Read Paite Chin GENESIS 47 Bible Online

GENESIS 47 - Paite Chin bible

GENESIS 47

¹Huaikhit in Joseph in Pharo a va hilh a, a kiang ah, “Ka pa, ka unaute, a belamhonte uh, a bawnghonte uh leh a neih tengteng u toh Kanan gam a kipan a hongtung suk ua; ngai in, Gosen gam ah a om uh” a chi hi.

²A unaute lak a kipan mi nga a pi a, Pharo a valak hi.

³Pharo in a unaute kiang ah, “Bang nasem na hi ua?” a chi hi. Amau Pharo kiang ah, “Na sikhate, kou hon suangtute a kipan, belamchingmite ka hi uh” a chi uhi.

⁴Amau mah in Pharo kiang ah, “Hiai gam a om tadih dia hong ka hi ua; ka gam uah lah na sikhate belamhonte nekding a om nawnta kei a; kial lah Kanan gam ah a uang mahmah hi; hehpih in na sikhate Gosen gam ah hon tengsak in” a chi uhi.

⁵Pharo in Joseph a houpih a, “Na pa leh na unaute na kiang ah a hongta ua;

⁶Aigupta gam a kiching mahmah hi. Na pa leh na unaute gam hoihna mun ah tengsak in. A lak ua thilhihtheitak, theihna nei ngial a om leh ka gam tung a heutu ding in bawl in” a chi hi.

⁷Joseph in a pa Jakob a pilut a, Pharo ma ah a dingsak a; Jakob in Pharo a vualzawl hi.

⁸Pharo in Jakob kiang ah, “Kum bang zah na hita a?” a chi hi.

⁹Jakob in Pharo kiang ah, “Ka khualzin nung zaw kum za leh sawmthum ahi a, ka damsung kumte a tawm a, a haksa hi. A hon suangtute a khualzin lai ua a damsung kum u leng phazou kei ing” a chi hi.

¹⁰Huchi in Jakob in Pharo a vualzawl a, Pharo a kipan a pawtta hi.

¹¹Joseph in a pa leh a unaute tenna a bawlsaka, Pharo thupiak bang in Aigupta gam a mun hoihpen ah, Rameses gam a gou ding un a peta hi.

¹²Joseph in a pa leh a unaute leh a pa inkuanpih tengteng a inkuan uh bangzel in nekding a pia a, a vakta hi.

¹³Huai gam tengteng ah nekding himhim a omta kei a; kial lah a uang mahmah hi. Kial ziak in Aigupta leh Kanan gam a bahta hi.

¹⁴Joseph in a buh leina man uh, Aigupta gam leh Kanan gam a dangka om tengteng a khawmsak vek hi. Joseph in huai dangka Pharo inn ah a tawilut hi.

¹⁵Aigupta gam leh Kanan gam a dangka tengteng a zatbei khit un, Aigupta mi tengteng Joseph kiang ah a hong ua, “Nekding honpia in. Na ma a si maimah ding ka hi ding uam? Dangka lah a om nawnta ngal kei a” a chi uhi.

¹⁶Joseph in, “Na gante uh hon pemai un. Dangka a om nawn kei leh na gan man un nekding k’on pe ding” a chi hi.

¹⁷A gante uh Joseph kiang ah a honpi ua; Joseph in sakol man ding leh, belamhon man ding leh, bawnghon man ding leh sabiltung man ding in nekding a pe zel hi. Huai kum in a gan tengteng uh man in nekding a pia a, a vak chiat hi.

¹⁸Huai kum a bei a, kum a hongthak nawn in a kiang ah a hong nawn ua, “Ka dangka teng uh a beitak dan ka toupa k’on imkei ding uh. Ka ganhonte uh ka toupa’n na neita hi. Ka toupa mitmuh in ka sapum uh leh ka gam uh chih louh, bangmah ka nei nawn kei uhi.

¹⁹Bangziak in na mitmuh in kou leh ka gam uh mangthang maimah ding hiam? Koumau mah ka gam u toh an in honlei mai in. Koumau leh ka gam uh Pharo sikhate ka hi ding uhi. Silou a dam a ka om theihna ding un leh gam a siatlouhna ding in buh chi honpia in” a chi uhi.

²⁰Huchi in Joseph in Pharo ading in Aigupta gam tengteng a leisakta hi. Kial a tung ua a awt mahmah ziak in Aigupta mite’n lah a lou uh a zuak chiat uhi. Huchi in gam Pharo a ahivekta hi.

²¹Mite Aigupta gamgi tawp khatlam a kipan khatlam tawppha in khuate ah a kisuansakta hi.

²²Siampute gam kia a leikei a, siampute’n Pharo a kipan tantuan a nei ua, Pharo in a piak a tantuan uh a ne zel uhi. Huaiziak in a gam uh a zuak kei uhi.

²³Huai nung in, Joseph in, mite kiang ah, “Ngai un, tuni in na gam uh leh noute Pharo ading in k’on leita hi. Hiai ah nou ading in buhchi a om, lei ah na ching ding uhi.

²⁴Buhlak hun chiang in hichi ahi ding. Pharo ading in seh nga suah, seh khat zel na pe ding ua, a seh li pen noumau a ahi ding. A chi ding, noumau, na inkuanpihte uh leh na tanu neu chikchikte uh nekding ahi ding” a chi hi.

²⁵Amau, Nang ka hinna uh na humbitta hi. Ka toupa’n pha a sakleh hon hehpih inla, Pharo sikhate ka hi ding uh” a chi uhi.

²⁶Huchi in, Joseph in Pharo in seh nga suah, seh khat a muhzel ding thu, Aigupta gam ading in tunitan in dan in a bawlta hi. Siampute gam kia ahi, Pharo a hilou.

²⁷Israel in Aigupta gam a Gosen gam ah tenna a bawlta a, huai ah a kihih inbul a, chi tampi a suang a, nakpitak in a pungta hi.

²⁸Jakob Aigupta gam ah kum sawmlehsagih a teng a, Huchi in, Jakob damsung kum za leh sawmli leh sagih ahi.

²⁹Israel sih hun a hong naita a; a tapa Joseph a sam a, a kiang ah, “N’on hehpih theih leh hehpih in na khut ka pheipi nuai ah golh inla, hon hehpih in, ka tung ah chihtaktak in hih in. Hehpih in Aigupta gam ah honvui mahmah ken.

³⁰Hon suangtute kiang a ka ihmut hun chiang in, nang Aigupta gam a kipan n’on pawkhe ding a, amaute vuina mun ah n’on vuizaw ding ahi” a chi hi. Aman, “Na chih bang in ka hih ding” a chi hi.

³¹Aman, “Ka kiang ah kichiam in” a chi a; a kiang ah a kichiamta hi. Huchi in lupna lukhung si in Israel a kunta hi.