Read Paite Chin GENESIS 42 Bible Online

GENESIS 42 - Paite Chin bible

GENESIS 42

¹Huan, Jakob in Aigupta gam ah buh a om, chih a thei hi. Jakob in a tapate kiang ah, “Bangdia ki en maimah na hi ua?” a chi hi.

²Amahmah in, “Ngai un, Aigupta gam ah buh a om, chih ka za hi. Silou a i hinkhiak theihna ding in huai ah va hohsuk unla, huai a kipan ei ading in valei un” a chi hi.

³Joseph unau sawmte Aigupta a buhlei ding in a hohsuk uhi.

⁴Joseph nau Benjamin Jakob in a ute kiang ah a hohsak kei hi. Tuahsia a va tuak kha ding, a chi hi.

⁵Israel tapate mi hohte lak ah buh lei ding in a hoh ua; Kanan gam ah leng kial a ke ngal a.

⁶Joseph Aigupta gam tung ah heutu ahi a; amah huai gam mi tengteng kiang a buh zuakpa ahi. Joseph ute a hongpai ua, leisi in a mai ah a kun uhi.

⁷Joseph in a ute a na mu a, amau a na theilai hi. Himahleh a kiang uah midang bang in a kibawla, khauhtak in amau a houpih hi. A kiang uah, “Koi a kipan a hong na hi ua?” a chi hi. Amau, “Buh lei dia Kanan gam a kipan hongpai ka hi uh” a chi uhi.

⁸Joseph in a ute a theilai a, amau bel amah a theikei uhi.

⁹Joseph in amau tungtang thu, manga a matte a theikheta hi. A kiang uah, “Enkhemite na hi uh. Gam venlouhna munte en dia hong kuan na hi uh” a chi hi.

¹⁰Amau a kiang ah, “toupa, hilou e, na sikhate buh lei dia hong kuan ka hi uh.

¹¹Mi khat ta vek ka hi ua, mi diktak ka hi uh. Na sikhate enkhemite ka hi zenzen kei uh” a chi uhi.

¹²Aman a kiang uah, “Ka taksang kei, gam venlouhna munte en dia hongpai hi mah uteh” a chi hi.

¹³Amau, “Kou na sikhate unau sawmlehnih, Kanan gam a om, mi khat tate ka hi uh. Ngai in, ka nautumpen uh tuin ka pa uh kiang ah a om hi. Khat pen ahihleh a om nawnta kei hi” a chi uhi.

¹⁴Joseph in a kiang uah, “Enkhemite na hi uh k’on chih na hi mahmah uhi.

¹⁵Hichibang a ettel in na om ding uh. Na nautumpen uh hiai a, a hongpai keileh Pharo hinna a kichiam in hiai a kipan na pawtkhe kei ding uh, k’on chi ahi.

¹⁶Nou ah thutak a om hia, omlou chetna ding in na lak ua khat sawl unla, na nau uh honpi hen. Nou bel hen in na om phot ding uhi. Huchilou in zaw Pharo hinna a kichiam in, enkhemite na hi mahmah uh, k’on chi ding” a chi hi.

¹⁷Huchi in avek un ni thum a tangsak chiat hi.

¹⁸A ni thum ni’n Joseph in a kiang uah, “Hichi’n hih le uchin na hing ding uh; Pathian ka lau hi.

¹⁹Midiktat na hih uleh na unau lak uah khat na suangkulh tanna in uah hen in om hen.

²⁰Na nautumpen uh ka kiang ah honpi un. Huchi in na thu uh a tel dia, na sikei ding uh” a chi hi. Huchibang in a hihta uhi.

²¹Amau, “I nau tung a i thilhih uh mawh petmah i hi, hehpih dia a honnget ngutngut lai a, a lungtang mangbat dan mu napi a, i ngaihkhiak saknop louh uh. Huaiziak in hiai mangbatna in hon buak ahi” a kichi uhi.

²²Reuben in, “Naupang tung ah thil hihkhial kei un, chi’n, na kiang uah ka gen kei maw? Na ngaikhe nuam kei ua ahi. Huaiziak in, ngai un, a sisan phu i tung ua lak ahi tave” chi’n, amau a dawng hi.

²³A kal ua pauletmi a om ziak in Joseph in a thugen uh a thei chih a theikei uhi.

²⁴Aman amau a lehngatsan a, a kapta hi. A kiang uah a hong kiknawn a, amau a houpih a, a lak ua pan Simeon a pituam a, a mitmuh un a henta hi.

²⁵Joseph in a ipte uh buh a hihdim ding leh a dangkate uh a ip ua koih nawnchiat ding in leh lampi a nekding pe ding in thu a pia hi. Huchi in huchibang in a hihsakta hi.

²⁶A buh uh a sabiltungte a pawsak ua, huai a kipan a pawtkheta uhi.

²⁷A lak ua mi khat in a giahbuk ua a sabiltung an pedia a ip a hon leh, a dangka a muta hi. Ngai in, a ip gongbul ah a na om hi.

²⁸A unaute kiang ah, “Ka dangka na koihnawn uh hi ve e. Ngai un, ka ipsung ah a na om hi” a chi hi. A lunglel ua, “Pathian in hichibang a eite a honbawl bangchidan a diam aw?” chi’n, ling kawm in a ki entuah uhi.

²⁹Kanan gam a a pa uh kiang a hongtung ua, a tung ua thil tung tengteng a hilh uhi.

³⁰“Huai mi, a gam heutupa un, khauhtak in a hon houpih a, enkhemite ding in a honkoih hi.

³¹Kou a kiang ah, mi diktak ka hi uh. ‘Enkhemite ka hi zenzen kei uh.’

³²Unau sawmlehnih ka hi ua, ka pa uh tapate ka hi vek uh. Khat a om nawn kei a, ka nautumpen uh tuin Kanan gam ah ka pa uh kiang ah a om” ka chi uhi.

³³Huai mi, a gam heutupa un, ka kiang uah, “Hichi’n midiktak na hi uh chih k’on thei ding. Na unau khat uh ka kiang ah nusia unla, na inkuanpih kialte ading in buh pua unla, paita un.

³⁴Na nautumpen uh ka kiang ah honpi un. Huchi in enkhemite na hi kei ua, midiktak na hi zaw uh, chih ka thei ding. Huchi in na unaupa uh k’on penawn dia, hiai gam ah sum na sinta ding uh” a honchi, a chi uhi.

³⁵Hichi ahi a, a ipte uh a butkhiak lai un, ngai in, a dangka tunchiat uh a ip uah a na omchiat hi. Amau leh a pa un a dangka tunte uh a muh un a lau mahmah uhi.

³⁶A pa uh Jakob in a kiang uah, “Noute’n ka tate hon tansak na hi uh. Joseph a om nawn kei. Simeon lah a om nawn kei, Benjamin nasan lah pimang na tum nawn uh. Hiai thil tengteng in honkiak khum eita ve” a chi hi.

³⁷Reuben in a pa kiang ah, “Na kiang a k’on pi kiknawn kei leh ka tapa nihte that mai in. Amah ka khut ah hon kemsak inla, na kiang ah k’on pi kiknawn mai ding” a chi hi.

³⁸Aman, “Ka tapa na kiang uah a hongsuk kei ding. A u a sita a, amah kia lah ahita ngal a. Na paina lam lak ah tuahsia tuak leh ka lu kang lungkhamna in han ah na tumsak ding uh” a chi hi.