Read Paite Chin GENESIS 48 Bible Online

GENESIS 48 - Paite Chin bible

GENESIS 48

¹Huan, hiaite nung in hichi ahi a, Joseph kiang ah, “Ngai in, na pa a chi a na” a chi uhi. Huchi in, a tapa nihte Manasseh leh Ephraim a kiang ah a tonpih hi.

²Jakob kiang ah, “Ngai in, na tapa Joseph na kiang ah a honghi” chi’n a hilh uh. Israel a kihalhsak a, lupna ah a tuta hi.

³Jakob in Joseph kiang ah, “Pathian, bangkim hihthei, Kanan gam a Luz khua ah ka kiang ah a kilak a, a hon vualzawl hi.

⁴Ka kiang ah, chi tampi k’on suangsak dia, k’on hih punglai ding. Chi tuamtuam omkhawm in k’on bawl ding. Hiai gam nanung a na suante kiang ah a tangtawn gou ding un ka pe ding” a honchi hi.

⁵“Na tapa nihte, Aigupta gam a na neihte, kei a ahi uhi. Ephraim leh Manasseh, Reuben leh Simeon mah bang in kei a ahi ding uhi.

⁶Hiai mite nung a ta na neihte nang a ahi ding uh, a goutan uah a ute uh min a kikoppih ding uh.

⁷Kei tungthu ahihleh, Padan gam a kipan ka hongpai lai in Rakil Kanan gam ah lamkal ah Ephrath khua gamla kuam ahihlai in, ka kiang ah a si hi. Huai ah Ephrath khaw lampi ah ka vuita, huai bel Bethlehem khua ahi” a chi hi.

⁸Israel in Joseph tapate a en a, “Hiaite kuate ahi ua?” a chi hi.

⁹Joseph in a pa kiang ah, “Hiaite ka tapa, Pathian in a honpiakte ahi uh” a chi hi. Aman, “Hehpih in ka kiang ah honpi in, amau ka na vualzawl ding” a chi hi.

¹⁰Israel mit a upat tak ziak in a chim nawnkei a, aman a na tawp a, a na pom hi.

¹¹Israel in Joseph kiang ah, “Na mel muh ka kilamen nawn kei a, himahleh, ngai in, Pathian in na suante mel nangawn a hon musakta” a chi hi.

¹²Joseph in amau a pa pheikala kipan a pikhia a, a mai a leisi in a kun hi.

¹³Joseph in a nih un a kai a, Ephraim pen a khut taklam in Israel khut veilam pang ah, Manasseh pen a khut veilam in Israel khut taklam pang a kai in a pinai hi.

¹⁴Israel in a sawkkalh teitei a, a khut taklam in a sawk a, Ephraim a naupangzaw sip ah a nga a; Manasseh bel a ta masa ahi.

¹⁵Joseph a vualzawl a, Hon suangpa Abraham leh Isak om zelna Pathian, tuni tan a ka damsung tengteng hon vakpa Pathian,

¹⁶Thil hoihlou tengteng a kipan hontanpa Angel in naupangte vualzawl hen. Ka min leh hon suangpa Abraham leh Isak min pu uhen. Khovel ah thupitak hi ding in hongpung uhen, a chi hi.

¹⁷Joseph in a pa’n a khut taklam Ephraim sip a a ngak a muh in a lungkim kei a; a pa khut Ephraim sip a kipan Manasseh sip a suan ding in a domkang hi.

¹⁸Joseph in a pa kiang ah, “Pa, hichibang ding ahi kei. Hiai ahi ta masa, na khut taklam a sip ah ngazaw in” a chi hi.

¹⁹Himahleh, a pa a utkei a, “Ka thei hi, ka tapa aw, ka thei hi. Amah leng nam gentham in a om dia, amah leng a thupi ding hi. Himahleh a naupa amah sang in a thupizaw dia, a suante leng chituam tuam tamtak a honghi ding uh” a chi hi.

²⁰Huchi in Jakob in, “Nang ah Israel vualzawl ahi ding, Pathian in Ephraim leh Manasseh bang in honbawl hen,” chi in a vualzawl hi. Huchibang in Manasseh ma ah Ephraim a omsak hi.

²¹Israel mah in Joseph kiang ah, “Ngai in, si ding ka hita hi. Himahleh Pathian na kiang uah a om dia, nou hon suangtute gam ah a hon pilut nawn ding hi.

²²Huai lou leng, na unaute tantuan sang in tankhat in k’on petuan hi, ka namsau leh ka thalpeu a Amorte khut a kipan ka laksak pen” a chi hi.