Read Paite Chin GENESIS 44 Bible Online

GENESIS 44 - Paite Chin bible

GENESIS 44

¹Huan, aman a inn kemmi kiang ah, “Huai mite ip in a puakzoh zahzah uh buh in dimsak inla, a dangka chiat uh a ip gong bul chiat uah koih in.

²Ka nou, huai dangka nou, a naupang penpa ip gong bul ah koih in, a buh man dangka toh” chi’n, thu a pia hi. Huchi in, aman Joseph thugen bang in a hihta hi.

³Khua a vaktakin amau a sabiltungte utoh a paisakta hi.

⁴Khua a kipan a paikhiak ua gamla a tunma un, Joseph in a inkemmi kiang ah, “Thou inla, huai mite va delh in. Na va phak chiang in a kiang uah, Bangchidana thil hoih, thil hoihlou a thuk na hi ua?

⁵Huai ka pu uain dawnna leh a aisanna mahmah hilou ahi maw? Hichibang na hih uh na gilou uhi” chi in, a chi hi.

⁶A delhpha a, huai thute a kiang uah a gen hi.

⁷Amau a kiang ah, “Pu, bangchidan ahia hichi thu na gen? Na sikhate’n huchibang thil ka hihlouh ding dan uh.

⁸Ngai in, ka ip gongbul ua dangka ka muhte uh leng Kanan gam a kipan na kiang ah k’on tawi ve ua oi. Bangchidan in na pu inn a dangka hiam dangkaeng hiam ka gu thei maizen ding ua?

⁹Na sikhate lak ah kuapeuh na muhna penpen si hen, kou leng ka pu uh sikha in ka om mai ding uh” a chi uhi.

¹⁰Aman, “Hi hen, na thu bangzel un hi hen. Himahleh kuapeuh k’on muhna penpen ka sikha in om hen. Nou ahihleh dembei na hi ding uh,” a chi hi.

¹¹Huaitak in amau ipchiat uh kintak in lei ah a ngakhia ua, amau ipchiat a hong uhi.

¹²Aman a upapen ah apan a, a naupangpen pha in a zong a; Huchi in Benjamin ip ah nou a muta hi.

¹³Huaitak in a puansilhte uh a botkek ua, amau sabiltung chiat a pawsak nawn ua, khua ah a kiknawnta uhi.

¹⁴Judah leh a unaute’n Joseph inn a vapha ua; amah huai ah a na omlai hi. Huchi in a mai ah a khupboh chiat uh.

¹⁵Joseph in a kiang uah, “Bang thil ahi mai a na hih uh? Kei bang mi, aisan a siam teitei uh, chih na theikei ua hia?” a chi hi.

¹⁶Judah in, “Pu, na kiang ah bang ka genta ding ua? Bang k’on hilhta ding ua? Bangchibang in ka kigen vengta ding ua? Pathian in na sikhate tatlekna a mu kheta hi. Ngai in, pu, na sikhate ka hita mai uh. Kou leh a khut a nou a muhna pen uh leng” a chi hi.

¹⁷Aman, “Huchibang a ka hihlouh ding dan. A khut a nou a muhna pen kia ka sikha in a om ding a, nou zaw lungmuangtakin na pa uh kiang ah paitouta un” a chi hi.

¹⁸Huaitak in, Judah in Joseph a vanaiha, “Pu aw, hehpih in, pu, kei na sikha, na bil a na zak ding in thu kam khat hon gensak inla, na hehna na sikha tung ah kuangsak ken. Nang lah Pharo bang hial na hita hi.

¹⁹Pu, nang, ‘Pa hiam unau hiam na nei uhia?’ chi’n, na sikhate na hondong hi.

²⁰Pu, kou na kiang ah, ‘Pa putek tak leh a teklam a neih naupangchik, ka nei uh. Huai mi upa a sita a, a nu neih lak ah amah kia a omlai a, a pa’n lah amah a it mahmah hi’ ka chi uhi.

²¹Nang na sikhate kiang ah, amah pen ka mit a ka muh theihna ding in ka kiang ah hon pisuk un, na chi hi.

²²Pu, kou na kiang ah, ka nau un a pa a nuse theikei ding; a pa paisan leh a pa a simai ding, ka chi uhi.

²³Nang na sikhate kiang ah, ‘Na nautumpen uh n’on tonpih kei uleh, ka mel na mu nawn kei ding uh’ na chi hi.

²⁴Hichi ahi a, na sikha ka pa uh kiang ka vatun un, Pu, na thu ka hilh uhi.

²⁵Ka pa un, ‘Kuan nawn unla, buh tawmchik bek ei ading in va lei nawn un’ a chi hi.

²⁶Kou, ‘ka hohsuk thei nawn kei ding uh. Ka nautumpen uh a hongding leh bel ka hohsuk ding ua, ka nautumpen uh a hong keileh huai mi mel mu theilou ding ka hi uh’ ka chi uh.

²⁷Na sikha ka pa un ka kiang uah, ‘ka zi in tapa nih a hon neihsak, chih na thei uhi.

²⁸A khat pen ka kiang a kipan a paikhia a, bohzan vek a om hingei ding ahi, ka chi hi. Huai nungsiah amah mulou vengveng ka hi.

²⁹Huchi in, hiai mi leng ka kiang a kipan na pimang ua, tuahsia va tuak leh ka lu kang lungkham a hana tumsak ding na hi uh,’ a chi hi.

³⁰Huchi in, ka nau in kou honzui lou a, na sikha ka pa kiang vatung leng, a hinna, ka nau uh hinna toh a kizop ziak in,

³¹hichi ahi ding a, naupang in a hon zuikei, chih a theih chiang in a si mai ding. Huchi in na sikhate’n na sikha ka pa uh lu kang lungkhamna a han a tumsak ding ka hi uhi.

³²Na sikha in na kiang a ka honpi kiknawn kei leh, a mawh tangtawn in ka pa lak ah ka paw ding, chi’n, ka pa kiang ah ka nau uh tungtang thu ah a bultumpa in ka kibawlta hi.

³³Huchi in, hehpih in na sikha ka nau uh sik in, Pu, na sikha in hon omsak inla, ka nau a ute zuitou sak in.

³⁴Ka nau in hon zuilou in bangchi’n ka pa kiang ka paitou thei dia? A tung a siatna tung mu ding ka kei hiam” a chi hi.