joseph khut ah a bunsak a, puanmalngat a bawl puansilhte a silhsak a, a ngawng ah dangkaeng khainiang a oksak hi.

⁴³A kangtalai neih nihna ah a tuangsak a; a ma ah khukdin un, chi’n, mi a kikousak hi. Huchi in, Aigupta gam tengteng tung ah heutu in a bawlta hi.

⁴⁴Pharo in Joseph kiang ah, “Kei Pharo ka hi, na thu lou in Aigupta gamsung tengteng ah kuamah in a khut uh hiam, a khe uh hiam a likkei ding” a chi hi.

⁴⁵Pharo in Joseph min Zaphnath paneah a sa a; On khaw siampu Potipher tanu Asenath a zi ding in a pia hi. Joseph a pawt a, Aigupta gam a siksuak hi.

⁴⁶Joseph Aigupta gam kumpipa Pharo ma a a dinlai in kum sawmthum a upa ahi. Joseph Pharo a kipan a pawt a, Aigupta gam tengteng a siksuak hi.

⁴⁷Hauh kum, kum sagih sung, lei in buh tampi a tungsak hi.

⁴⁸Aigupta gam a hauh kum, kum sagih a hongtung a, buh tengteng a dongkhawm a, huai buhte khuate ah a sungkhawmta hi. A kim a om khochih lou a buhte a sungkhawm chiat hi.

⁴⁹Joseph in buh tampi tuipi piaunel zah bang in a sungkhawm venvon a, a sim leng a tawphial hi; simzoh vuallouh ahihtak ziak in.

⁵⁰Kial hongtun ma in Joseph in tapa nih a nei a, huaite On khaw siampu Potipher tanu Asenath in a neihsakte ahi uhi.

⁵¹Joseph in a tapa masa min Manasseh a sa a; “Pathian in ka sepgimna leh ka pa inn sung mite tengteng a hon mangngilh sakta” a chi hi.

⁵²A tapa nihna min Ephraim a sa a; “Pathian in ka gimthuakna gam ah chi a hon suangsakta” a chi hi.

⁵³Hauh kum, kum sagih Aigupta gam a hongtung a beita hi.

⁵⁴Kial kum, kum sagih ding, Joseph gen bang in a hongtung panta hi. Gamchih ah kial a hong keta a; Aigupta gamsung teng ah bel nekding a om hi.

⁵⁵Aigupta gam a mi tengteng a kial tak un, Pharo kiang ah nekding ngen in a kikou uhi. Pharo in Aigupta mite kiang ah, Joseph kiang ah hoh unla; na kiang ua a gen peuhmah hih un, a chi hi.

⁵⁶Leitung pumpi ah kial a keta hi. Joseph in sunkhawmna buhinte a hong a, Aigupta gam ah leng kial a nakkiak mahmah hi.

⁵⁷Leitung pumpi a kial a nakkiak ziak in gamchih a mite buh lei ding in Aigupta gam ah Joseph kiang ah a hongzel uhi.