Read Paite Chin GENESIS 45 Bible Online

GENESIS 45 - Paite Chin bible

GENESIS 45

¹Huan, a kiang a dingte ma ah Joseph a kidek zouta kei a, “Mi tengteng ka kiang a kipan pawtkhesak vek un” chi’n, a kikou hi. Joseph a unaute kiang a a kigen sungteng a kiang ah kuamah ading kei uh.

²A kap lawlawih a, Aiguptate’n a za ua, Pharo inkuanpihte’n leng a za uhi.

³Joseph in a unaute kiang ah, “Joseph ka hi. Ka pa a damlai na maw?” a chi hi. Himahleh a unaute’n a dawng theikei ua, a ma ah buaitak in a omta uhi.

⁴Joseph mah in a unaute kiang ah, “Hehpih in honnaih un” a chi hi. Huchi in a vanaih ua, aman, “Na unaupa uh Joseph, Aigupta gam a lutpih dia na khot uh ka hi.

⁵Himahleh hiai a paiding a n’on khot ziak un lungkham kei unla, ki hehkhum tuankei un. Mite hinna hondam ding in Pathian in na ma ua honsawl masa ahi.

⁶Hiai kum nih sung hiai gam ah kial a keta a; kum nga in a samlai hi. Huai sung in leileh a omkei dia, buhlak leng a omkei ding.

⁷Tu nung khang om zel ding hawisak ding leh noute hotdamna thupitak a hingdam a k’on omsak theihna ding in Pathian in na ma uah a honsawl masa hi.

⁸Huchi in, hiai a honsawl nou na hi kei ua, Pathian ahizaw hi. Aman Pharo pa inn leh a inkuanpih tengteng heutu in leh Aigupta gam tengteng vaihawmtu in a hon bawlta hi.

⁹“Kintak in ka pa kiang ah vapai unla, a kiang ah, na tapa Joseph in hichi’n a chi. Pathian in Aigupta gam tengteng heutu in a hon bawlta a, ka kiang ah hong paisuk in, sawt hon halken.

¹⁰Huchi in, Gosen gam ah na teng ding a, ka kiang ngei ah na om ding; nang, na tate, na tute, na belamhonte, na bawnghonte leh na neih tengteng toh.

¹¹Hiai ah keimah in ka honvak ding. Kial lah kum nga omlai ding ahi ngal a. Huchilou in zaw na genthei kha ding, nang leh na inkuanpihte leh na neih tengteng toh” honchi un.

¹²Ngai un, noumau mit ngei leh ka nau Benjamin mit ngei in keimah kam mahmah in a genlai na mu kilkel uhi.

¹³Aigupta gam a ka thupina tengteng thu leh na thilmuh tengteng thu uh ka pa na hilh ding ua; ka pa kintak in hiai ah n’on pisuk pah ding uh ahi” a chi hi.

¹⁴A nau Benjamin ngawng a kun in a kapta a; Benjamin leng amah ngawng a kun in a kapta hi.

¹⁵A unau tengteng a tawp a, a kahkhum chiat a, huaikhit in a unaute’n thu vantang a genpih uhi.

¹⁶Joseph unaute a hong uh chih thu thuthang Pharo inkawte’n a naza uhi. Huai in Pharo leh a sikhate a kipaksak mahmah hi.

¹⁷Pharo in Joseph kiang ah, “Na unaute kiang ah, huchi in hih in. Na gante uh buh pawsak unla, pawt unla, Kanan gam ah pai un.

¹⁸Na pa uh leh na inkuanpihte uh honpi unla, ka kiang ah hongpai un. Aigupta gam a thilhoihte k’on pe ding a, hiai gam a thil om hoihpente na ne ding uh.

¹⁹Thu k’on pia hi. Hichi’n hih un. Na ta neu chikchikte uh ading leh na zite uh ading Aigupta gam a kipan kangtalaite la unla, na pa uh pi ding in va kuan un.

²⁰Na van uh leng ngaihtuah nuam dah un, Aigupta gam tengteng thil hoih peuhmah nou a ahi ngal a” a chi hi.

²¹Israel tate’n huchibang in a hih ua, Joseph in Pharo thupiak bang in kangtalaite a kiang uah a pia a, lampi a nekding leng a pia hi.

²²Avek ua kiang ah puansilh kikhenna ding a pe chiat a; Benjamin kiang ngial ah houh dangka za thum leh puansilh kikhenna ding nga a pia hi.

²³A pa kiang ah hiaite a khak hi: Aigupta gam a thil hoih pua sabiltung sawm leh lampi a, a pa ading buh leh tanghou leh nekding pua sabengtungnu sawm.

²⁴Huchi in a unaute a sawlkhia a, a paita uhi. Aman a kiang uah, “Lampi ah kina lou ding in pilvang un” a chi hi.

²⁵Aigupta gam a kipan a paitou ua, Kanan gam a a pa Jakob kiang a va tungta uhi.

²⁶A kiang ah, “Joseph a hinglai a, Aigupta gam tengteng heutu ahi” chi in, a hilh uhi. A thugen uh a gintak louh ziak in, a lungtang a bahta hi.

²⁷A kiang ua Joseph thugente a hilh ua; a tuanna ding kangtalai Joseph in a khakte a muh in Jakob lungtang a halhnawn hi.

²⁸Israel in, “A hunta; ka tapa Joseph hingdam a na om ahi maw. Ka sih ma in amah ka va mu ding” a chi hi.