Read Paite Chin GENESIS 43 Bible Online

GENESIS 43 - Paite Chin bible

GENESIS 43

¹Huan, huai gam ah kial a nakkiak mahmah hi.

²Hichi ahi a, Aigupta gam a kipan a buh puaktouh uh a nekgaih nung un, a pa un, a kiang uah, “Kuan nawn unla buh tawmchik bek ei ading in valei nawn un” a chi hi.

³Huchi in, Judah in a kiang ah, “Huai mi’n, na nau uh n’on tonpih kei uleh, ka mel na mu kei ding uh, chi’n, honkalh ngiungeu hi.

⁴Ka nau uh n’on zuihsak ding leh, buh k’on va leisak ding uh.

⁵N’on zuihsak keileh zaw, ka hohkei ding uh. Huai mi’n ka kiang uah, Na nau uh n’on tonpih kei uleh, ka mel na mu kei ding uh, a chita ngal a” chi’n a gen hi.

⁶Israel in, “Bangziak in ahia nau dang na neihlai tantan na hilh chitchiat uh? Kei adia hoihlou na hih uh?” a chi hi.

⁷Amau, “Huai mi’n, na pa uh hinglai hia? Unau dang na neilai uhia? chi’n, i tanchin leh i tanaute tanchin a hon dong hi. A hon thudot bangzel in ka hilh uhi. Na nau uh hon pisukun, a chi ding chih kuan a thei chitchiat dia?” a chi uh.

⁸Judah in a pa Israel kiang ah, “Ka nau uh hon zuisakin. Huchi in ka kisa ding ua, ka kuan ding uh. Kou leh nang leh ka ta neu chikchikte u leng silou a i hin theihna ding un.

⁹A tungtang thu keimah in bultum na ning. Ka khut a kipan mahmah ah amah honphut in. Amah na kiang a ka honpi kiknawn kei a, na ma a k’on dinsak nawn kei leh, a mawh tangtawn in ka paw ding hi.

¹⁰Om sawtlou hile ung, a nihveina hongtung nawn khinta ding hi ung” a chi hi.

¹¹A pa uh Israel in a kiang uah, “Huchibang a hih vanglak leh hichi’n hih un. Na seng un hiai gam a thil hoih khenkhat singnai damdawi, khuaizu, gimnamtui, Murra, theihawksek leh makha gah, neukha chiat huai mi ading thilpiak tawisuk un.

¹²Dangka a mun nih in tawi unla, na ip gongbul ua a hon dangka piak nawn leng tawi nawn un; a muhkhelh ahi kha ding.

¹³Na nau u leng pi unla, thou unla, huai mi kiang ah va hoh nawn un.

¹⁴Na unau khat pen uleh Benjamin a hon khahsakna ding in Pathian bangkim hihthei in huai mi hon hehpihsak hen. Ka tate tan ahihleh tan ka himai kei ding hia” a chi hi.

¹⁵Huchi in, thilpiak a tawi ua, dangka leng a mun nih a tawi ua, Benjamin leng a pi uhi. A thou ua, Aigupta gam ah a hohsuk ua, Joseph ma ah ading nawn uhi.

¹⁶Joseph in Benjamin a kiang ua om a muhtak in, a inn kemmi kiang ah, “Huai mite inn sung ah pilut inla, sa gou inla, bawl in, huai mite’n sun chiang in ka kiang ah an a ne ding uh” a chi hi.

¹⁷Huchi in, aman Joseph thupiak bang in a hihta a; Joseph inn ah a pilutta hi.

¹⁸Joseph inn a pilut a, a om ziak un a lau ua, “I hoh masak lai a, i ip ua dangka hong kiknawnte ziak in eive a hon pilut uh. I tung ua siatna zong a, honsual in, ei leh i sabiltungte toh sikha dia hon mattum eive,” a chi uhi.

¹⁹Joseph inn kemmi kiang ah a va hoh ua, kongbul ah a houpih uh.

²⁰“Pu aw, ka hong masak lai ua buh lei ding lel a hongsuk ka hi uh.

²¹Hichi ahi a, giahbuk ka tun un ka ipte uh ka hong ua, ngai in, ka dangka chiat uh ka ip gongbul uah a na om hi. Ka dangka uh a buk ngeingei in a na om a, huchi in ka hontawi uhi.

²²Buh leina ding in dangka dang k’on tawi ua, ka dangka u lah kuan ahia ka ip ua koih ka thei ngalkei uh” a chi uh.

²³Aman, “Lungmuangtakin om unla, lau kei un. Na Pathian, na pa uh Pathian in na ipte uah gou a honpia ahi maive. Na dangka ulah ka mungal a” a chi hi. Huchi in Simeon a kiang uah a hon pikhia hi.

²⁴Huai mi in Joseph inn sung ah amau a pilut a, tui a pia hi. A khe uh a sil ua; a sabiltungte u leng an a pia hi.

²⁵A thilpiak tawi uh Joseph sun an ne dia a hongpai ma in a na bawlkhol uh; huai ah an a ne ding uh, chihlah a za uhi.

²⁶Joseph a inn a, a hong paitakin, a khut ua thilpiak om inn sung ah, a kiang ah a tawilut ua, leisi in a mai ah a kun chiat uhi.

²⁷Aman a tanchin uh a dong a, “Na pa uh tanchin na gen uh, huai putek a damdam na hia? A hing lai hia?” a chi hi.

²⁸Amau, “Na sikha ka pu uh a damlai hi, a hinglai hi” a chi uh. Huchi in a lu uh a kun sak ua, zahtakna a pia uhi.

²⁹Amah a dak a, a nau Benjamin, a nu tapa a mu a, “Hiai na nautumpen uh, a tanchin na honhilh uh hia?” a chi hi. Amahmah in, “Ka tapa, Pathian in hon hehpih hen” a chi hi.

³⁰Joseph in a nau a muh in a khase mahmah a, kintak in kahna ding mun a zongpah a, a dantan sung ah a lut a, huai ah a kap kheta hi.

³¹A mai a phiat a, a vapawt nawn a, a kidek teitei a, annek bawl un, a chi hi.

³²Huchi in amah ading atuam in, amau ading atuam in, Aigupta mi a nekpihte ading atuam in a bawlta uhi. Aiguptate’n lah Hebrute a nekpih thei ngalkei ua; huchibang hihlah Aiguptate ading in thil sianglou ahi.

³³Huchi in, a upapen tamasa a hihna bang in, a naupangpen nautumpen a hihna bang in Joseph ma ah a tu ua; huchi in lamdang a sa chiat uhi.

³⁴Joseph in a ma a mite a kipan tantuan an a ban piaksaka, Benjamin tantuan houh amaute tantuan tengteng sang in a mun nga in a tam tuam hi. Uain a dawn ua, nuam a sa chiat uhi.